கழிவு நீர் கால்வாயில் சிறுமி பலி; ரூ.2 லட்சம் வழங்க ஐகோர்ட் உத்தரவு.

by *சம்ஸ் Fri 11 Feb 2011 - 12:41

மதுரை திருப்பரங்குன்றம் கோயிலுக்கு சென்ற சிறுமி திறந்த கழிவு நீர் கால்வாயில் தவறி விழுந்து பலியானதற்காக, அரசு இரண்டு லட்சம் ரூபாய் நஷ்டஈடு வழங்க ஐகோர்ட் கிளை உத்தரவிட்டது. திருப்பரங்குன்றத்தை சேர்ந்த மணிகண்டன் தாக்கல் செய்த ரிட் மனு: மனைவி, மகள் தனலட்சுமியுடன் 2009 மே 22ல் முருகன் கோயிலுக்கு சென்றேன். பலத்த மழை பெய்ததால், கோயில் மெயின் நுழைவு வாயில் அருகே நனையாமல் இருக்க அருகிலுள்ள கடையில் ஒதுங்கி நின்றோம். அங்கிருந்து மகள் தனலட்சுமி என் மனைவியிடம் சென்ற போது, திறந்திருந்த நகராட்சி கழிவுநீர் கால்வாயில் தவறி விழுந்தார். மழை காரணமாக தண்ணீரில் அடித்து செல்லப்பட்டார். அவரை தேடியும் கிடைக்கவில்லை. ஒன்றரை கி.மீ., தூரத்தில் அவனியாபுரம் அருகே கிடந்தார். அவரை ஆஸ்பத்திரிக்கு கொண்டு சென்ற போது இறந்தார். கோயிலுக்கு ஏராளமான பக்தர்கள் வருகின்றனர். நகராட்சி அதிகாரிகள் கவனக்குறைவால், கழிவு நீர் கால்வாய் மூடப்படாததே விபத்துக்கு காரணம். பத்து லட்சம் ரூபாய் நஷ்டஈடு வழங்க உத்தரவிட வேண்டும், என தெரிவிக்கப்பட்டது. மனுவை விசாரித்த நீதிபதி கே.கே.சசிதரன், ""சம்பவம் நகராட்சி அதிகாரிகளின் கவனக்குறைவால் நடந்துள்ளது. சிறுமியை இழந்து தவிக்கும் மனுதாரருக்கு நகராட்சி கமிஷனர், நகராட்சிநிர்வாக துறை செயலாளர் இரண்டு லட்சம் ரூபாய் நஷ்டஈடு வழங்க வேண்டும். வழக்கு செலவுக்கு 10 ஆயிரம் ரூபாய் வழங்க வேண்டும். 2009 முதல் 8 சதவீத வட்டியுடன் வழங்க வேண்டும்,'' என்றார்.

நன்றி தினமலர்