கீரிப்புள்ள- சினிமா விமர்சனம்

ஹீரோ யுவன் தன் நண்பர்களுடன் சேர்ந்து கொண்டு வழிப்பறி திருட்டு போன்றவற்றில் ஈடுபடுகிறார். பேங்கில் பணம் எடுத்துக் கொண்டு வருபவரிடம் பணத்தை அடித்துவிட்டுப் போகிறார்.தன் காதலி ஆசைப்பட்டு கேட்ட துணியை மிகப்பெரிய ஜவுளிக்கடையில் போய் ஆட்டையப் போட்டுவிட்டு வருகிறார். இவரது நண்பனின்அக்காவை, வேலை தேடி போன இடத்தில் போலீஸ் இன்ஸ்பெக்டர் ஒருவன் கெடுத்துவிட அவனை கொன்றுவிடுகிறார் யுவன். அதே நேரத்தில், யுவன் காதலியான திஷாவை, அவள் அம்மா வேறு இடத்தில் திருமணம் செய்து வைக்க முடிவு செய்ய, அது தெரிந்த யுவன் அவளை மீட்டு திருமணம் செய்து கொள்கிறான். செய்த கொலைக்காக போலீஸ் அவரை வலைவீசி தேட, அவர்களின் கையில் சிக்காமல் பெரிய மனிதர் ஒருவரிடம் அடைக்கலமாகிறார் யுவன். அந்த பெரிய மனிதரோ யுவனின்காதல் மனைவியை குறி வைக்கிறார். அவரிடமும் இருந்து தப்பிக்க முயற்சிக்கிறார்கள். ஒரு பக்கம் காவல்துறை தேட, இன்னொரு பக்கம் பெரிய மனிதர் வேஷத்தில் இருக்கும் சின்ன மனிதரின் அடியாட்கள் தேட இவர்களின் கையில் சிக்காமல் காதல் ஜோடி தப்பித்ததா? இல்லையா என்பது க்ளைமேக்ஸ்.

படத்தின் துவக்கக் காட்சியிலேயே யுவன் தன் நண்பர்களுடன் சேர்ந்து வங்கியில் பணம் எடுத்து வரும் ஒருவரிடம் பணத்தை பறித்துச் செல்கிறார். அப்போது குல்பி ஐஸ் வாங்கிசாப்பிடுகிறார் யுவன். அவர் குல்பி ஐஸ் சாப்பிட்டு முடிப்பது வரைக்கும் காட்டிக் கொண்டே இருக்கிறார்கள். விட்டா, குல்பி ஐஸ் சாப்பிடுவது எப்படின்னு பாடமே எடுப்பாங்க போலிருக்கிறது. திஷாவின் ஓப்பனிங் காட்சியில் அவர் ஓடோடி வருகிறார் அடடே பொண்ணுக்கு என்ன ஆச்சு? என்று நாம் நினைக்கும் போது, ஓடிவந்த திஷா யுவனிடம் வந்து ‘போலீஸ் வராங்க என்கிறார்’. அதற்காக திஷாவை இவ்வளவு தூரமா ஓட வைப்பீங்க? பெரோஸ்கானை சரவணனின் ஆட்களிடம் இருந்து காப்பாற்றும் சண்டைக்காட்சியில் யுவன் எல்லோரையும் புரட்டிப் புரட்டி எடுக்கிறார் யுவனுக்கு கொஞ்சமும் பொருத்தமில்லாததாக இருக்கிறது அந்த ஆக்க்ஷன் காட்சி.

திஷாவும் யுவனும் வில்லனின் வீட்டிலிருந்தும் அடியாட்களிடம் இருந்தும் தப்பித்து வரும் வேளையில் வழியில் ஒரு கோயிலைக் கண்டதும் அங்கு தொங்கிக் கொண்டிருக்கும் தாலியை எடுத்து தன் கழுத்தில் திஷா கட்டச் சொல்லும் போது, அடடா… இயக்குநர் எவ்வளவு புதுமையா (?) யோசிக்கிறாரு என்று ஆச்சரியப்பட வைக்கிறார் இயக்குநர்.



படத்தை தன் மகன் யுவனுக்காக இயக்கியிருக்கிறார் பெரோஸ்கான். படம் முழுக்க ஆக்க்ஷன் ட்ரீட்தான். யுவன் ‘சாட்டை’ படத்தில் நடித்ததன் மூலம் அவருக்கு நல்ல பெயர் கிடைத்த வேளையில் மீண்டும் ஏற்கனவே நடித்துக் கொண்டிருந்த மாதிரியான படங்களைத் தேர்ந்தெடுத்தன் மூலம் பழைய பாதைக்கே வந்திருக்கிறார். யுவன் தொடர்ந்து தமிழ் சினிமாவில் முன்னுக்கு வர,இது போன்று அப்பா இயக்கும்படம் தாத்தா இயக்கும் படங்களில் படங்களில் நடிக்காமல் புதுமுக இயக்குநர்களின் படங்களில்நடிக்க முடிவெடுப்பதுதான்யுவன் தன்னை நிலைநிறுத்திக் கொள்ள சரியான வழியாக இருக்கும். அதே போல அவரது அப்பா பெரோஸ்கான் படத்தை தயாரிப்பதோடு நிறுத்திக் கொண்டு புதிய இயக்குநர்களை தேர்ந்தெடுத்து வாய்ப்புக் கொடுத்தால் மகனுக்கு வழி காட்டின மாதிரியும் இருக்கும், யுவன் படங்களை பார்க்க வரும் ரசிகர்களை கொஞ்சம் காப்பாத்தின மாதிரியும் இருக்கும்!
-
தமிழ்டிஜிட்டல்சினிமா...

:)