ஜனாதிபதியுடன் பிரதமர் சந்திப்பு

ஜனாதிபதியுடன் பிரதமர் சந்திப்பு
சட்ட அமைச்சர் அஸ்வனி குமாரை நீக்க முடிவு
ஜனாதிபதி பிரணாப் முகர்ஜியை பிரதமர் மன்மோகன் சிங் நேற்று முன்தினம் சந்தித்து பேசினார். இதனால், நிலக்கரி சுரங்க ஒதுக்கீடு விவகாரம் தொடர்பாக சட்ட அமைச்சர் அஸ்வனி குமார் நீக்கப்படலாம் என்றும் ஓரிரு நாளில் அறிவிப்பு வெளியாகலாம் என்றும் தகவல்கள் வெளியாகியுள்ளன. பதவி உயர்வுக்கு மருமகன் லஞ்சம் வாங்கிய விவகாரத்தில் சிக்கிய ரயில்வே அமைச்சர் பவன்குமார் பன்சாலின் பதவிக்கும் ஆபத்து நீடிக்கிறது.

நிலக்கரி சுரங்க ஒதுக்கீடு விசாரணை பற்றிய அறிக்கையில், சட்ட அமைச்சர் அஸ்வனி குமார் மற்றும் பிரதமர் அலுவலக அதிகாரிகள் கூறிய திருத்தங்களை செய்தோம் என்று உச்ச நீதிமன்றத்தில் சி.பி.ஐ. இயக்குனர் தெரிவித்திருந்தார். இது டில்லி அரசியலில் பெரும் பரபரப்பை ஏற்படுத்தியது. அமைச்சர் அஸ்வனி குமார், பிரதமர் அலுவலக அதிகாரிகளின் செயலுக்கு உச்ச நீதிமன்றம் கடும் கண்டனம் தெரிவித்துள்ளது. சி.பி.ஐ. சுதந்திரமாக செயல்பட புதிய சட்டத்தை கொண்டு வரவும் அரசுக்கு நீதிபதிகள் உத்தரவிட்டுள்ளனர்.

அதேபோல் ரயில்வேயில் பதவி உயர்வு பெறுவதற்கு ரயில்வே அமைச்சர் பவன்குமார் பன்சாலின் மருமகன் ரூ. 90 இலட்சம் லஞ்சம் வாங்கிய விவகாரமும் டெல்லியை கலக்கியது. இந்த இரு விவகாரங்களால், நாடாளுமன்ற பட்ஜெட் கூட்டத்தில் எதிர்க்கட்சியினர் அமளியில் ஈடுபட்டனர். இதனால் நாடாளுமன்றம் முடங்கியது.

உணவு பாதுகாப்பு மசோதா உள்ளிட்ட முக்கிய மசோதாக்களை நிறைவேற்ற அரசு முயன்றது. ஆனால், 2 அமைச்சர்களையும் நீக்கினால்தான் மசோதாக்களை நிறைவேற்ற உதவுவோம் என்று பா.ஜ. நிபந்தனை விதித்தது. இதை அரசு ஏற்காததால் நாடாளுமன்றம் 2 நாளுக்கு முன்பே மறு திகதி குறிப்பிடப்படாமல் ஒத்திவைக்கப்பட்டது.

இந்த நிலையில் பிரதமர் அலுவலகத்துக்கு அமைச்சர் அஸ்வனி குமார் நேற்று முன்தினம் வந்திருந்தார். அவர் பிரதமர் மன்மோகன் சிங்கை சந்தித்ததாக தகவல்கள் வெளியாயின. இதற்கிடையே 30 நிமிடங்கள் பிரதமர் அலுவலகத்தில் இருந்த அஸ்வனி குமார் வெளியே வந்த போது அவரிடம் ‘பிரதமரிடம் என்ன பேசினீர்கள்’ என்று நிருபர்கள் கேட்டனர். அதற்கு அஸ்வனிகுமார் பதிலளிக்கையில், “பிரதமரை சந்திக்கவில்லை. பிரதமர் அலுவலக அதிகாரிகளைத்தான் சந்தித்தேன்” என்றார். உச்ச நீதிமன்றத்தின் கண்டனம் குறித்து பிரதமர் அலுவலக அதிகாரிகளுடன் அவர் பேசியதாக தெரிகிறது.

இதற்கிடையே பிரதமர் அலுவலகத்தில் அஸ்வனி குமார் இருந்த போது ஜனாதிபதியை மன்மோகன் சிங் சந்தித்து பேசினார். நாடாளுமன்ற கூட்டத் தொடர் முடிவடைந்ததால் ஜனாதிபதியை பிரதமர் மரியாதை நிமித்தம் சந்தித்ததாக கூறப்பட்டது. ஆனாலும், அஸ்வனி குமாரை நீக்குவதென பிரதமர் முடிவெடுத்துள்ளதாகவும், இது பற்றி ஜனாதிபதியிடம் விவாதித்து ள்ளதாகவும் டில்லி வட்டாரங்கள் இதற்கிடையே நேற்று முன்தினம் நடந்த மத்திய அமைச்சரவை கூட்டத்தில் ரயில்வே அமைச்சர் பவன் குமார் பன்சால் கலந்து கொள்ளவில்லை. டில்லியில் தனது வீட்டில்தான் பன்சால் இருந்தார். ஆனால், ரயில்வே அமைச்சக அலுவலகத்துக்கும் அவர் செல்லவில்லை. இதனால், பன்சாலின் பதவிக்கும் ஆபத்து ஏற்பட்டுள்ளதாக பரபரப்பு நிலவுகிறது.

ஆனால், உடல் நிலை பாதிக்கப் பட்டதால் பன்சால் ஓய்வு எடுப்பதாகவும் அமைச்சரவை கூட்டத்தில் ரயில்வே துறை தொடர்பாக எதுவும் விவாதிக்கப் படாததால் அவர் செல்லவில்லை என்றும் அவரது சார்பில் தெரிவிக்கப்பட்டது. இதற்கிடையே நிலக்கரி சுரங்க ஒதுக்கீடு முறைகேடு தொடர்பான விசாரணையில் அரசு தலையீடு தொடர்பாக சி.பி.ஐ.யிடம் மத்திய விஜிலன்ஸ் ஆணைக்குழு விளக்கம் கேட்டுள்ளது.

தினகரன்

நல்லது நடந்தால் அனைவருக்கும் நல்லது தான்