இந்தியாவில் 10 ஆண்டுகளில் 1,455 பேருக்கு மரண தண்டனை விதிப்பு

இந்தியாவில் 10 ஆண்டுகளில் 1,455 பேருக்கு மரண தண்டனை விதிப்பு
இந்தியாவில் 10 ஆண்டுகளில் பல்வேறு குற்ற வழக்குகளில் 1,455 பேருக்கு மரண தண்டனை விதிக்கப்பட்டு இருப்பதாக புள்ளி விவரம் தெரிவிக்கிறது.

மத்திய உள்துறை அமைச்சின் தேசிய குற்ற ஆவணங்கள் பிரிவின் ஆவணங்களில் இடம் பெற்றுள்ள தகவல்களை மேற்கோள்காட்டி, இந்தியாவில் நடைபெறும் குற்றங்கள் மற்றும் குற்றவாளிகளுக்கு விதிக்கப்பட்ட மரண தண்டனை பற்றி ஆசிய மனித உரிமைகள் மையத்தின் சார்பில் அறிக்கை ஒன்று வெளியிடப்பட்டு உள்ளது. அந்த அறிக்கையில் கூறப்பட்டு இருப்பதாவது:

கடந்த 2001 ஆம் ஆண்டில் இந்தியாவின் மக்கள் தொகை 102 கோடியே 80 லட்சம். அந்த ஆண்டில் நாடு முழுவதும் பதிவு செய் யப்பட்ட கொலை வழக்குகளின் எண்ணிக்கை 36 ஆயிரத்து 202. 2011 ஆம் ஆண்டில் நாட்டின் மக்கள் தொகை 121 கோடி. அந்த ஆண்டில் பதிவு செய்யப்பட்ட கொலை வழக்குகளின் எண்ணிக்கை 34 ஆயிரத்து 305. அதாவது மக்கள் தொகை அதிகரித்த போதிலும் கொலை வழக்குகளின் எண்ணிக்கை குறைந்து இருக்கிறது.

1,455 பேருக்கு மரண தண்டனை

இந்தியாவில் 2001 ஆம் ஆண்டு முதல் 2011 ஆம் ஆண்டு வரையிலான 10 ஆண்டுகளில் பல்வேறு வழக்குகளில் 1,455 பேருக்கு மரண தண்டனை விதிக்கப்பட்டுள்ளது. மூன்றுக்கும் குறைவான நாட்களில் ஒருவர் என்ற வீதத்தில் மரண தண்டனை விதிக்கப்பட்டு இருக்கிறது. சராசரியாக ஆண்டுக்கு 132.27 பேருக்கு மரண தண்டனை விதிக்கப்பட்டுள்ளது.

இந்த 10 ஆண்டுகளில் மரண தண்டனை பெற்றவர்களின் எண்ணிக்கையில் உத்தர பிரதேசம் முதல் இடத்தில் உள்ளது. அந்த மாநிலத்தில் 370 பேருக்கு மரண தண்டனை விதிக்கப்பட்டு இருக்கிறது. பீகாரில் 132 பேருக்கும் மராட்டியத்தில் 125 பேருக்கும் கர்நாடகம், தமிழ் நாட்டில் தலா 95 பேருக்கும், மத்திய பிரதேசத்தில் 87 பேருக்கும், ஜார்கண்டில் 81 பேருக்கும், மேற்கு வங்களாத்தில் 79 பேருக்கும், டெல்லியில் 71 பேருக்கும், குஜராத்தில் 57 பேருக்கும் மரண தண்டனை விதிக்கப்பட்டு உள்ளது.

ராஜஸ்தானில் 38 பேருக்கும், கேரளாவில் 34 பேருக்கும், அரியானாவில் 31 பேருக்கும், அசாமில் 21 பேருக்கும், காஷ்மீரில் 20 பேருக்கும், பஞ்சாபில் 19 பேருக்கும், சத்தீஷ்காரில் 18 பேருக்கும், உத்தராஞ்சலில் 16 பேருக்கும், அருணாசல பிரதேசத்தில் 08 பேருக்கும், மேகாலயாவில் 6 பேருக்கும், யூனியன் பிரதேசங்களான சண்டிகார், டாமன் மற்றும் டையூவில் 4 பேருக்கும், மணிப்பூர், இமாச்சல பிரதேசம் மாநிலங்களில் தலா 3 பேருக்கும், திரிபுரா, புதுச்சேரியில் தலா 2 பேருக்கும் கோவா மாநிலத்தில் ஒருவருக்கும் தூக்குத் தண்டனை விதிக்கப்பட்டு இருக்கிறது.

அருணாசல பிரதேசம் மிஜோராம், நாகாலாந்து, சிக்கிம் மாநிலங்களிலும், யூனியன் பிரதேசங்களான அந்தமான், தத்ராநகர் ஹவேலி, மற்றும் லட்சத்தீவில் யாருக்கும் மரண தண்டனை வித்திக்கப்படவில்லை. 2001 முதல் 2011 ஆம் ஆண்டு வரையிலான 10 ஆண்டுகளில் 4,321 பேரின் மரண தண்டனை ஆயுள் தண்டனையாக குறைக்கப்பட்டு இருக்கிறது. இவ்வாறு அதில் கூறப்பட்டு உள்ளது.