ஊட்டி தாவரவியல் பூங்காவில் 150 வயது ராட்சத யூகலிப்டஸ் மரம்

ஊட்டி, மார்ச். 3-

நீலகிரி மாவட்டம் சுற்றுலா பயணிகளின் சொர்க்க பூமியாகத் திகழ்கிறது. இங்கு நிலவும் இதமான தட்பவெப்ப நிலை சுற்றுலா பயணிகளை சுண்டி இழுக்கிறது. ஊட்டிக்கு வருவோர் முதலில் கண்டு மகிழ்வது அங்குள்ள தாவரவியல் பூங்காவைத்தான்.

இங்கு உள்ளத்தை கொள்ளை கொள்ளும் வண்ண வண்ண மலர்கள் பூத்துக் குலுங்குகின்றன. பூங்கா முழுவதும் பச்சை பட்டு விரித்தாற் போன்று காட்சியளிக்கும் மெத்தை போன்ற புல்தரையும் சிறியவர் முதல் பெரியவர் வரை அனைவரின் உள்ளத்திலும் இடம் பிடித்துள்ளது.

தாவரவியல் பூங்காவில் உள்ள செடிகள், மரங்களை பார்க்கும் சுற்றுலா பயணிகள் இப்படி எல்லாம் மரம், செடி, கொடி இருக்கிறதா? என்று வியந்து போகிறார்கள். மேலும் இந்த பூங்கா தாவரவியல் படிக்கும் மாணவர்கள் மற்றும் ஆராய்ச்சி செய்பவர்களுக்கும் களமாக விளங்குகிறது.

தாவரவியல் பூங்காவில் 40 மீட்டர் உயரமும் 12.5 மீட்டர் சுற்றளவும் கொண்ட ராட்சத யூகலிப்டஸ் மரம் உள்ளது. இந்த மரத்தை 8 பேர் கைகோர்த்து நின்றால்தான் கட்டிப்பிடிக்க முடியும். திருமலைநாயக்கர் மஹால் தூண்களை எல்லாம் மிஞ்சும் வகையில் இந்த யூகலிப்டஸ் மரம் காட்சி அளிக்கிறது.

இந்த மரத்தை பார்க்கும் பயணிகளின் உள்ளத்தில் இந்த மரத்துக்கு எத்தனை வயது இருக்கும்? என்ற இமாலய கேள்வி எழுவதுண்டு. அந்த கேள்விகளுக்கு பதில் அளிக்கும் வகையில் `ராட்சத யூகலிப்டஸ் மரத்துக்கு வயது 150' என்று அதிகாரப்பூர்வ தகவல் வெளியாகி இருக்கிறது.

இந்த மரம்தான் நீலகிரியில் உள்ள மரங்களில் அதிகம் வயது உடையது என்றும் ஆராய்ச்சியாளர்கள் உறுதி செய்துள்ளனர். இதுகுறித்து கோவை பாரதியார் பல்கலைக்கழகத்தின் தாவரவியல் பேராசிரியர் ராமச்சந்திரன் கூறும் போது,

நீலகிரி மாவட்டத்தில் ஊட்டி மற்றும் குன்னூர் பகுதிகளில் 120 வயது யூகலிப்டஸ் மரங்கள் ஏராளம் உள்ளன. தாவரவியல் பூங்காவில் உள்ள இந்த ராட்சத யூகலிப்டஸ் மரத்துக்கு 150 வயதுக்கு அதிகமாக இருக்குமே தவிர குறைவதற்கு வாய்ப்பில்லை. இதுதான் நீலகிரி மாவட்டத்தில் உள்ள மரங்களில் அதிக வயதுடையதாகும் என்றார்.

ஊட்டி தாவரவியல் பூங்காவின் தோட்டக்கலைத்துறை துணை இயக்குனர் ராம்சுந்தரிடம் மரத்தின் வயது பற்றி கேட்டபோது ராட்சத யூகலிப்டஸ் மரம் தாவரவியல் பூங்காவின் மேல் பகுதியில் உள்ளது. தாவரவியல் பூங்காவில் பராமரிக்கப்படும் தஸ்தாவேஜுகளின் அடிப்படையில் பார்க்கும் போது இந்த மரத்துக்கு 157 வயது இருக்கலாம் என்பது தெரிய வருகிறது என்றார்.

ராட்சத யூகலிப்டஸ் மரத்தை தாவரவியல் பூங்காவுக்கு வரும் சுற்றுலா பயணிகள் கண்டு வியந்து செல்கிறார்கள்.

:”@: