ஜனாதிபதியால் கருணை மனு நிராகரிக்கப்பட்ட 8 பேரை தூக்கில் போட சுப்ரீம் கோர்ட்டு தடை

புதுடெல்லி, ஏப். 7-

ஜனாதிபதியால் கருணை மனு நிராகரிக்கப்பட்ட 8 பேரை தூக்கில் போட சுப்ரீம் கோர்ட்டு 4 வாரங்களுக்கு தடை விதித்துள்ளது. பல்வேறு மாநிலங்களைச் சேர்ந்த கொடிய கொலை குற்றங்களை செய்த தூக்குத் தண்டனை கைதிகளான சோனியா அவரது கணவர் சஞ்சீவ், குர்மீத் சிங், பிரவீண்குமார், சுந்தர் சிங், ஜாபர்அலி, சுரேஷ், ராம்ஜி ஆகியோர் ஜனாதிபதிக்கு கருணை மனு அனுப்பினார்கள்.

நீண்ட வருடங்களாக அவை பரிசீலனையில் இருந்து வந்தது. இந்த நிலையில் 8 பேர் கருணை மனுக்களையும் ஜனாதிபதி பிரணாப்முகர்ஜி சில நாட்களுக்கு முன் நிராகரித்தார். இதையடுத்து அவர்களை தூக்கில் போடுவதற்கான ஏற்பாடுகளை அந்தந்த மாநில சிறைத்துறை அதிகாரிகள் செய்து வந்தனர்.

இதை எதிர்த்து மக்கள் உரிமை குழு மற்றும் ஜன நாயக உரிமைக்கான மக்கள் குழு சார்பில் மூத்த வக்கீல் கொலின் கோன்சால் வேஸ் சுப்ரீம் கோர்ட்டில் அப்பீல் செய்தார். நீதிபதி சதாசிவம் வீட்டில் நேற்று இரவு இந்த மனுவை தாக்கல் செய்தார்.

அதில் அவர் கூறியிருப்பதாவது:-

பஞ்சாப் தூக்கு தண்டனை கைதி தேவேந்தர்பால்சிங் புல்லரின் கருணை மனுவை ஜனாதிபதி நீண்ட தாமதத்துக்குப்பின் நிராகரித்ததை எதிர்த்து சுப்ரீம் கோர்ட்டில் மனுதாக்கல் செய்தார். இந்த வழக்கில் தண்டனையை நிறைவேற்ற தடை விதிக்கப்பட்டுள்ளது. இதே காரணத்தை மேற்கோள் காட்டி வீரப்பன் கூட்டாளிகள் 4 பேரின் கருணை மனு நிராகரிக்கப்பட்டதை எதிர்த்து சுப்ரீம் கோர்ட்டில் தொடரப்பட்ட வழக்கிலும் தண்டனையை நிறைவேற்ற தடை விதித்துள்ளது. இதேபோல் தற்போது 8 பேரின் கருணை மனுக்களும் 3 ஆண்டில் இருந்து 12 வருடத்துக்குப்பின்புதான் நிராகரிக்கப்பட்டுள்ளது. எனவே இவர்களுக்கு தண்டனையை நிறைவேற்ற தடைவிதிக்க வேண்டும்.

இவ்வாறு மனுவில் கூறியுள்ளார்.

மனுவை நீதிபதிகள் சதாசிவம், எம்.ஒய். இக்பால் ஆகியோர் கொண்ட டிவிஷன் பெஞ்ச் உடனே விசாரணைக்கு ஏற்றுக் கொண்டு 8 பேரையும் தூக்கிலிடுவதற்கு 4 வாரங்கள் தடைவிதித்து உத்தரவிட்டனர். 8 பேரின் கருணை மனுக்கள் நிராகரிக்கப்பட்ட தகவலை அவர்களது குடும்பத்தினருக்கு மத்திய - மாநில உள்துறை அமைச்சகங்கள் மூலம் தெரிவிக்கப்பட்டதா? என்பது குறித்து பதில் அளிக்குமாறு நோட்டீஸ் அனுப்ப நீதிபதிகள் உத்தரவிட்டனர். மேலும் போலீஸ் மற்றும் சிறைதுறை நிர்வாகங்களுக்கும் விளக்கம் கேட்டு நோட்டீஸ் அனுப்ப நீதிபதிகள் உத்தரவிட்டனர்.

கருணை மனு நிராகரிக்கப்பட்ட 8 பேரில் சோனியா - சஞ்சீவ் இருவரும் கணவன் - மனைவி ஆவார்கள். 2001-ம் ஆண்டு சோனியாவின் பெற்றோர் உள்பட தங்கள் குடும்பத்தைச் சேர்ந்த 8 பேரை சொத்து தகராறில் கொலை செய்த குற்றத்துக்காக தூக்கு தண்டனை விதிக்கப்பட்டது. மற்றொரு கைதியான குர்மீத் 1986-ல் தனது குடும்பத்தைச் சேர்ந்த 13 பேரையும், ஜாபர் அலி என்பவர் தனது மனைவி மற்றும் 5 மகள்களையும் கொலை செய்தவர்கள். மற்ற இரு தூக்கு கைதிகளான சுரேஷ் - ராம்ஜி அண்ணன் தம்பிகள் ஆவார்கள். தங்களது மற்ற 5 சகோதரர்களை கொன்றதாக இருவருக்கும் தூக்கு தண்டனை விதிக்கப்பட்டது.

மாலைமலர்.

காலம் கடத்தினால் இப்படித்தான் தண்டனை உடனே கொடுங்க #.