பிரபாகரனின் 12 வயது மகனின் மரணம் குறித்து சர்வதேச விசாரணை .

by **Mohamed Nifras** Thu 21 Feb 2013 - 21:09

விடுதலைப் புலிகள் அமைப்பின் தலைவர் வேலுப்பிள்ளை பிரபாகரனின் 12 வயது இளைய மகனின் மரணம் பற்றி சர்வதேச விசாரணை நடத்தப்பட வேண்டும் என்று தமிழ்த் தேசியக்கூட்டமைப்பின் மட்டக்களப்பு மாவட்ட எம்.பி. பா.அரியநேத்திரன் நேற்று புதன்கிழமை சபையில் வலியுறுத்தினார்.
பாராளுமன்றத்தில் நேற்று நடைபெற்ற வடக்கின் தற்போதைய நிலைமை தொடர்பான சபை ஒத்திவைப்பு வேளை பிரேரணை மீதான விவாதத்தில் பேசும் போதே அரியநேத்திரன் இந்த வலியுறுத்தலை விடுத்தார். அவர் இங்கு மேலும் பேசுகையில்,

இலங்கையில் 65வது சுதந்திர தினத்தில் ஜனாதிபதி திருகோணமலை வந்து உரையாற்றிச் சென்றார் என்பதால் தமிழ் மக்களுக்கு சுதந்திரம் கிடைத்துவிட்டது என்று அர்த்தமில்லை. தமிழ் மக்களுக்கு இன்னும் சுதந்திரம் கிடைக்கவில்லை.

2009ம் ஆண்டு மே மாதம் பிரபாகரனின் 12 வயது மகன் எப்படி படுகொலை செய்யப்பட்டார் என்பதை தமிழ்ப் பத்திரிகைகள் செய்தியாக வெளியிட்டுள்ளன. எனினும் அரசு அதை நிராகரித்துள்ளது.

வெறுமனே மறுப்புத் தெரிவிப்பதில் பலனில்லை. புகைப்படம் ஒன்று உண்மையானதா அல்லது போலியாக சித்திரிக்கப்பட்டதா போன்ற விடயங்களை பகுப்பாய்வு செய்யக்கூடிய நவீன தொழில்நுட்ப வசதிகள் வந்துவிட்டன.

ஆகவே இது பற்றி சர்வதேச ரீதியில் முழுமையான விசாரணையொன்று நடத்தப்பட வேண்டும். இங்கு சிறுவர் உரிமைகள் எந்த அளவில் இருக்கின்றன என்பதை இந்த 12 வயது சிறுவனின் படுகொலை எடுத்துக்காட்டுகிறது.

இவ்வாறான காரணங்களினால் தான் சர்வதேச விசாரணையை நாம் தொடர்ந்தும் வலியுறுத்தி வருகிறோம்.

தமிழ்த் தேசியக்கூட்டமைப்பு எம்.பி.க்கள் தமிழ் மக்களின் பிரச்சினைகள் பற்றி பாராளுமன்றத்தில் பேசிவிட்டு வெளியில் செல்ல முடியாத நிலைமையே நிலவுகிறது.

அரசினாலோ அல்லது பாராளுமன்றத்தினாலோ தமிழ் மக்களுக்கான தீர்வை வழங்க முடியாது. ஆதலால் சர்வதேசம் தான் நியாயபூர்வமான தீர்வொன்றை வழங்க வேண்டும்' என்றார்.