கூகுள் ஆண்டிராய்டு சாப்ட்வேரை தலைமையேற்று நடத்த தமிழகத்தை சேர்ந்தவர் நியமனம்.......

அமெரிக்காவின் கலிபோர்னியா மாகாணத்தை தலைமையிடமாகக் கொண்டு இயங்கிவரும் கூகுள் கம்பெனியின் ஒரு பிரிவுதான் விற்பனை உலகில் கொடிகட்டிப் பறக்கும் ஆண்டிராய்டு மொபைல் போன்கள். இந்த வகை போன்களை வடிவமைத்தவர் என்று புகழப்படும் ஆண்டி ரூபின் என்ற அமெரிக்கர் இதன் தலைமைப் பொறுப்பை வகித்து வந்தார்.

தங்களின் அனைத்து சாப்ட்வேர் பிரிவுகளையும் ஒன்றாக இணைக்கவிருப்பதால், ஆண்டி ரூபின் பதவி விலகுகிறார் என்ற அறிவிப்பை கூகுள் நிறுவனம் நேற்று வெளியிட்டது. மேலும், அவர்களின் குரோம் வெப் பிரௌசர், கூகுள் டிரைவ், ஆப்ஸ் மற்றும் ஜி-மெயில் இவற்றின் நிர்வாகப் பொறுப்பில் இருக்கும் சுந்தர் பிச்சை என்ற தமிழரை ராபினின் பதவியில் நியமித்துள்ளது. இந்த முடிவின் மூலம் கம்பெனியின் தலைமையில் இருந்துவந்த நீண்டநாள் குழப்பம் தீர்க்கப்பட்டுள்ளது.

சுந்தர் பிச்சையின் வழிகாட்டுதலில், கூகுள், குரோம் சிஸ்டம் பயன்பாட்டில் பல கம்ப்யூட்டர் வெளியீடுகளை அளித்துள்ளது. சென்ற மாதம் இவர், குரோம் புக் பிக்சல் என்று பெயரிடப்பட்ட குரோம் கணினிப் பயன்பாட்டுடனும், தொடுதிரையுடனும் கூடிய ஒரு லேப்-டாப்பை வெளியிட்டார்.

ஆண்டிராய்டு மற்றும் குரோம் தொழில்நுட்பங்கள் ஒன்று சேர்ப்பதற்கான வழி இது என்று வல்லுனர்கள் கருதுகின்றனர். ஆயினும், ஆண்டிராய்டின் பிரபலத்தையும் தாண்டி, குரோம் தொழில்நுட்பமே கம்பெனியின் முதன்மையான யுக்தியாகத் தெரிகிறது.

மாலைமலர்