நெல்லை- தூத்துக்குடியில் பலத்த கோடை மழை: இடி தாக்கி 2 பேர் பலி

by *சம்ஸ் Tue 16 Apr 2013 - 7:40

நெல்லை, ஏப். 16-

நெல்லை-தூத்துக்குடி மாவட்டத்தில் நேற்று மாலை பல்வேறு இடங்களில் பலத்த மழை பெய்தது. இதனால் கோடை வெப்பம் ஒரளவுக்கு தணிந்தது. கோடை வெயில் கடந்த ஒரு மாத காலமாக சுட்டெரித்து வருவதால் மக்கள் அவதிபட்டு வருகின்றனர்.

இந்த நிலையில் நேற்று மாலை நெல்லை-தூத்துக்குடி மாவட்டத்தில் பல்வேறு இடங்களில் இடி-மின்னலுடன் பலத்த மழை பெய்தது. நெல்லை மாவட்டத்தில் நெல்லை, களக்காடு, ஏர்வாடி, திசையன்விளை, நாங்குநேரி, சங்கரன்கோவில் உள்ளிட்ட பல இடங்களில் கன மழை பெய்தது.

களக்காடு பகுதியில் சூறை காற்றுடன் மழை பெய்தது. இடி தாக்கியதில் மாடு மேய்த்துக் கொண்டிருந்த களக்காடு ஆறுமுகம் (வயது37), கீழநீலிதநல்லூர் நாராயணபுரத்தை சேர்ந்த தொழிலாளி சந்திசேகர் (35) ஆகியோர் பலியானார்கள்.

பலத்த சூறை காற்று வீசியதில் களக்காடு, ஏர்வாடி, திருக்குறுங்குடி பகுதியில் சுமார் 2 லட்சம் வாழைகள் சாய்ந்தன. பனை, தென்னை, புளிய மரம், வேம்பு உள்ளிட்ட 100-க்கும் மேற்பட்ட மரங்கள் முறிந்தன. மாவடியில் 25-க்கும் மேற்பட்ட டி.வி.க்கள் மின்னல் தாக்கி சேதம் அடைந்தன.

பாளை பஸ் நிலையம் அருகில் புளிய மரம் வேரோடு சாய்ந்தது உழவர் சந்தை அருகே பழமையான மரம் முறிந்து நடுரோட்டில் விழுந்தது. இதனால் நெல்லையில் பல இடங்களில் மின் தடை ஏற்பட்டது. சுத்தமல்லி தீன் நகரில் உள்ள புதிதாக கட்டப்பட்டு வரும் 2 வீடுகளில் செப்டிக் டேங்க் சுவர் இடிந்து விழுந்தது.

இதில் அதே பகுதியை சேர்ந்த 3 சிறுவர்கள் தினேஷ், விக்கி, சுபாஷ் காயம் அடைந்தனர். தூத்துக்குடி மாவட்டத்திலும் தூத்துக்குடி, சாத்தான்குளம், நாசரேத், திசையன்விளை உள்ளிட்ட பல பகுதிகளில் இடி-மின்னலுடன் பலத்த மழை பெய்தது.

மாலைமலர்