கையில் எலும்பு முறிவு: தொடரில் இருந்து சங்ககரா விலகல்...

ஆஸ்திரேலியாவில் சுற்றுப்பயணம் மேற்கொண்டுள்ள இலங்கை அணி 3 போட்டிகள் கொண்ட டெஸ்ட் தொடரில் விளையாடி வருகிறது. இத்தொடரின் 2-வது போட்டி இலங்கை அணிக்கு கடும் சோதனையாக அமைந்தது. குறிப்பாக ஆஸ்திரேலியாவின் வேகப்பந்து வீச்சாளர் மிட்செல் ஜான்சனின் பந்துகளை எதிர்கொள்ள முடியாமல் இலங்கை பேட்ஸ்மேன்கள் திணறினர்.

ஆட்டத்தின்போது ஜான்சன் வீசிய பவுன்சர் பந்து, சங்ககராவின் இடதுகையை பலமாகத் தாக்கியது. இருப்பிலும் வலியைப் பொறுத்துக்கொண்டு ஒரு ரன் எடுத்த சங்ககரா, மேற்கொண்டு ஆட முடியாமல் வெளியேறினார். ஸ்கேன் செய்து பார்த்தபோது கையில் எலும்பு முறிவு ஏற்பட்டது தெரியவந்தது.

இதையடுத்து அவருக்கு ஆபரேஷன் செய்யப்படுகிறது. எனவே, அடுத்த 6 முதல் 8 வாரங்கள் வரை அவரால் விளையாட முடியாது. எனவே ஆஸ்திரேலியா தொடர் முழுவதும் அவர் இடம்பெற மாட்டார்.

இதேபோல் வேகப்பந்து வீச்சாளர் வெலகேதராவும் தோள்பட்டை காயம் காரணமாக, சிட்னியில் நடைபெற உளள் 3-வது போட்டியில் இருந்து நீக்கப்பட்டுள்ளார். விக்கெட் கீப்பர் பிரசன்னா ஜெயவர்தனே, வேகப்பந்துவீச்சாளர் நுவான் குலசேகரா ஆகியோரின் உடற்தகுதி அறிக்கை இன்னும் வரவில்லை. இது இலங்கை அணிக்கு மேலும் பின்னடைவாக கருதப்படுகிறது.