2 ஜி அலைக் கற்றை ஒதுக்கீடு விவகாரம் :விசாரணைக்கு ராசாவை அழைக்காதது ஏன்?

by **நண்பன்** Wed 3 Apr 2013 - 6:42

2 ஜி அலைக்கற்றை ஒதுக்கீட்டில் நடந்த முறைகேடு பற்றி விசாரித்து வரும் பாராளுமன்ற கூட்டுக்குழு ஆ. ராசாவை விசாரணைக்கு அழைக்காதது குறித்து பிரதமர் மன்மோகன் சிங்குக்கு கடிதம் எழுதப் போவதாக அந்த குழுவின் உறுப்பினரான யஷ்வந்த் சின்கா அறிவித்து உள்ளார்.

2 ஜி அலைக்கற்றை இலை வரிசை ஒதுக்கீட்டில் அரசுக்கு ரூ. 1. இலட்சத்து 76 ஆயிரம் கோடி இழப்பு ஏற்பட்டதாக மத்திய கணக்கு தணிக்கை அதிகாரியின் அறிக்கையில் கூறப்பட்டு உள்ளது. இந்த வழக்கில் குற்றம் சாட்டப்பட்டுள்ள முன்னாள் தொலைத் தொடர்புத் துறை மந்திரி ஆ. ராசா உள்ளிட்டோர் மீதான வழக்கை உச்ச நீதிமன்றத்தின் மேற்பார்வை யில் சி.பி.ஐ. தனி நீதிமன்றம் விசாரித்து வருகிறது. மேலும், இதுபற்றி காங்கிரஸ் கட்சியை சேர்ந்த பி.சி. சாக்கோ தலைமை யிலான பாராளுமன்ற கூட்டுக்குழுவும் தனியாக விசாரணை நடத்தி வருகிறது. இந்த வழக்கில் தொடர்புடைய பலருக்கு, கூட்டுக்குழு அழைப்பாணை அனுப்பி அவர்களிடம் விசாரணை நடத்தியது.

ஆ. ராசாவும் கூட்டுக்குழுவின் முன்பு நேரில் ஆஜராகி தனது தரப்பு விளக்கத்தை தெரிவிக்க விரும்பினார்.

இது தொடர்பாக கூட்டுக்குழுவின் தலைவர் பி.சி. சாக்கோவுக்கு அவர் கடிதங்கள் எழுதினார். ஆனால் அதற்கு அனுமதி வழங்க மறுத்துவிட்ட பி.சி. சாக்கோ, சில கேள்விகளை மட்டும் ஆ. ராசாவுக்கு அனுப்பி வைத்தார். அவற்றுக்கு ஆ. ராசா எழுத்து மூலமாக பதில் அனுப்பினார். அவரது பதில் சமீபத்தில் கூட்டுக்குழு உறுப்பினர்களுக்கு வழங்கப்பட்டது.

விசாரணைக்குழு ஆ. ராசாவை கூட்டுக்குழு நேரில் அழைக்காத தற்கு அந்த குழுவில் உள்ள பாரதீய ஜனதா மற்றும் இடதுசாரி கட்சிகளின் உறுப்பினர்கள் ஏற்கனவே எதிர்ப்பு தெரிவித்து இருந்தனர்.

இந்த நிலையில், கூட்டுக்குழுவின் உறுப்பினரும், பாரதீய ஜனதா மூத்த தலைவர்களில் ஒருவருமான யஷ்வந்த் சின்கா நேற்று முன்தினம் டில்லியில் நிருபர்களுக்கு அளித்த பேட்டியில் கூறியதாவது,

விசாரணைக்கு ஆ. ராசாவை நேரில் அழைக்காதது கூட்டுக்குழு விசாரணையில் உள்ள மிகப் பெரிய குறைபாடு ஆகும். தனது தரப்பிலான கருத்துக்களை கூட்டுக்குழுவிடம் நேரில் தெரிவிக்கும் உரிமை ஆ. ராசாவுக்கு உள்ளது.

விசாரணைக்கு தன்னை நேரில் அழைக்குமாறு கோரி பி.சி. சாக்கோவுக்கு ஆ. ராசா மூன்று அல்லது நான்கு முறை கடிதம் எழுதி இருக்கிறார். ஆனால் அந்த கடிதங்கள் கிடைக்கப் பெற்றதாக மட்டும் தனது பதிலில் தெரிவித்துள்ள பி.சி.சாக்கோ, விசாரணைக்காக அவரை நேரில் அழைப்பது பற்றி எதுவும் குறிப்பிடவில்லை.

2ஜி அலைக் கற்றை அலைவரிசை ஒதுக்கீட்டில் நடந்தது என்ன? என்பது பற்றிய உண்மையை விசாரித்து கண்டு அறிவதற்காகத்தான் பாராளுமன்ற கூட்டுக்குழு அமைக்கப்பட்டது. ஆனால் ஆ. ராசாவை விசாரணைக்கு அழைக் காததை வைத்து பார்க்கும்போது, மத்திய அரசு உண்மையை வெளிக்கொண்டு வருவதற்காக கூட்டுக்குழுவை அமைத்ததா? அல்லது உண்மையை மூடி மறைப்பதற்காக அமைத்ததா? என்ற சந்தேகம் எனக்கும் குழுவில் உள்ள சில உறுப்பினர்களுக்கும் ஏற்பட்டு உள்ளது.

இது மிகவும் முக்கியமான பிரச்சினை ஆகும். எனவே இதுகுறித்து பிரதமர் மன்மோகன் சிங்குக்கும், பாராளுமன்ற சபாநாயகர் மீராகுமாருக்கும் நான் கடிதம் எழுத இருக்கிறேன்.

கூட்டுக்குழுவின் முன்பு ஆஜராகி சாட்சியம் அளிக்க விரும்ப தயாராக இருப்பவர்களுக்கு அதற்கான வாய்ப்பு அளிக்கப்பட வேண்டும்.

சாட்சியம் அளிக்க விரும்புகிறவர்களை விசாரணைக்கு அழைக்காவிட்டால் கூட்டுக்குழு அமைக்கப்பட்டதன் நோக்கம் நிறைவேறாது என்பதையும் அவர்களுக்கு தெரிவிக்க இருக்கிறேன். இவ்வாறு யஷ்வந்த் சின்கா கூறினார்.

தினகரன்..