விருதுநகரில் கோர்ட்டு தடை ஆணையை மறைத்து வீட்டை ஏலம் விட்ட 3 பேர் மீது வழக்கு

by *சம்ஸ் Sun 14 Apr 2013 - 7:43

விருதுநகர், ஏப். 14-

விருதுநகரில் கோர்ட்டு தடையை மறைத்து வீட்டை ஏலம் விட்டதாக கூட்டுறவு வங்கி அதிகாரிகள் உள்பட 3 பேர் மீது வழக்குப்பதிவு செய்யப்பட்டுள்ளது.

விருதுநகர் கசாப்புக்கார தெருவை சேர்ந்த சொர்ணம்மாள், விருதுநகர் நகர கூட்டுறவு வங்கியில் கடன் வாங்கி வீடு கட்டினார். இதில் கடன் தொகையில் ரூ.14 லட்சம் பாக்கி வைத்ததால் வீட்டை ஏலம்விட வங்கி திட்டமிட்டது.

இதற்காக 2011-ம் ஆண்டு நவம்பர் 26-ம் தேதி வீட்டை ஏலம் விடப்போவதாக அறிவித்தனர். இதனை தொடர்ந்து சொர்ணம்மாள் ஐகோர்ட்டில் வீட்டை ஏலம்விட தடைபெற்றார். ஆனால் இந்த தடை ஆணையை மறைத்து நகர கூட்டுறவு வங்கி வீட்டை ஏலம் விட்டுள்ளது. இதனை ரூ.25 லட்சத்து 60 ஆயிரத்துக்கு விருதுநகர் பெரியசாமி என்பவர் ஏலம் எடுத்து ஓய்வு பெற்ற ஆசிரியரான போஸ் என்பவருக்கு ரூ.27 லட்சத்து 60 ஆயிரத்துக்கு விற்றுவிட்டார்.

இந்த நிலையில் கடந்த ஆண்டு நவம்பர் 6-ம் தேதி ஆசிரியர் போஸை தொடர்பு கொண்ட நகர கூட்டுறவு வங்கி ரூ.25 லட்சத்து 60 ஆயிரம் கொடுத்து ஏலத்தை ரத்து செய்துவிட்டதாக கூறி வீட்டை ஒப்படைக்கும்படி கூறியது.

இதனால் அதிர்ச்சி அடைந்த போஸ் தனக்கு ரூ.6 லட்சம் நஷ்டம் ஏற்பட்டுள்ளதாக கூறினார். மேலும் மோசடியாக வீட்டை விற்றதாக கூறி விருதுநகர் முதலாவது மாஜிஸ்திரேட்டு கோர்ட்டில் வழக்கு தொடர்ந்தார்.

இதனை தொடர்ந்து மாஜிஸ்திரேட்டு பிரீதா உத்தரவின்பேரில் விருதுநகர் போலீசார் விசாரணை நடத்தினர். கூட்டுறவு நகர வங்கியின் சிறப்பு அதிகாரி அமுதா, மேலாளர் ராஜேந்திரன், வீட்டை ஏலம் எடுத்து விற்ற பெரியசாமி ஆகியோர் மீது வழக்குப்பதிவு செய்யப்பட்டுள்ளது.