விளக்கும் விடியலும்..!

by **முfதாக்** Sun 31 Mar 2013 - 13:24

விளக்கினைத் தூண்டி விட்டு
விடியல் ஒளிந்து கொள்கிறது
மேக மோகத்தின் எச்சங்களாக
கிழித்து வீசப்படும் மின்னல்கள்
புது வழி காட்டி மறைகின்றன

ஒரு கூடை மின்மினிகளினை
ஒன்றாக்க விட்டில்கள்
விளக்குகள் என எண்ணி
விரைந்து வருகிறது அதன் பக்கமாக
விட்டில்கள் வெள்ளி அறியுமா ?

சூரியனோடு மறுபக்கமாய்ச்
சுழற்றப்பட்ட பகலும்
இரவிற்குள் புகுந்து கொள்ள
சுழன்று கொண்டே சுற்றுகிறது
நுணுக்கமானதொரு அசைவில்

ஒரு கோட்டில் பயணிக்கும்
கோள அசைவினைக் குலைத்துவிட
வால்வெள்ளி வேகமாய்ப் பயணிக்கிறது
பாதை விலகிய புதுப் பாதையில்
சமாந்தரப் பாதையிலே சற்று சறுக்கி

சமாந்தரங்கள் சரிந்ததால்
கோடுகள் கோணங்களாகிவிட
சந்திக்கும் புள்ளியில் விளக்கு
தூண்டப்படும் ஆளி அழுத்தப்பட
விளக்குகள் விடியல்களாகின்றன மீண்டும்