ஊழலை எதிர்த்து ராஜ்நாத் சிங் தலைமையில் ஜுன் 2ம் தேதி சிறை நிரப்பும் போராட்டம்

புதுடெல்லி, மே 22-

பாராளுமன்றத் தேர்தலுக்கு இன்னும் ஓராண்டு கூட முழுமையாக இல்லாத நிலையில், அதற்கான வியூகம் வகுப்பதற்காக பாரதீய ஜனதா கட்சியின் உயர் அமைப்பான ஆட்சிமன்றக்குழு கூட்டம், தலைநகர் டெல்லியில் நேற்று நடந்தது.

வரும் பாராளுமன்றத்தேர்தலில், பாரதீய ஜனதாவின் பிரதமர் வேட்பாளராக அறிவிக்கப்படுவார் என்ற எதிர்பார்ப்பை ஏற்படுத்தியுள்ள குஜராத் முதல்-மந்திரி நரேந்திர மோடி, ஆட்சி மன்றக்குழு உறுப்பினராக நியமிக்கப்பட்டபிறகு நடந்த முதல் கூட்டம் என்ற வகையில், இந்த கூட்டம் மிகுந்த எதிர்பார்ப்பை ஏற்படுத்தியது.

இந்த கூட்டத்துக்கு கட்சித்தலைவர் ராஜ்நாத் சிங் தலைமை தாங்கினார். மூத்த தலைவர் அத்வானி, பாராளுமன்ற எதிர்க்கட்சி தலைவர் சுஷ்மா சுவராஜ், டெல்லி மேல்-சபை எதிர்க்கட்சி தலைவர் அருண் ஜெட்லி, நரேந்திரமோடி, முன்னாள் தலைவர் நிதின் கட்காரி மற்றும் கட்சியின் மூத்த தலைவர்கள் பலரும் இந்த கூட்டத்தில் கலந்துகொண்டனர்.

இந்த கூட்டத்தில் பாராளுமன்ற தேர்தலை சந்திப்பதற்கான வியூகம் பற்றி விவாதிக்கப்பட்டது. அதில் ஒரு அங்கமாக, காங்கிரஸ் கூட்டணி அரசின் தோல்விகளை மக்களிடம் தெரியப்படுத்தும் விதத்தில் நாடு முழுவதும் சிறை நிரப்பும் போராட்டம் நடத்த தீர்மானிக்கப்பட்டது.

இந்த ஆண்டு இறுதியில் நடக்கவுள்ள மத்திய பிரதேசம், சத்தீஷ்கார், டெல்லி, ஜார்கண்ட் மாநில சட்டசபை தேர்தல் குறித்தும் பேசப்பட்டது. சீனப்பிரதமர் லீ, இந்தியாவில் மேற்கொண்ட சுற்றுப்பயணம் குறித்தும் விவாதிக்கப்பட்டது.

மேலும், இந்த கூட்டத்தில் நரேந்திரமோடி பேசுகையில், கடந்த 9 ஆண்டுகளில் காங்கிரஸ் கூட்டணி அரசு கண்டுள்ள தோல்விகள் குறித்து விவாதிப்படுவதோடு, மக்களுக்கு தெரியப்படுத்த வேண்டும் என்று கேட்டுக்கொண்டார்.

கூட்டத்துக்கு பின்னர் ஆட்சி மன்றக்குழுவின் செயலாளர் அனந்த்குமார் நிருபர்களுக்கு பேட்டி அளித்தார். அப்போது அவர் கூறியதாவது:-

கட்சித்தலைவர் ராஜ்நாத் சிங் தலைமையில் நடந்த கூட்டத்தில், கோவாவில் அடுத்த மாதம் 7-9 தேதிகளில் நடக்கவுள்ள பாரதீய ஜனதா தேசிய செயற்குழு கூட்டத்தில் விவாதிக்க வேண்டிய விஷயங்கள் குறித்து விவாதிக்கப்பட்டது. ஆட்சிமன்றக்குழு கூட்டத்தில், 9 ஆண்டு கால காங்கிரஸ் கூட்டணி ஆட்சி பற்றி விவாதித்தோம்.

விலைவாசி உயர்வு, உள்நாட்டு-வெளிநாட்டு பாதுகாப்பு, பொருளாதார நிலைமை என எல்லாத்துறையிலும் இந்த அரசு தோல்வி கண்டுள்ளது. 9 ஆண்டு கால காங்கிரஸ் கூட்டணி அரசு நல்லாட்சி நடத்தியதாக யாரும் கூற முடியாது. தவறான ஆட்சி நடத்தியதாகத்தான் கூற இயலும். நாட்டு மக்கள் சலிப்பு அடைந்துவிட்டனர். அவர்கள் இந்த ஆட்சியை முடிந்த அளவு விரைவாக தூக்கி எறிய விரும்புகின்றனர்.

சமூக ஊடகங்கள், சமூக வலைத்தளங்கள் பரவியுள்ள நிலையில், அவற்றை மக்களை குறிப்பாக இளைய தலைமுறையினரை சென்றடைவதற்கு பயன்படுத்த வேண்டும் என்று மோடி கேட்டுக்கொண்டார்.

ஊழல்கள் மலிந்த காங்கிரஸ் கூட்டணி அரசின் தவறான ஆட்சியை கண்டித்து பாரதீய ஜனதா சார்பில் வரும் 27-ந்தேதி தொடங்கி அடுத்த மாதம் 2-ந்தேதி வரை நாடு முழுவதும் சிறை நிரப்பும் போராட்டம் நடத்தப்படும்.

உத்தர பிரதேச மாநில தலைநகர் லக்னோவில் நடைபெறும் சிறை நிரப்பும் போராட்டத்தில் பா.ஜ.க. தலைவர் ராஜ்நாத் சிங் பங்கேற்கிறார்.

இவ்வாறு அவர் கூறினார்.

ஊழலை எதிர்த்து இன்னொரு ஊழல் போராட போகுதாமா என்ன கொடுமை இது