199 மில்லியன் ரூபா செலவில் புனரமைக்கப்படும் அச்சுவேலி கைத்தொழில் பேட்டை!

June 25th, 2012 அன்று பிரசுரிக்கப்பட்டது.

இலங்கை அரசினதும் இந்திய அரசினதும் 199 மில்லியன் நிதியை பெற்று அச்சுவேலி கைத்தொழில் பேட்டை துரித திட்டத்தில் மீள்புனரமைக்கப்பட்டு வருகின்றது.

விரைவில் அங்கு முதலீடு செய்யும் முதலீட்டாளர்களுக்கு இந்திய அரசின் நிதி உதவியுடன் கட்டடங்கள் கட்டி வழங்குவதற்கு நடவடிக்கை எடுக்கப்படும் என்று தெரிவிக்கப்பட்டுள்ளது.

அச்சுவேலி கைத்தொழில் பேட்டையில் தொழிலை ஆரம்பிப்பவர்களுக்கான அபிவிருத்திக் கூட்டம் யாழ். செயலகத்தில் இடம்பெற்றது. இந்தக் கலந்துரையாடலின் போதே மேற்கண்டவாறு கூறப்பட்டது.

அங்கு மேலும் தெரிவிக்கப்பட்டதாவது:

மின்சாரம், குடிதண்ணீர் பிரச்சினைக்கு முழுமையான தீர்வு எட்டப்பட்டுள்ளது. விரைவில் காணி தேவை என்ற நிலைப்பாட்டை முன்வைத்தவர்களுக்கு காணி வழங்க முன்வந்துள்ளேன்.

இதனைவிட சிறிய, நடுத்தர முதலீட்டாளர்களுக்கு எவ்வாறு வங்கி மூலம் உதவலாம் என்று தெளிவுபடுத்துவதற்கும் ஏற்பாடு செய்யப்பட்டுள்ளது.
இவ்வாறு அமைச்சர் டக்ளஸ் தேவானந்தா கூறினார்.

மத்திய வங்கி, இலங்கை வங்கி, மக்கள் வங்கி, பிரதேச அபிவிருத்தி வங்கி, பிராந்திய அபிவிருத்தி வங்கி, சனச அபிவிருத்தி வங்கி, நேசன்ஸ் றஷ்ட் வங்கி, இந்தியன் வங்கி, ஹட்டன் நஷனல் வங்கி, வர்த்தக வங்கி, தேசிய சேமிப்பு வங்கி, என்.டி.பி வங்கி ஆகியவற்றின் பிரதிநிதிகளும் வருகை தந்திருந்தனர்.

இதில் அரச அதிபர் சு. அருமைநாயகம், தலைவர் உட்படப் பலர் கலந்துகொண்டனர்.