நட்பு

by **rammalar** Mon 29 Oct 2012 - 12:34

-
மின் தூக்கியில் உடன் வரும்போது
மெல்லச் சிரித்துப் பேசிய
சீன நண்பருக்கு
‘ஹாய்’ மட்டும் சொல்லி விட்டு
இறுக்கமாய் வெளியேறினார்
-
எதிரில் வந்த பக்கத்து வீட்டு நண்பரின்
நலன் விசாரிப்புக்கு
அக்கறையற்ற புன்னகையை மட்டும்
கடனுக்கு காட்டிவிட்டு
அதே வேகத்தோடு
வீட்டுக்குள் நுழைகிறார்
-
கையில் ‘காபி’ யோடு வந்த
தர்ம்பத்தினி தந்ததை
வாய்க்குள் ‘போட்டு’க் கொண்டு
‘என்னங்க’ என்று
ஏதோ சொல்ல வந்ததை மட்டும்
காதில் போட்டுக்கொள்ளாமல்
கையமர்த்துகிறார்…
-
பாடத்தில் சந்தேகம் கேட்டு
பக்கத்தில் வந்த மகளிடம்
‘அம்மாகிட்டே கேள்டா செல்லம்
அப்பா டயர்டா இருக்கேன்’ என்று
வழக்கமான வசனத்தை
ஒப்புவித்து விட்டு
அறைக்குள் நுழைகிறார்…
-
கணினி முன் அமர்ந்து தன்
தன் முகப்பக்கத்தை திறந்து
பழைய நண்பர்களுக்கு
பதில் அனுப்பியபடியே
கணினிக் கடலுக்குள்
மூழ்கிப்போகிறார்…
-
கையருகே இருக்கிற
உறவுகளையும் நட்புகளையும்
உதாசீனம் செய்துவிட்டு மீண்டும்
தேடத்தொடங்கினார்
புதிய நட்புகளை…!
-
===============================
>ந.வீ.விசயபாரதி
நன்றி: தமிழ் முரசு (சிங்கப்பூர் – 28-10-12)