கரூர் அருகே மின்சாரம் தாக்கி 2 தொழிலாளர்கள் பலி

கரூர்(வெள்ளியணை), ஏப்.15-

கரூர் மாவட்டம் வெள்ளியணையை அடுத்த கூடலூர் பகுதியில் தனியார் தொழிற்சாலை ஒன்று செயல்பட்டு வருகிறது. இந்த தொழிற்சாலைக்கு வெள்ளியணை துணை மின் நிலையத்திலிருந்து தனியாக மின்பாதை அமைத்து மின்சாரம் கொண்டு செல்ல தொழிற்சாலை நிர்வாகம், மின்வாரியத்திடம் அனுமதி பெற்றுள்ளதாக கூறப்படுகிறது.

இந்த பணிக்கு தேவையான பொருட்களை வழங்கிய மின்சார வாரியம், மின்வாரியத்தில் ஆட்கள் பற்றாக்குறையினால் தொழிற்சாலை நிர்வாகமே ஆட்களை வைத்து மின்கம்பங்களை நட்டு மின் கம்பிகளை இணைத்து பணிகளை முடிக்க கேட்டுக்கொண்டதாகவும் கூறப்படுகிறது.

இந்த பணிக்கு தொழிற்சாலை நிர்வாகம் ஒப்பந்த அடிப்படையில் பணியாளர்களை அமர்த்தி வேலை செய்து வந்தது. இந்த பணியில் கோவில்பட்டி, விளாத்திகுளம், சங்கரன் கோவில், திருப்பத்தூர், அருப்புக்கோட்டை உள்ளிட்ட தென் மாவட்டங்களை சேர்ந்த பணியாளர்கள் ஈடுபட்டு வந்தனர்.

இந்த நிலையில் நேற்று(ஞாயிற்றுக்கிழமை) காலை வெள்ளியணையை அடுத்த முத்தகவுண்டனூர் அருகே கரூர்-திண்டுக்கல் மெயின் ரோட்டையட்டி மின் கம்பிகளை கம்பத்தில் இணைக்கும் பணி நடந்து கொண்டிருந்தது. இந்த பணியில் 12 ஒப்பந்த பணியாளர்கள் ஈடுபட்டிருந்தனர்.

மின் கம்பிகள் கொண்டு செல்லும் வழியில் குறுக்காக சில இடங்களில் ஏற்கனவே அமைக்கப்பட்டு இருந்த மின்கம்பிகளும் செல்கின்றன. இதனால் நேற்று வெள்ளியணை துணை மின் நிலையத்தில் இந்த பகுதிக்கு பணி முடியும் வரையில் மின் சப்ளையை நிறுத்தி வைக்க கோரி இருந்தனர். அதனை ஏற்று மின்வாரியமும் மின் சப்ளையை நிறுத்தி வைத்து அனுமதி வழங்கியதாக கூறப்படுகிறது.

இந்தநிலையில் முத்தகவுண்டனூர் அருகே வெள்ளியணை துணை மின் நிலையத்தில் இருந்து லந்தக்கோட்டை பகுதிக்கு உயர் அழுத்த மின்சாரம் செல்லக்கூடிய பகுதியில் தனியார் ஆலைக்கு மின்சாரம் கொண்டு செல்லும் கம்பிகளை இழுத்துக்கொண்டு இருந்தனர். அப்போது வெள்ளியணை துணை மின் நிலையத்தில் இருந்து மின் சப்ளை நிறுத்தி வைக்கப்பட்டு இருந்த முத்தகவுண்டனூர் பகுதிக்கு மின் சப்ளை செய்ததாக கூறப்படுகிறது.

இதனால் அந்த பகுதியில் தனியார் ஆலைக்கு மின் கம்பிகளை இணைக்கும் பணியில் ஈடுபட்டு கொண்டு பணியாளர்கள் மீது மின்சாரம் பாய்ந்தது. இதில் திருப்பத்தூரை சேர்ந்த கார்த்திக் என்பவர் மின்சாரம் பாய்ந்து உடல் கருகிய நிலையில் மின் கம்பத்திலேயே பிணமாக தொங்கினார்.

மேலும் அருப்புக் கோட்டையை சேர்ந்த மதிக்குமார், சங்கரன் கோவிலை சேர்ந்த கார்த்திக், விளாத்திக்குளத்தை சேர்ந்த மாரிச்சாமி, சுரேஷ் ஆகியோர் மீதும் மின்சாரம் பாய்ந்தது. உடனடியாக அவர்கள் 4 பேரையும் சிகிச்சைக்காக கரூரில் உள்ள ஒரு தனியார் ஆஸ்பத்திரிக்கு கொண்டு சென்றனர். செல்லும் வழியில் மதிக்குமார் பரிதாபமாக இறந்தார். மற்ற 3 பேரும் ஆஸ்பத்திரியில் சிகிச்சை பெற்று வருகிறார்கள்.

இது குறித்து தகவல் அறிந்த வெள்ளியணை போலீஸ் இன்ஸ்பெக்டர் அருள்மொழி அரசு, சப்-இன்ஸ்பெக்டர் ஜெயராணி மற்றும் போலீசார் சம்பவ இடத்திற்கு விரைந்து வந்து பார்வையிட்டு விசாரணை மேற்கொண்டனர்.

இதையடுத்து தீயணைப்பு நிலையத்திற்கு தகவல் கொடுக்கப்பட்டது. இதனைதொடர்ந்து கரூர் உதவி கோட்ட தீயணைப்பு அலுவலர் தவமணி, நிலைய அதிகாரி தியாகராஜன் மற்றும் தீயணைப்பு வீரர்கள் சம்பவ இடத்திற்கு வந்து மின்கம்பியில் உடல் கருகி பலியாகி கிடந்த கார்த்திக் உடலை மீட்கும் பணியில் ஈடுபட்டனர்.

அப்போது அங்கு கூடியிருந்த பொதுமக்கள் இந்த சம்பவத்திற்கு காரணமான மின்வாரிய உயர் அதிகாரிகள் சம்பவ இடத்திற்கு வரவேண்டும் என்றும், அதுவரையில் இறந்தவர் உடலை கீழே இறக்க கூடாது என்றும் கூறிவெள்ளியணை-திண்டுக்கல் ரோட்டில் சாலை மறியலில் ஈடுபட்டனர்.

இதுகுறித்து தகவல் அறிந்த காமராஜ் எம்.எல்.ஏ., துணை போலீஸ் சூப்பிரண்டு இளங்கோ, தாசில்தார் பாலசுப்பிரமணி மற்றும் அதிகாரிகள் சம்பவ இடத்திற்கு விரைந்து வந்து சாலை மறியலில் ஈடுபட்டவர்களிடம் பேச்சுவார்த்தை நடத்தினர்.

ஆனால் பொதுமக்கள் சாலை மறியலை கைவிடவில்லை. இதனால் போலீசார் லேசான தடியடி நடத்தி சாலை மறியலில் ஈடுபட்டவர்களை கலைத்தனர். பின்னர் தீயணைப்பு படை வீரர்கள் மின் கம்பியில் தொங்கிய நிலையில் கிடந்த கார்த்திக் உடலை மீட்டனர்.

இதையடுத்து கார்த்திக் உடல் பிரேத பரிசோதனைக்காக கரூர் அரசு ஆஸ்பத்திரிக்கு அனுப்பி வைக்கப்பட்டது. இந்த சம்பவம் குறித்து வெள்ளியணை போலீசார் வழக்கு பதிவு செய்து விசாரணை நடத்தி வருகிறார்கள்.

பொது மக்கள் சாலை மறியலால் அந்த பகுதியில் சுமார் 3 மணி நேரம் போக்குவரத்து பாதிக்கப்பட்டது.

மாலைமலர்

நிஜமாலுமா மின் தாக்கியதா ?
நம்ப முடிய வில்லையப்பா :pale: