வறிய குடும்ப மாணவிக்கு இன்று வீடு கையளிப்பு

by **நண்பன்** Mon 18 Feb 2013 - 6:43

பல்கலைக்கழகம் தெரிவான
வறிய குடும்ப மாணவிக்கு இன்று வீடு கையளிப்பு

ஜனாதிபதி மஹிந்த ராஜபக்ஷ அவர்களின் ஆலோசனைக்கமைய பல்கலைக்கழகத்திற்கு தெரிவான சஞ்சீவனி பிரியதர்ஷனிக்கு முழுமையான வீடொன்று வழங்கப்படுகிறது.

இந்த வீடு இன்று வழங்கப்படும். பொரளை ரத்னாவலி மகளிர் கல்லூரியில் வைத்து வீடமைப்பு நிர்மாணத்துறை பொறியியல் சேவை மற்றும் பொது வசதிகள் அமைச்சர் விமல் வீரவன்சவின் தலைமையில் இவ் வைபவம் நடைபெறும்.

பொரளை “ஜனசெவன சிங்ஹபுர” தொடர்பாடித் தொகுதியில் நிர்மாணிக்கப்பட்டுள்ள இந்த வீட்டின் பெறுமதி 30 இலட்சம் ரூபாவுக்கும் அதிகமென நகர குடிசன அபிவிருத்தி அதிகார சபை குறிப்பிட்டுள்ளது.

இந்த மாணவியான பிரியதர்ஷனி, களனி பாலத்துக்கு அருகில் சேதவத்த பிரதேசத்தில் மிகவும் வசதி குறைந்த தற்காலிக வீட்டில் வசித்து வருகிறார். இவர் 2012 ஆம் ஆண்டு பல்வேறு சவால்களுக்கும் பிரச்சினைகளுக்கும் மத்தியில் வர்த்தகப் பிரிவில் தோற்றி ‘ஏ’ சித்திகள் மூன்று பெற்று பல்கலைக்கழகத்திற்கு தெரிவாகி உள்ளார். இவருக்கு புதிய வீடொன்றை பெற்றுக்கொடுக்குமாறு ஜனாதிபதி அவர்கள் ஆலோசனை வழங்கியிருந்தார். அதற்கமைய ஜனசெவன வீடமைப்புத் திட்டத்தின் கீழ் அமைச்சர் விமல் வீரவன்ச இந்த வீட்டை இன்று கையளிக்கவுள்ளார்.

பொரளை ரத்னாவலி மகளிர் கல்லூரியில் நிர்மாணிக்கப்பட்டுள்ள புதிய கட்டிடத்தையும் கணனி கூடத்தையும் மாணவிகளுக்கு கையளிக்கும் நிகழ்வும் இன்று நடைபெறவுள்ளது.