டெல்லியில் வெங்காயம் விலை ரூ.80 ஆக உயர்வு

by *சம்ஸ் Thu 22 Aug 2013 - 8:22

புதுடெல்லி, ஆக. 22–
டெல்லியில் வெங்காயம் விலை கிலோ ரூ.80 ஆக உயர்ந்தது. விலையை கட்டுப்படுத்த வெளி நாடுகளில் இருந்து இறக்குமதி செய்ய முடிவு செய்யப்பட்டுள்ளது.
டெல்லியில் கடந்த சில நாட்களாக வெங்காயத்தின் விலை ‘கிடுகிடு’வென உயர்ந்து வருகிறது. கிலோ ரூ.25க்கு விற்ற வெங்காயம் கடந்த வாரம் திடீர் என்று ரூ.50 ஆக உயர்ந்தது.
உணவில் அன்றாடம் பயன்படுத்தும் வெங்காயத்தின் விலை திடீரென்று உயர்ந்ததால் நடுத்தர வர்க்கத்தினர் அதிர்ச்சி அடைந்தனர்.
டெல்லியில் வெங்காயம் விலை உயர்வு மற்ற மாநிலங்களிலும் எதிரொலித்தது. மேற்கு வங்காளம், மத்திய பிரதேசம் போன்ற மாநிலங்களிலும் விலை உயர்ந்தது. டெல்லியில் விலை உயர்வை தடுக்க மாநில அரசு சார்பில் கூட்டுறவு கடைகள் திறக்கப்பட்டுள்ளன.
வெளி மார்க்கெட்டை விட அங்கு ரூ.20 வரை விலை குறைத்து விற்பனை செய்யப்படுகிறது. என்றாலும் வெங்காயம் தட்டுப்பாடு நிலவுவதால் விலை இன்னும் கட்டுப்பாட்டுக்குள் வரவில்லை.
இதற்கிடையே வெங்காய விலை உயர்வை பாரதீய ஜனதா கையில் எடுத்துக் கொண்டு போராட்டத்தில் ஈடுபட்டு வருகிறது. மேலும் பாரதீய ஜனதா சார்பில் வெங்காயம் விற்பனை கடையும் திறக்கப்பட்டுள்ளது.
அதில் போட்டி போட்டு விலை குறைத்து கிலோ ரூ.25–க்கு விற்பனை செய்தது. போராட்டத்துக்காகவும், அரசின் கவனத்தை ஈர்க்கவும் மட்டுமே இந்த கடை திறக்கப்பட்டது.
வெங்காயம் விலையை கட்டுப்படுத்த மத்திய அரசு தீவிர நடவடிக்கை எடுத்தது. அது பலன் அளிக்கவில்லை.
இந்த நிலையில் டெல்லியில் வெங்காயம் விலை மேலும் உயர்ந்துள்ளது. சில்லரை விலையில் கிலோ ரூ.70 முதல் ரூ.80 வரை விற்பனை செய்யப்படுகிறது. மொத்த விற்பனையில் ரூ.45 முதல் ரூ.55 வரை விற்பனையாகிறது.
அதே சமயம் இந்தியாவில் வெங்காயம் அதிகம் விளையும் மாநிலமான மராட்டியத்தில் மொத்த விற்பனை விலை கிலோ ரூ.41.25 ஆக உள்ளது.
விலையை கட்டப்படுத்த சீனா, பாகிஸ்தான், எகிப்து, ஈரான் ஆகிய நாடுகளில் இருந்து வெங்காயம் இறக்குமதி செய்ய முடிவு செய்யப்பட்டது. வெங்காயம் இறக்குமதியாகும் பட்சத்தில் விலை குறையும் வாய்ப்பு உள்ளது.
வெங்காயம் இறக்குமதி செய்ய சர்வதேச அளவில் டெண்டர் கோரப்பட்டுள்ளது. சரக்கு கட்டணம் உள்ளிட்ட செலவினங்களுடன் சேர்த்து கட்டுபடியாகும் விலைக்கு டெண்டர் கோரப்படுகிறது.
இந்த ஆண்டு மராட்டியத்தில் கடும் வறட்சி நிலவியதால் வெங்காயம் உற்பத்தி குறைந்தது. இதே போல் ராஜஸ்தான், மத்திய பிரதேசம், ஆந்திரா, தமிழ் நாடு ஆகிய மாநிலங்களில் மழை மற்றும் சரக்கு போக்குவரத்து பாதிக்கப்பட்டதாலும் வட மாநிலங்களில் வெங்காயத்துக்கு தட்டுப்பாடு ஏற்பட்டுள்ளது.