வருடாந்தம் 25,000 பேர் புற்றுநோயால் பாதிப்பு

by *சம்ஸ் Thu 28 Feb 2013 - 7:18

* 2011 உடன் ஒப்பிடுகையில் 5000 இனால் அதிகரிப்பு

மகரகம ஆஸ்பத்திரி பணிப்பாளர்

எம். எஸ். பாஹிம்

புற்று நோயினால் பாதிக்கப்பட்டவர்களுக்கு உரிய சிகிச்சை வழங்குவதனால் பாதிக்
கப்பட்டவர்களில் 50 முதல் 60 வீதமானவர்களை காப்பாற்ற முடிகிறது. இருந்தும்
வருடாந்தம் 25 ஆயிரம் புற்றுநோயாளர்கள் அடையாளங் காணப்படுவதாக மகரகம புற்றுநோய்
ஆஸ்பத்திரி பணிப்பாளர் டொக்டர் கனிஷ்க கருணாரத்ன தெரிவித்தார்.
கலர்ஸ் ஒப் கரேஜ் நிதியமும் எச். என். பி. வங்கியும் இணைந்து 22 மில்லியன் ரூபா
செலவில் மகரகம புற்றுநோய் ஆஸ்பத்திரியில் நிர்மாணித்த புதிய சத்திரசிகிச்சை தீவிர
சிகிச்சைப் பிரிவை சுகாதார அமைச்சர் மைத்திரிபால சிறிசேன நேற்று திறந்து வைத்தார்.
கலர்ஸ் ஒப் கரேஜ் நிதியத்தின் முதலாவது தலைவரான அமரர் ஆர். சேனாதிராஜாவின் பெயரில்
புதிய பிரிவு நிர்மாணிக்கப்பட்டுள்ளது.

இந்த நிகழ்வில் உரையாற்றிய அவர் மேலும்
கூறியதாவது: மகரகம புற்றுநோய் ஆஸ்பத்திரியில் நீண்ட காலமாக காணப்பட்ட குறைபாட்டை
கலர்ஸ் ஒப் கரேஜ் நிதியம் தீர்த்து வைத்துள்ளது. தென் ஆசியாவில் சிறந்த
ஆஸ்பத்திரியாக மகரகம புற்றுநோய் ஆஸ்பத்திரி முன்னேறியுள்ளது. வடக்கு, கிழக்கு உட்பட
நாடு பூராவுமிருந்து வந்து நோயாளர்கள் இங்கு சிகிச்சை பெறுகின்றனர்.
தினமும் 600 பேர் வெளிநோயாளர் பிரிவில் சிகிச்சை பெற்றுச் செல்வதோடு 900 முதல் 1000
பேர் தங்கி சிகிச்சை பெறுகின்றனர்.
இங்கு சத்திர சிகிச்சை, அவசர சிகிச்சைப் பிரிவொன்று நீண்ட காலமாக இருக்கவில்லை. இரு
வருடங்களுக்கு முன்னர் இங்கு மருத்துவ தீவிர சிகிச்சைப் பிரிவொன்று
நிர்மாணிக்கப்பட்டது. அவசர புற்றுநோய் சத்திர சிகிச்சை செய்யப்படும் நோயாளர்களுக்கு
சிகிச்சை வழங்கும் புதிய பிரிவு மூன்று கட்டில்களுடன் கூடியதாக இருந்தது. தற்பொழுது
சகல வசதிகளுடன் கூடியதாக 6 கட்டில்களுடன் இப் பிரிவு நிர்மாணிக்கப்பட்டுள்ளது.
புற்றுநோயாளர்களுக்கு சிகிச்சை அளிக்க அதிக செலவாகிறது. இந்த நிலையில் தனியார்
அமைப்புகள் இதற்கு உதவி வருவது வரவேற்கத்தக்கது.
2011 உடன் ஒப்பிடுகையில் 2012 இல் புற்று நோயாளர் தொகை 5 ஆயிரத்தினால் அதிகரித்தது.
2012 இல் 25 ஆயிரம் புற்று நோயாளர்கள் அடையாளம் காணப்பட்டனர்.
புற்றுநோயை முன்கூட்டி அடையாளம் காணக் கூடிய வசதிகளும் சிறந்த சிகிச்சை முறைகளும்
காணப்படுவதால் புற்று நோயாளிகளில் பாதிக்கு மேற்பட்டவர்களை காப்பாற்ற முடிகிறது
என்றார்.
கலர்ஸ் ஒப் கரேஜ் நிதிய பொறுப்பாளர்களில் ஒருவரான தயான் கோமஸ் பேசுகையில், கலர்ஸ்
ஒப்ட கரேஜ் நிதியம் புற்றுநோயாளர்களின் நலனுக்காக பல்வேறு திட்டங்களை
முன்னெடுக்கிறது. 2011 இல் இங்கு 55 மில்லியன் ரூபா செலவில் மருத்துவ தீவிர
சிகிச்சைப் பிரிவை நிர்மாணித்தோம். தற்பொழுது சத்திர சிகிச்சை தீவிர சிகிச்சைப்
பிரிவு அமைக்கப்பட்டுள்ளது. மூன்றாவதாக 200 மில்லியன் ரூபா செலவில் யாழ்ப்பாண
புற்று நோய் பிரிவு நிர்மாணிக்கப்படுகிறது என்றார்.