சேப்பாக்கம் கிரிக்கெட் மைதானத்தில் பலத்த போலீஸ் பாதுகாப்பு

சென்னை, ஏப். 25-

பெங்களூரில் கடந்த சில நாட்களுக்கு முன்னர் சக்தி வாய்ந்த குண்டு வெடித்ததில் பலர் படுகாயம் அடைந்தனர். அதிர்ஷ்டவசமாக இதில் உயிர்சேதம் எதுவும் ஏற்படவில்லை. இச்சம்பவத்தை தொடர்ந்து நாடு முழுவதும் பாதுகாப்பு பலப்படுத்தப்பட்டுள்ளது. தென் மாநிலங்களை குறிவைத்து தீவிரவாதிகள் தாக்குதல் நடத்த திட்டமிட்டுள்ளதாகவும் தகவல் வெளியாகியுள்ளது.

இதற்கிடையே பெங்களூர் குண்டு வெடிப்பு தொடர்பாக மேலப்பாளையத்தை சேர்ந்த அல்உம்மா தீவிரவாதி கிச்சான் புகாரி உள்பட 3 பேர் கைது செய்யப்பட்டனர். இதற்கு முன்பு நடை பெற்ற குண்டு வெடிப்பு சம்பவங்களில் தொடர்புடைய தீவிரவாதிகளை போலீசார் கண்காணித்து வருகிறார்கள்.

இந்நிலையில் சென்னை சேப்பாக்கம் கிரிக்கெட் மைதானத்தில் சென்னை சூப்பர் கிங்ஸ், ஐதராபாத் சன்ரைசர்ஸ் அணிகள் மோதும் போட்டி இன்று இரவு 8 மணிக்கு நடைபெறுகிறது. இப்போட்டிக்கு பலத்த பாதுகாப்பு அளிக்க போலீசார் முடிவு செய்துள்ளனர்.

சென்னையில் நடை பெறும் போட்டிக்கு அச்சுறுத்தல் எதுவும் இல்லையென்றாலும் பாதுகாப்பை பலப்படுத்துமாறு மத்திய உளவு பிரிவு அதிகாரிகள் கேட்டுக் கொண்டுள்ளனர். இதை தொடர்ந்து கூடுதல் போலீசார் இன்றைய போட்டியின் போது பாதுகாப்பு பணியில் ஈடுபடுத்தப்படுகிறார்கள்.

கிரிக்கெட் மைதானத்தை சுற்றியுள்ள சாலைகள் மற்றும் மைதானம் முழுவதும் ஏற்கனவே கண்காணிப்பு கேமராக்கள் பொறுத்தப்பட்டுள்ளன. தற்போது கூடுதலாக கேமராக்களை பொறுத்தவும் முடிவு செய்யப்பட்டது. இதன்படி 10-க்கும் மேற்பட்ட இடங்களில் கூடுதல் கேமராக்கள் பொறுத்தப்பட்டுள்ளது.

மைதானத்தை சுற்றிலும் கூடுதல் மின்விளக்குகளும் பொறுத்தப்பட்டுள்ளது. இது தொடர்பாக இணை கமிஷனர் சங்கர் கூறும் போது, இன்று நடைபெறும் போட்டிக்கு கூடுதலாக போலீசார் வரவழைக்கப்பட்டு பாதுகாப்பு பணியை மேற்கொள்வார்கள். கூடுதல் கேமராக்களை பொறுத்துமாறு கிரிக்கெட் வாரிய நிர்வாகிகளை கேட்டுக்கொண்டுள்ளோம் என்றார்.

திருவல்லிக்கேணி இன்ஸ்பெக்டர் சங்கர் தலைமையில் நூற்றுக்கணக்கான போலீசார் இன்று இரவு பலத்த கண்காணிப்பில் ஈடுபட உள்ளனர். அனைத்து வாசல்களிலும் ஆயுதம் தாங்கிய போலீசார் நிறுத்தப்பட்டுள்ளனர்.

மாலைமலர்