ரெய்னாவின் அதிரடி ஆட்டத்தால் சென்னை அணி வெற்றி

ரெய்னாவின் அதிரடி ஆட்டத்தால் சென்னை அணி வெற்றி
ரெய்னா 99 ஓட்டங்கள் விளாச, சென்னை அணி 77 ஓட்டங்கள் வித்தியாசத்தில் அசத்தல் வெற்றி பெற்றது. இதையடுத்து “பிளே-ஆப்” வாய்ப்பை உறுதி செய்தது. ஹைதராபாத் அணி ஏமாற்றம் அளித்தது.

ஹைதராபாத்தில், நேற்று முன்தினம் இரவு நடந்த பிரிமியர் கிரிக்கெட் தொடரின் லீக் போட்டியில் ஹைதராபாத், சென்னை அணிகள் மோதின. சென்னை அணியில் லாப்லின் நீக்கப்பட்டு, ஜேசன் ஹோல்டர் சேர்க்கப்பட்டார். நாணயச் சுழற்சியில் வென்ற ஹைதராபாத் தலைவர் சங்கக்கார களத்தடுப்பை தேர்வு செய்தார்.

சென்னை அணிக்கு மைக்கல் ஹசி, முரளி விஜய் ஜோடி அதிரடி துவக்கம் கொடுத்தது. ஹைதராபாத் பந்து வீச்சை வெளுத்து வாங்கிய இவர்கள், மின்னல் வேகத்தில் ஓட்டம் சேர்த்தனர். இஷாந்த் சர்மா வீசிய போட்டியின் 5 வது ஓவரில் விஜய் ஹெட்ரிக்’ சிக்சர் விளாசி அசத்தினார். முதல் விக்கெட்டுக்கு 45 ஓட்டங்கள் சேர்த்த போது, திசார பெரேரா பந்தில் விஜய் (29) ஆட்டமிழந்தார். கரண் சர்மா, இஷாந்த், சமி பந்துகளை சிக்சருக்கு பறக்க விட்ட ஹசி, மீண்டும் அரைசதம் கடந்தார்.

மறுமுனையில் மிரட்டலான ஆட்டத்தை வெளிப்படுத்திய சுரேஷ் ரெய்னா விஸ்வரூபம் எடுத்தார். வாணவேடிக்கை காட்டிய இவர், இஷாந்த் சர்மா வீசிய போட்டியின் 17 வது ஓவரில் ஒரு சிக்சர், 4 பவுண்டரி உட்பட 25 ஓட்டங்கள் எடுக்க, ஸ்கோர் “ஜெட்” வேகத்தில் எகிறியது. பெரேரா பந்தில் மைக்கேல் ஹசி (67) போல்டானார். அடுத்து வந்த தலைவர் டோனி (4) ஏமாற்றினார்.

ஸ்டைன் ஓவரில் ரவீந்திர ஜடேஜா இரண்டு பவுண்டரி அடித்தார். டரன் சமி வீசிய கடைசி ஓவரில் 3 பவுண்டரி உட்பட 20 ஓட்டம் கிடைக்க, சென்னை அணி 20 ஓவரில் 3 விக்கெட்டுக்கு 223 ஓட்டங்கள் குவித்தது. சதத்தை நழுவவிட்ட ரெய்னா (99), ஜடேஜா (14) ஆட்டமிழக்காமல் இருந்தனர்.

கடின இலக்கை விரட்டிய ஹைதராபாத் அணி எடுத்த எடுப்பிலேயே அதிர்ந்தது. மிகவும் எதிர்பார்க்கப்பட்ட ஷிகர் தவான் (03) அவுட்டானார். ஹோல்டர் ஓவரில் 2 பவுண்டரி, சிக்சர் அடித்த பார்த்திவ் படேல் ஆறுதல் தந்தார்.

இதற்கு பின் சென்னை பந்து வீச்சாளர்கள் போட்டுத் தாக்க, விக்கெட்டுகள் வரிசையாக சரிந்தன. அஷ்வின் “சுழலில்” சங்கக்கார (03) சிக்கினார். ரெய்னா வலையில் விகாரி (3) வீழ்ந்தார். மோகித் சர்மா பந்தில் ஒரு சிக்சர் அடித்த டரன் சமி (7) அடுத்த பந்தில் ஆட்டமிழந்தனர். மீண்டும் பந்து வீச வந்த மோகித் சர்மா இம்முறை பார்த்திவ் படேலை (44) பெவிலியனுக்கு அனுப்பினார்.

மோரிஸ் ஓவரில் ஒரு பவுண்டரி, சிக்சர் அடித்தார். பெரேரா பின் பிராவோ பந்திலும் ஒரு சிக்சர் அடித்த இவர் அடுத்த பந்தில் 23 ஓட்டங்களுக்கு ஆட்டமிழக்க நம்பிக்கை தந்தது. ஸ்டைன் 14 ஓட்டங்கள் எடுத்தார். ஹைதராபாத் அணி 20 ஓவரில் 8 விக்கெட்டுக்கு 146 ஓட்டங்களை மட்டும் எடுத்து தோல்வி அடைந்தது. இந்த அணியின் ஒட்டுமொத்த “ஓட்ட விகிதம்” (-0.228) குறைந்தால், “பிளே-ஆப்” சுற்றுக்கு முன்னேறுவதில் சிக்கல் ஏற்பட்டுள்ளது. போராடிய கரண் சர்மா (39) ஆட்டமிழக்காமல் இருந்தார்.

சென்னை அணிக்கு எனது வாழ்த்துக்கள்

இந்த முறை கோப்பை சென்னைக்கு என்று நினைக்கிறேன்