ஆவடி: காவலாளியை கட்டிப் போட்டு ஏ.டி.எம். எந்திரத்தில் கொள்ளை முயற்சி

ஆவடி, மார்ச். 29-

ஆவடி கேம்ப் ரோட்டில் செயின்ட் பீட்டர்ஸ் என்ஜினீயரிங் கல்லூரி எதிரில் எச்.டி.எப்.சி. வங்கியின் ஏ.டி.எம். உள்ளது. இங்கு அயப்பாக்கத்தை சேர்ந்த கோபால் என்பவர் காவலாளியாக பணி புரிந்து வருகிறார். நேற்று நள்ளிரவு 2 மணியளவில் ஏ.டி.எம். மையத்தினுள் அவர் படுத்து தூங்கிக் கொண்டிருந்தார். அப்போது முகமூடி கொள்ளையர்கள் 2 பேர் ஏ.டி.எம். மையத்தில் புகுந்தனர்.

தாங்கள் வைத்திருந்த இரும்புக் கம்பியால் ஏ.டி.எம். எந்திரத்தின் முன் பகுதியை உடைத்தனர். சத்தம் கேட்டு கோபால் திடுக்கிட்டு எழுந்து கூச்சல் போட்டார். உடனே கொள்ளையர்களில் ஒருவன் அவரது மேல் ஏறி அமர்ந்து கொண்டு வாயில் துணியை திணித்தான். பின்னர், தயாராக வைத்திருந்த வயரால் கோபாலை கட்டிப்போட்டான்.

இதன் பிறகு 2 கொள்ளையர்களும் ஏ.டி.எம். எந்திரத்தை மேலும் உடைத்து பணத்தை கொள்ளையடிப்பதில் தீவிரம் காட்டினர். எந்திரத்தின் வெளிப்பகுதியை எளிதாக உடைத்து விட்டு அவர்களால் லாக்கர் இருக்கும் பகுதியை உடைக்க முடியவில்லை. இதனால் ஏமாற்றமடைந்த கொள்ளையர்கள் அங்கிருந்து தப்பிச் சென்றனர். லட்சக் கணக்கான ரூபாய் தப்பியது.

இன்று காலை 6 மணிக்கு இன்னொரு காவலாளியான சுப்பிரமணி பணிக்கு வந்தார். அப்போது கோபால் வாயில் துணி அமுக்கப்பட்ட நிலையில் கட்டி போடப்பட்டிருப்பதை கண்டு கடும் அதிர்ச்சியடைந்த அவர் போலீசுக்கு தகவல் கொடுத்தார். ஆவடி போலீஸ் இன்ஸ்பெக்டர் சிவக்குமார் மற்றும் போலீசார் விரைந்து சென்று கோபாலின் வாயில் இருந்த துணியை எடுத்து அவரை மீட்டனர்.

பின்னர் கொள்ளை சம்பவம் குறித்து அவரிடம் விசாரணை நடத்தினர். கொள்ளையர்கள் கைவரிசை காட்டிய சுமார் 30 நிமிடங்களுக்கு முன்னர்தான் சப்-இன்ஸ்பெக்டர் தேவராஜ் அந்த வழியாக ரோந்து சென்றுள்ளார். ஏ.டி.எம். மையத்தில் தொங்க விடப்பட்டுள்ள ரோந்து புத்தகத்திலும் அவர் கையெழுத்து போட்டுள்ளார்.

இதன் பிறகுதான் முகமூடி கொள்ளையர்கள் மிகவும் துணிச்சலாக ஏ.டி.எம். மையத்தில் புகுந்துள்ளனர். அங்கு பொறுத்தப்பட்டிருந்த கண்காணிப்பு கேமராவை போலீசார் போட்டுப் பார்த்தனர். அதில் சப்-இன்ஸ்பெக்டர் தேவராஜ் கையெழுத்து போடுவது வரையில் காட்சிகள் பதிவாகி உள்ளது. அதன் பின்னர் கொள்ளையர்கள் உள்ளே நுழைவது, ஏ.டி.எம். எந்திரத்தை உடைப்பது போன்ற காட்சிகள் எதுவும் பதிவாகவில்லை.

எனவே கொள்ளையர்கள் துணியை போட்டு கேமராவை மூடி வைத்துவிட்டு கொள்ளை முயற்சியில் ஈடுபட்டிருக்கலாம் என்று போலீசார் சந்தேகிக்கிறார்கள். தப்பி ஓடிய கொள்ளையர்களை பிடிக்க தனிப்படைகள் அமைக்கப்பட்டு தேடுதல் வேட்டை முடுக்கி விடப்பட்டுள்ளது.

:+

எடிஎம்மில் பணம் இருப்பதும் ஒரு பெட்டியில் பணத்தைப் போட்டு ரோட்ல வைக்கிறதும் ஒன்னு தான் போல 2 க்கும் வித்தியாசமில்ல