வளசரவாக்கத்தில் தாயை கொலை செய்த வாலிபர்

by *சம்ஸ் Thu 4 Apr 2013 - 8:13

பூந்தமல்லி, ஏப். 4-

மாங்காடு அருகே உள்ள பரணிபுத்தூரை சேர்ந்தவர் ஆறுமுகம். இவர் ஏற்கனவே இறந்து விட்டார். இவரது மனைவி கற்பகம் (63). வேலு (36), சங்கர் (34) என்ற 2 மகன்கள் உள்ளனர். கணவர் இறந்த பின்னர், கற்பகம் வீட்டு வேலைகளை பார்த்து குடும்பத்தை கவனித்து வந்தார்.

பரணிபுத்தூரில் அரை கிரவுண்டில் இவர்களுக்கு சொந்தமான வீடு உள்ளது. இந்த வீட்டை விற்று பணம் தருமாறு இளைய மகன் சங்கர், கற்பகத்திடம் கேட்டு வந்தார். ஆனால் அவர் இதற்கு சம்மதிக்கவில்லை.

கடந்த சில மாதங்களாக இதுதொடர்பாக 2 பேருக்கும் இடையே அடிக்கடி தகராறு ஏற்பட்டு வந்துள்ளது. 2 நாட்களுக்கு முன்னர் சங்கர், தாய் கற்பகத்திடம், நான் சொல்கிறபடி கேட்காவிட்டால் உன்னை கொல்லாமல் விடமாட்டேன் என்று எச்சரித்துள்ளார். பின்னர், கத்தியால் அவரை குத்துவதற்கும் முயற்சித்துள்ளார். அப்போது அதில் இருந்து கற்பகம் தப்பித்து விட்டார்.

வளசரவாக்கம் காந்தி நகர் 2-வது தெருவில் அடுக்குமாடி குடியிருப்பு ஒன்றில் வீட்டு வேலைகளை செய்து வந்த கற்பகம் இதற்காக தினமும் அதிகாலை 5 மணிக்கே அங்கு சென்று விடுவார். வேலைகளை முடித்து விட்டு 6 மணிக்கு பின்னர் வீட்டுக்கு திரும்புவார்.

இன்று காலை வழக்கம் போல, கற்பகம் வளசரவாக்கம் குடியிருப்பில் வேலைகளை முடித்து விட்டு காந்தி நகரில் நடந்து சென்று கொண்டிருந்தார். அப்போது அங்கு வந்த சங்கர், கற்பகத்திடம் எப்போது வீட்டை விற்று பணம் தரப்போகிறாய் என்று கேட்டுள்ளார். இதற்கு அவர் சரியாக பதில் கூறாமல் சென்றுள்ளார்.

இதனால் ஆத்திரத்துடன் கற்பகத்தை பின் தொடர்ந்து சென்ற சங்கர் அவருடன் கடுமையான வாக்குவாதத்தில் ஈடுபட்டார். திடீரென தான் மறைத்து வைத்திருந்த கத்தியை எடுத்து, பெற்ற தாய் என்றும் பாராமல் கற்பகத்தை சரமாரியாக குத்தினார்.

இதில் வயிறு மற்றும் நெஞ்சு பகுதியில் கத்தி குத்து பட்டு ரத்தம் கொட்டியது. வலி தாங்க முடியாமல் அலறி துடித்த அவர் சம்பவ இடத்திலேயே ரத்த வெள்ளத்தில் சுருண்டு விழுந்து பலியானார்.

திட்டம் போட்டு துரத்தி வந்து இக்கொடூர கொலையை செய்த சங்கர் அப்பகுதியில் வீட்டு வாழைத்தோட்டம் ஒன்றில் கத்தியை வீசிவிட்டு தப்பினார்.

இதுபற்றி தகவல் கிடைத்ததும் வளசரவாக்கம் போலீசார் விரைந்து சென்று கற்பகத்தின் உடலை மீட்டு சென்னை அரசு ஆஸ்பத்திரிக்கு பிரேத பரிசோதனைக்காக அனுப்பி வைத்தனர். கொலையாளி சங்கர் வீசிச்சென்ற கத்தியும் பறிமுதல் செய்யப்பட்டது. பின்னர் அதே பகுதியில் மறைவான இடத்தில் பதுங்கி இருந்த சங்கர் போலீசில் சிக்கினார். இச்சம்பவம் அப்பகுதியில் பரபரப்பை ஏற்படுத்தியுள்ளது.

மாலைமலர்