டெல்லி மாணவி வழக்கில் இளம் குற்றவாளிக்கும் தண்டனை வழங்க வேண்டும்: ஜெயந்தி நடராஜன்

by *சம்ஸ் Sat 20 Apr 2013 - 7:27

புதுடெல்லி, ஏப்.20-

டெல்லியில் பெண்கள் மாநாடு நடந்தது. இதில் மத்திய சுற்றுச்சூழல் துறை மந்திரி ஜெயந்தி நடராஜன் கலந்து கொண்டு பேசினார். அப்போது அவர் கூறியதாவது:-

டெல்லியில் ஓடும் பஸ்சில் மாணவி கற்பழிக்கப்பட்ட வழக்கில் கைது செய்யப்பட்டுள்ள இளம் குற்றவாளிக்கு கற்பழிக்கப் போதுமான வயது வந்து விட்டது என்கிற போது, அவன் தண்டனையை எதிர்கொள்ளவும் ஏற்றவன் என்பதை நான் நம்புகிறேன். இந்த குறிப்பிட்ட வழக்கைப் பொறுத்தமட்டில், அவன் மேஜர் பருவம் அடைவதற்கு சில நாட்கள் மட்டுமே குறைவான வயதை உடையவன் என நான் கருதுகிறேன்.

அவன் கண்டிப்பாக தண்டிக்கப்பட வேண்டும். இந்த வழக்கில் தினசரி விசாரணை நடந்து கொண்டு இருக்கிறது. முதன்முதலாக இத்தகைய வழக்கில் இப்போதுதான் தினந்தோறும் விசாரணை நடக்கிறது. இந்த வழக்கில் குற்றவாளிகளுக்கு தண்டனை உண்டு.

இவ்வாறு அவர் கூறினார்.

மாறி வரும் பெண்களின் பங்களிப்பும், அவர்கள் எதிர்கொள்ளும் சவால்களும் என்ற தலைப்பில் பாரதீய ஜனதா துணைத்தலைவர் சுமிருதி இரானியுடன் பகிரங்க விவாதத்திலும் மத்திய மந்திரி ஜெயந்தி நடராஜன் கலந்துகொண்டார்.

அப்போது அவர், 'பாராளுமன்றத்தில் பெண்கள் இட ஒதுக்கீடு மசோதாவை நிறைவேற்றியே தீருவோம். டெல்லி மேல்-சபையில் இந்த மசோதாவை ஏற்கனவே நிறைவேற்றி விட்டோம். எனவே பாராளுமன்றத்திலும் நிறைவேற்றுவோம்' என கூறினார். மகளிர் இட ஒதுக்கீடு மசோதாவுக்கு ஆண் எம்.பி.க்கள் எதிர்ப்பு தெரிவித்து வருவது குறித்த கேள்விக்கு ஜெயந்தி நடராஜன், 'பாராளுமன்றத்தில் உள்ளவர்களில் 90 சதவீதம்பேர் 180 இடங்களை இழந்து விடுவார்கள்.

எனவே அதற்கு யாரும் வாக்களிக்க விரும்பவில்லை. ஆனால் அதையும் தாண்டி தாங்கள் செயல்படுவோம். மசோதாவை நிறைவேற்றுவோம்'என பதில் அளித்தார்.தொடர்ந்து அவர் கூறியதாவது:-

ஜனநாயகதத்தில் மக்களை உடன் அழைத்துச்செல்ல வேண்டி உள்ளது. நிர்வாக அமைப்பு முறையினை மாற்றுவதற்கு நாங்கள் முயற்சிக்கிறோம். அதற்காக நாங்கள் போராடுகிறோம். இங்கே சட்டத்தின் ஆட்சி நடக்கிறது. சட்டத்தை மாற்றவும் நாங்கள் போராடுகிறோம்.

வழக்குகள், தண்டிக்கும் காலத்தை அடையவே நீண்ட காலம் ஆகிறது என்று விமர்சிக்கிறீர்கள். வழக்கு விசாரணை எப்போதும் நீடித்துக்கொண்டே இருக்கும் என்று எதற்காக நீங்கள் சொல்கிறீர்கள் என எனக்கு தெரியவில்லை. இப்போதெல்லாம் தினசரி விசாரணை நடக்கிறது. தண்டனையும் வழங்கப்படுகிறது.

இவ்வாறு அவர் கூறினார்.

மாலைமலர்