புதுக்கோட்டை அருகே ரூ.15 லட்சம் கேட்டு கடத்தப்பட்ட 8-ம் வகுப்பு மாணவன் மீட்பு

by *சம்ஸ் Tue 18 Jun 2013 - 7:59

கந்தர்வக்கோட்டை, ஜூன். 17-

புதுக்கோட்டை மாவட்டம் கந்தர்வக்கோட்டை அருகே உள்ள கொத்தம்பட்டி கிராமத்தை சேர்ந்தவர் அருணாசலம். இவர் பக்கத்து ஊரான அரியானிபட்டி ஊராட்சியில் செயலராக வேலை பார்த்து வருகிறார். இவரது மகன் அழகேசன் (வயது 13). கந்தர்வக்கோட்டை அருகே உள்ள தனியார் பள்ளியில் 8-ம் வகுப்பு படித்து வருகிறான்.

இந்த நிலையில் கடந்த 15-ந்தேதி (சனிக்கிழமை) மாலை அருணாசலம் வீட்டிற்கு வந்த மர்ம நபர்கள் சிலர் முகவரி கேட்டு விசாரித்துள்ளனர். உடனே அருணாசலத்தின் மனைவி, அந்த ஊரில் உள்ள குறிப்பிட்ட முகவரியை நேரில் சென்று காண்பிக்குமாறு தனது மகன் அழகேசனை அவர்களுடன் அனுப்பி வைத்தார்.

மகன் சென்று நீண்ட நேரமாகியும் வீடு திரும்பவில்லை. இதனால் அதிர்ச்சி அடைந்த பெற்றோர் மற்றும் உறவினர்கள் அழகேசனை பல்வேறு இடங்களில் தேடினர். ஆனால் எங்கும் கிடைக்கவில்லை. இதற்கிடையே அன்று இரவு 10.30 மணிக்கு அருணாசலத்தின் செல்போனுக்கு ஒரு அழைப்பு வந்தது.

எதிர்முனையில் பேசிய மர்ம நபர், உங்கள் மகன் அழகேசனை நாங்கள் கடத்தி வைத்துள்ளோம். ரூ.15 லட்சம் பணம் கொடுத்தால் விடுவிப்போம். மீறி போலீசுக்கு போனால் உங்கள் மகனை கொன்று விடுவோம் என்று கூறி மிரட்டிவிட்டு இணைப்பை துண்டித்தனர்.

அதன்பிறகு நேற்று முன்தினம் காலை 2-வது முறையாக அருணாசலத்தின் செல்போனுக்கு மீண்டும் தொடர்புகொண்ட மர்ம நபர்கள் பணம் ரெடியாகி விட்டதா? என்று கேட்டுள்ளனர். இதனால் பதட்டம் அடைந்த அருணாசலம் கந்தர்வக்கோட்டை போலீசில் புகார் அளித்தார்.

இதையடுத்து திருச்சி சரக டி.ஐ.ஜி. அமல்ராஜ், புதுக்கோட்டை மாவட்ட போலீஸ் சூப்பிரண்டு உமா, துணை போலீஸ் சூப்பிரண்டு இளங்கோவன், இன்ஸ்பெக்டர் உதயசந்திரன் ஆகியோர் அடங்கிய 8 தனிப்படையினர் தீவிர விசாரணை நடத்தினர்.

மர்ம நபர்கள் பேசிய செல்போன் எண்ணை தொடர்பு கொண்டபோது அது சுவிட்ச் ஆப் செய்யப்பட்ட நிலையில் இருந்தது. இதனால் விசாரணையில் சிறிய தொய்வு ஏற்பட்டது. கடைசியாக அந்த மர்ம நபர்கள் எங்கிருந்து பேசினார்கள் என்பதை செல்போன் டவர் மூலம் கண்டுபிடிக்க முயன்ற போலீசாரின் முயற்சி தோல்வி அடைந்தது.

இருந்தபோதிலும் தனிப்படை போலீசார் கடந்த 2 நாட்களாக இரவு, பகல் பாராமல் மாணவனை மீட்க தீவிர நடவடிக்கை எடுத்தனர். மாணவன் கடத்தப்பட்ட கொத்தம்பட்டியை சுற்றியுள்ள 10-க்கும் மேற்பட்ட கிராமங்களை தொடர்ந்து கண்காணித்து வந்தனர். சந்கேத்திற்கு இடமான முறையில் யாராவது வந்து சென்றார்களா? கார்கள் ஏதாவது வந்து சென்றதா? என்றும் அப்பகுதி மக்களிடம் விசாரித்தனர்.

இந்தநிலையில் இன்று அதிகாலை 3.30 மணிக்கு அழகேசனை கடத்திச்சென்ற மர்ம கும்பலை சேர்ந்தவர்கள் தஞ்சை மாவட்டம் வல்லம் நெடுஞ்சாலையில் உள்ள ஆளக்குடி காவல் நகர் அருகே இறக்கிவிட்டு சென்றனர். இருள் சூழ்ந்த அந்த பகுதியில் செய்வது அறியாது அழகேசன் பைபாஸ் சாலையில் நடந்து சென்று கொண்டிருந்தான்.

அப்போது அந்த வழியாக சென்றவர்கள் சிறுவனை அழைத்து விசாரித்தனர். பின்னர் இதுபற்றி தஞ்சை போலீசாருக்கு தகவல் கொடுத்தனர். அதன்பேரில் விரைந்து வந்த போலீசார் சிறுவனை மீட்டனர். தொடர்ந்து அழகேசன் கொடுத்த தகவலையடுத்து கந்தர்வக்கோட்டை போலீசாருக்கு தெரிவித்தனர்.

உடனே தஞ்சைக்கு விரைந்து சென்ற கந்தர்வக்கோட்டை போலீசார் மாணவன் அழகேசனை புதுக்கோட்டை அழைத்து வந்தனர். தொடர்ந்து அழகேசனிடம் விசாரணை நடத்தினர். அப்போது தன்னை கடத்தி சென்றவர்கள் யார் என்றே தெரியாது எனவும், அவர்கள் தன்னை ஒரு வீட்டில் அடைத்து வைத்திருந்ததாகவும், உரிய நேரத்திற்கு சாப்பாடு கொடுத்ததாகவும் அழகேசன் கூறினான்.

அத்துடன் தன்னை அடிக்கவோ, துன்புறுத்தவோ இல்லை என்றும் தெரிவித்தான். இதையடுத்து மாணவன் அழகேசன் அவனது பெற்றோரிடம் ஒப்படைக்கப்பட்டான். மாணவன் மீட்கப்பட்டபோதும் அவனை கடத்திச் சென்ற மர்ம நபர்கள் யார்? எதற்காக கடத்தினார்கள்? பணத்திற்காகவா அல்லது வேறு ஏதாவது காரணம் உள்ளதா? என்பது உள்ளிட்ட பல்வேறு கோணங்களில் போலீசார் விசாரணை நடத்தி வருகிறார்கள்.