மேட்டூர் அணையின் நீர்மட்டம் உயர்வு: குடிநீர் தேவையை சமாளிக்க கைகொடுத்த பருவ மழை

மேட்டூர், ஜூன். 4-

கர்நாடக மாநிலத்தில் கே.ஆர்.எஸ். அணையின் கீழ் பகுதியில் தமிழக - கர்நாடக எல்லையில் உள்ள காவிரி நீர் பிடிப்பு பகுதியில் கடந்த சில நாட்களாக மழை பெய்து வருகிறது.

கிருஷ்ணகிரி மாவட்டம் ராயக்கோட்டை, தளி, கெலமங்கலம் மற்றும் தர்மபுரி மாவட்டம் பஞ்சப்பள்ளி, பென்னாகரம், ஒகேனக்கல் ஆகிய பகுதிகளிலும் மழை பெய்து வருவதால் மேட்டூர் அணைக்கு நீர்வரத்து அதிகரித்து உள்ளது.

நேற்று முன்தினம் காலை 8 மணிக்கு 222 கன அடியாக இருந்த நீர்வரத்து நேற்று காலை 8 மணிக்கு 1600 கன அடியாக அதிகரித்தது. இன்று காலை 8 மணி நிலவரப்படி அணைக்கு நீர்வரத்து 1032 கன அடியாக இருந்தது. அணையில் இருந்து குடிநீர் தேவைக்காக தண்ணீர் திறப்பு 600 கன அடியில் இருந்து 800 கன அடியாக அதிகரிக்கப்பட்டு உள்ளது.

தற்போது அணையின் நீர்மட்டம் 18.83 அடியாக உள்ளது. கர்நாடக அணைகள் நிரம்பி மேட்டூர் அணைக்கு நீர்வரத்து அதிகரிக்க காலதாமதம் ஏற்படும் என்றாலும் வறட்சியால் மேட்டூர் அணையின் நீர்மட்டம் மிகவும் சரிந்த நிலையில் இருந்தது. டெல்டா மாவட்ட குடிநீருக்கே தட்டுப்பாடு ஏற்படும் அபாயமும் இருந்தது.

2 நாட்கள் பெய்த மழையினால் ஓரளவு தண்ணீர் வந்ததால் இனி வரும் காலங்களிலும் பருவ மழை கைகொடுத்து மேட்டூர் அணைக்கு நீர்வரத்து அதிகரிக்கும் என்பதால் வரும் நாளில் குடிநீர் தேவையை சமாளிக்கலாம் என்ற மகிழ்ச்சியில் பொதுப்பணி துறை அதிகாரிகள் உள்ளனர். மழையினால் மேட்டூர் அணை பகுதியில் பாலைவனம் போல் காட்சி அளித்த பகுதி தற்போது ஈரப்பதமாக காட்சி அளிக்கிறது.

மிக்க மகிழ்ச்சி அண்ணா