டெல்லி: கற்பழிப்பில் இருந்து தப்பிக்க காரில் இருந்து குதித்த பெண் படுகாயம்

by **விஜய்** Sat 16 Mar 2013 - 7:52

புதுடெல்லி, மார்ச் 16-

புதுடெல்லி கரோல் பாக் பகுதியில் பணியாற்றும் 24 வயது பெண் நேற்று
முன்தினம் இரவு 11 மணியளவில் வேலை முடிந்து பிரேம் நகரில் உள்ள தனது
வீட்டிற்கு சென்றுக் கொண்டிருந்தார்.
அமன் விகார் பகுதியில் அவர் நடந்து சென்ற போது, வேகமாக வந்த காரில் இருந்து
இறங்கிய 2 பேர் அவரை பலவந்தமாக காருக்குள் இழுத்துப் போட்டனர்.

காருக்குள்ளேயே அவரை கற்பழிக்க முயன்றவர்களின் பிடியில் இருந்து தன்னை
விடுவித்துக் கொண்ட அவர், சமயோஜிதமாக காரின் கதவை திறந்து சாலையில்
குதித்தார்.

காரின் பின்பக்க சக்கரம் அவர் கால் மீது ஏறியதால், காலில் பலத்த காயமடைந்து
எழுந்திருக்க முடியாமல் தவித்த அவர் மீது காரை ஏற்றிக் கொல்ல
கடத்தல்காரர்கள் முயன்றனர்.

அந்த பெண்ணின் கூச்சல் கேட்டு அங்கே பொதுமக்கள் கூடி விட்டதால், கடத்த முயன்றவர்கள் காரில் மின்னல் வேகத்தில் பறந்து தலைமறைவாகினர்.
காயமடைந்த பெண்ணை சப்தர்ஜங் ஆஸ்பத்திரியில் பொதுமக்கள் அனுமதித்தனர்.

அவர் அளித்த வாக்குமூலத்தின்படி, அந்த பெண்ணுக்கு ஏற்கனவே தெரிந்த நபர்களான
குல்தீப் (24), தீபக் (19) ஆகியோரை போலீசார் நேற்று கைது செய்தனர்.