ரெயில்களில் கரப்பான்பூச்சி, எலிகளை ஒழிக்க ரூ. 3 கோடி ஒதுக்கீடு

by *சம்ஸ் Sun 7 Apr 2013 - 8:53

நெல்லை, ஏப். 7-

நெல்லை சந்திப்பு ரெயில் நிலையத்தில் புதிய நடை மேம்பாலம் அமைக்கப்பட்டுள்ளது. அதன் திறப்பு விழாவில் மதுரை கோட்ட மேலாளர் ஏ.கே.ரஸ்தோகி கூறியதாவது:-

நெல்லை ரெயில் நிலையத்தின் முதல் மற்றும் 2-வது பிளாட்பாரங்களில் பயணிகள் வசதிக்காக நகரும் படிக்கட்டுகள் அமைக்கப்படும். இதற்கான டெண்டர் விடப்பட்டு ஒரு மாதத்தில் பணிகள் தொடங்கும்.

இந்தியா முழுவதும் 100 ரெயில் நிலையங்களில் நகரும் படிக்கட்டுகள் அமைக்கப்படவுள்ளன. ரெயில் பெட்டிகளில் கரப்பான் பூச்சி மற்றும் எலி தொல்லையை ஒழிக்க மதுரை கோட்டத்திற்கு ரூ.3 கோடி ஒதுக்கீடு செய்யப்பட்டுள்ளது. அதன் மூலம் அவற்றை ஒழிப்பதற்கான நடவடிக்கைகள் எடுக்கப்படும்.

நெல்லை -செங்கோட்டை கூடுதல் பயணிகள் ரெயில், பட்ஜெட்டில் அறிவிக்கப்பட்ட நெல்லை-மும்பை தாதர் எக்ஸ்பிரஸ் ரெயில் ஆகியவற்றை விரைவில் இயக்க நடவடிக்கை எடுக்கப்பட்டுள்ளது. அதற்கான பெட்டிகள் வந்ததும் உடனடியாக இயக்கப்படும்.

மதுரை -நெல்லை இரட்டை ரெயில்பாதை சர்வேபணி தீவிரமாக நடந்து வருகிறது. நெல்லை ரெயில் நிலையத்தில் கூடுதல் ரெயில் பெட்டிகள் பராமரிப்பு மையம் அமைக்க நடவடிக்கை எடுக்கப்படும்.

இவ்வாறு அவர் கூறினார்.

மாலைமலர்