இத்தாலி சிறைகளில் வாடும் 109 இந்தியர்கள்: இந்திய அரசு மீட்குமா?

by *சம்ஸ் Wed 20 Mar 2013 - 10:12

புதுடெல்லி, மார்ச் 20-

இந்தியர்கள் பலர் இத்தாலி நாட்டுக்கு வேலைக்கு சென்றுள்ளனர். அவர்களில் 109 இந்தியர்கள் பல்வேறு வழக்கு காரணமாக இத்தாலிய சிறைகளை வாடிவருகின்றனர். என்றாலும் அங்கு சிறையில் இருப்பவர்கள் எண்ணிக்கை 700 இருக்கலாம் என்று கூறப்படுகிறது. இவர்கள் மீது திருட்டு, கொலை, சட்டத்திற்கு புறம்பாக குடியேறியது, வன்முறையில் ஈடுபட்டது போன்ற பலவழக்குகள் போடப்பட்டுள்ளன.

பொதுவாக வெளிநாடுகளில் தங்கள் நாட்டு மக்கள் சிறையில் அடைக்கப்பட்டால், குடிமக்களை காப்பாற்ற சம்பந்தப்பட்ட நாடு நடவடிக்கை எடுக்கும். ஆனால் இத்தாலி சிறையில் வாடிவரும் இந்தியர்களைக் காப்பாற்ற இந்திய அரசாங்கம் இதுவரை போதிய நடவடிக்கைகளை எடுக்கவில்லை என்று குற்றச்சாட்டு எழுந்துள்ளது.

2010-ம் ஆண்டு இந்திய நாடாளுமன்ற மாநிலங்கள் அவையில் இத்தாலி சிறைகளில் வாடும் இந்தியர்கள் பற்றி கேள்வி எழுப்பப்பட்டது. இதற்கு பதில் அளித்த அரசு, 'இத்தாலி அரசாங்கம் இந்திய கைதிகள் குறித்த விபரங்களை வெளியிட மறுத்து விட்டதாக கூறியது'. இதன் பிறகு இந்தியர்களுக்கு உதவி செய்ய இந்திய அரசு எவ்வித முயற்சிகளிலும் ஈடுபடவில்லை. இது குறித்து டெல்லியைச் சேர்ந்த வழக்கறிஞர் அவிசிங் கூறியதாவது:-

இந்திய அரசாங்கத்தின் செயல்பாடு ஆச்சரியமாக இருக்கிறது. இத்தாலிய கப்பல் சிப்பந்திகள் கைது விவகாரத்தில் இந்தியா தன்னை விட்டுக்கொடுத்து விட்டது. கைது செய்யப்பட்டு அங்கு சிறையில் வாடும் இந்தியர்கள் குறித்த எந்த விபரத்தையும் இத்தாலிய அரசு அளிக்க மறுத்ததால், இந்தியா தனது குடிமக்களையும் விட்டுக்கொடுத்து விட்டது.

இவ்வாறு அவர் கூறினார்.

இது குறித்து வடக்கு இத்தாலி இந்தியர்கள் சங்கத்தின் தலைவர் நந்தகுமார் கூறியதாவது:-

இத்தாலியர்கள், இந்தியர்களை கைது செய்யும் போது நமது தூதரகம் குறுக்கிட்டு எந்த நடவடிக்கைகளையும் மேற்கொண்டதில்லை. அந்த நாட்டு சிறையில் இருக்கும் இந்தியர்களுக்காக இந்திய தூதரகம் எப்போதாவது சில வழக்குகளை எடுத்து நடத்துகிறது. பிரச்சினையில் இருக்கும் இந்தியர்கள், அவர்களே தங்களைப் பாதுகாத்துக் கொள்ள வேண்டிய நிலைமை தான் உள்ளது.

இவ்வாறு அவர் கூறினார்.