மரக்காணத்தில் நள்ளிரவில் வீடு தீப்பிடித்து 4 பேர் கருகி சாவு

by *சம்ஸ் Sun 17 Feb 2013 - 7:42

மரக்காணம், பிப்.17-

மரக்காணம் காலனி சம்புவெளி பகுதியை சேர்ந்தவர் எட்டியான் (வயது 65), கூலி
தொழிலாளி. இவரது மனைவி காசியம்மாள் (56). இவர்களது மகள் சுமதி (39),
மருமகன் ஏழுமலை (49). பேத்தி கல்பனா (19). இவர்கள் அனைவரும் ஒரே வீட்டில்
வசித்து வந்தனர். கல்பனா கனகசெட்டிகுளத்தில் உள்ள பிம்ஸ் மருத்துவ
கல்லூரியில் நர்சிங் படித்து வந்தார்.

இந்த நிலையில் நேற்று இரவு அனைவரும் சாப்பிட்டு விட்டு தூங்கினர்.
கடுங்குளிர் காரணமாக வீட்டின் முன் கதவை உள்பக்கமாக தாழ்ப்பாள்
போட்டுவிட்டு தூங்கினர். நள்ளிரவு 1 மணியளவில் மின்கசிவு காரணமாக
எட்டியானின் கூரை வீடு திடீரென தீப்பிடித்து எரிந்தது. கண் இமைக்கும்
நேரத்தில் தீ மளமளவென வீடு முழுவதும் எரிய தொடங்கியது.

இதையடுத்து தூங்கி கொண்டிருந்த அனைவரும் எழுந்து தப்பி வெளியே வர முயன்றனர். ஆனால் முடியவில்லை. அனைவரும் தீயில் சிக்கிக் கொண்டனர்.

இதை தொடர்ந்து இவர்களது அலறல் சத்தம் கேட்டு அக்கம் பக்கத்தினர் ஓடி
வந்தனர். தீயை அணைத்து தீயில் சிக்கியவர்களை மீட்டனர். ஆனால் எட்டியான்,
ஏழுமலை, சுமதி, கல்பனாவை கரிக்கட்டையாக பிணமாகவே மீட்க முடிந்தது.

இதையடுத்து உடல் கருகிய காசியம்மாளை உடனடியாக கனகசெட்டிகுளம் பிம்ஸ்
ஆஸ்பத்திரியில் சேர்த்தனர். பின்னர் மேல் சிகிச்சைக்காக காசியம்மாள் புதுவை
அரசு ஆஸ்பத்திரியில் அனுமதிக்கப்பட்டார். அங்கு ஆபத்தான நிலையில் அவர்
சிகிச்சை பெற்று வருகிறார்.

இந்த தீ விபத்து குறித்து மரக்காணம் போலீசார் வழக்கு பதிவு செய்து விசாரணை
நடத்தி வருகிறார்கள். தீ விபத்தில் ஒரே குடும்பத்தில் 4 பேர் பலியான
சம்பவம் மரக்காணம் பகுதியில் பெரும் சோகத்தை ஏற்படுத்தி உள்ளது.