பால் தாக்கரேவின் 5 மிகப்பெரும் தோல்விகள்...

by **யுவராஜா** Mon 24 Dec 2012 - 9:37

ஒரு அரசியல்வாதி அதுவும் ஒரு மாநிலத்தில் மிகப் பெரும் செல்வாக்கை செலுத்தும் மனிதர் இறக்கும் போது அவர் சாதித்ததை குறித்தும் சாதிக்க தவறியது குறித்தும் என எதிரும் புதிருமாக விமர்சனம் வருவது வழமையே.
:-
ஆனால் உயிரோடு இருக்கும் போது தாக்கரேவின் மீதான பயத்தால் அவரின் தோல்விகளை கண்டு கொள்ளாத ஊடகங்கள் அவரின் மறைவுக்கு பிறகும் சாதனைகளையே பேசும் சூழலில் முன்னாள் மராட்டிய முதல்வர் எஸ்.கே பாட்டீலை சமாளிப்பதற்காக இந்திராகாந்தியால் கொம்புசீவி விடப்பட்டவரான பால் தாக்கரே சாதிக்க தவறிய ஐந்து விஷயங்களை இப்போது காண்போம்.
:-
1. ஒருமுறைகூட முதல்வராக முடியவில்லை
சிவசேனாவை தாக்கரே தொடங்கிய போது கண்டிப்பாக தாக்கரேவை எதிர்த்தவர்கள்கூட தாக்கரே முதல்வர் ஆவார் என்றே உறுதியாய் நம்பினர். ஏனென்றால் 60களின் ஆரம்பத்தில் ராம் மனோகர் லோகியா ஆரம்பித்த காங்கிரஸ் எதிர்ப்பு இயக்கத்தால் காங்கிரஸ் அரசுகள் கவிழ ஆரம்பித்த நேரத்தில் சிவசேனா ஆரம்பிக்கப்பட்டதால் எதிர்பார்ப்பு அதிகமாகவே இருந்தது.
:-
ஆனால் வருடங்கள் செல்ல செல்ல தம் கட்சி ஆட்சியை பிடிக்கும் என்ற நம்பிக்கை தாக்கரேவுக்கு போய் விட்டதால் முதல்வராகும் ஆசைக்கே முழுக்கு போட்டு விட்டார்.1995 ல் சிவசேனா பிஜேபியுடன் கூட்டணி ஆட்சியை பிடித்த போது சோனியாவை போல் திரை மறைவில் ஆட்சியை நடத்த கூடியவராக மட்டுமே அவரால் ஆக முடிந்தது.
:-
2. காங்கிரஸை வேரறுக்க முடியாதது
1967ல் தமிழகத்தில் காங்கிரஸை திமுக தோற்கடித்த பின்னர் கடந்த 45 வருடங்களாக தமிழகத்தில் ஆட்சியை பிடிப்பதை பற்றி காங்கிரஸால் நினைத்துக்கூட பார்க்க முடியவில்லை. மேற்கு வங்காளம், குஜராத், உத்தர பிரதேசம், ஆந்திரா, ஒரிசா என பல மாநிலங்களிலும் காங்கிரஸுக்கு இதே நிலை தான். ஆனால் மராத்தியத்தின் புலியாக கருதப்பட்ட தாக்கரேவின் மகாராஷ்டிரத்தால் வெறும் 6 ஆண்டுகளை தவிர மீதமுள்ள 59 ஆண்டுகள் காங்கிரஸ் முதல்வர்களே ஆண்டுள்ளனர் என்பதோடு காங்கிரஸுக்கு பலமான அடித்தளம் உள்ள மாநிலமாகவும் மராட்டியம் திகழ்கிறது.
:-
3. சக்கன் புஜ்பாலை தக்க வைக்க முடியாதது
மும்பையின் முன்னாள் மேயரான புஜ்பால் சிவசேனாவின் பிற்படுத்தப்பட்டோர் முகமூடியாகவும் தாக்கரேவின் வாரிசாகவும் கருதப்பட்டவர். சாதியை அடிப்படையாக கொண்ட இந்திய அரசியலில் புஜ்பால் மிகப் பெரும் வாக்கு வங்கியை வைத்திருந்தார். 1991ல் புஜ்பால் காங்கிரசில் சேர்ந்தது அம் மாநிலத்தில் நடந்த மிகப் பெரும் கட்சி தாவல் என்றும் தாக்கரேவின் கீர்த்திக்கு நேர்ந்த அவமரியாதையாகவும் கருதப்பட்டது. புஜ்பாலின் விலகலுக்கு பின் சிவசேனாவின் ஒட்டு வங்கி ஓரளவு குறையத்தான் செய்தது.
:-
4. சகோதரர் மகனைக்கூட தக்கவைக்க முடியாதது
புஜ்பால் சிவசேனாவிலிருந்து விலகியபிறகு தாக்கரேவின் வாரிசாக கருதப்பட்டவர் தாக்கரேவின் சகோதரர் ஸ்ரீகாந்த் தாக்கரேயின் மகன் ராஜ் தாக்கரே. கட்சியில் தனக்கான ஆதரவு தளத்தை ஆழமாக கட்டியமைத்த ராஜ் தாக்கரேவை மதிக்காமல், தாக்கரே தனது மகன் உத்தவ் தாக்கரேவை தலைவராக நியமித்த போது அவருடைய சகோதரர் மகனான ராஜ் தாக்கரே சிவசேனாவிலிருந்து விலகியதோடு இல்லாமல் மஹாராஷ்டிரா நவ்நிர்மாண் சேனாவை தொடங்கியது சிவசேனாவின் ஓட்டு வங்கியை கொஞ்சம் சிதைத்துள்ளதும் ஒத்து கொள்ளப்பட வேண்டிய உண்மை.
:-
5. ஆரம்பம் முதல் இறுதி வரை வன்முறையே
இந்தியாவில் பெரும்பாலான ஓட்டு வங்கியை அடிப்படையாக கொண்ட கட்சிகள் தாங்கள் ஆட்சியை பிடிக்க வன்முறையை பயன்படுத்துவது புதிதல்ல. சில கட்சிகள் ஆட்சியை பிடிக்க வழி பாட்டு தலங்களை இடிப்பதும் இன சுத்திகரிப்பில் ஈடுபடுவதும் இந்தியாவில் யதார்த்தமான உண்மைகள். ஆனால் பிற கட்சிகள் ஆட்சியை பிடிக்கவும் அதை தக்கவைத்து கொள்ளவுமே வன்முறையை பயன்படுத்திய வேளையில் சிவசேனாவோ அது ஆரம்பித்த நாளிலிருந்து இன்று வரை சுமார் 50 ஆண்டுகளுக்கு மேலாகவும் வன்முறையை பயன்படுத்துவதைபெருமையாகவும், வெறுப்பை தூண்டும் பேச்சுகளை பரப்புவதும், சட்டங்களுக்கு கட்டுபடா கட்சியாகவும் தோற்றமளிப்பது இந்திய ஜனநாயகத்தின் இழுக்காகும்.ஒருமுறை தேர்தலில் போட்டியிட தேர்தல் கமிசனாலேயே சிவசேனா தடை செய்யப்பட்டதும் குறிப்பிடத்தக்கது.
:-
இந்நேரம.காம்