இலங்கைக்கு கடத்த முயன்ற 60 கிலோ கஞ்சா பறிமுதல்: 3 பேர் கைது

by *சம்ஸ் Sat 24 Aug 2013 - 9:15

ராமநாதபுரம், ஆக. 24–
மதுரையிலிருந்து ராமநாதபுரம் வழியாக இலங்கைக்கு ஒரு கும்பல் கஞ்சா கடத்துவதாக ராமநாதபுரம் போலீசாருக்கு தகவல் கிடைத்தது. அத்துடன் கஞ்சாவை மதுரையில் இருந்து காரில் கொண்டு வருவதாகவும் கூறப்பட்டது. இதையடுத்து ராமநாதபுரம் போலீஸ் சூப்பிரண்டு மயில்வாகனன் உத்தரவின்படி துணை சூப்பிரண்டு முரளிதரன், இன்ஸ்பெக்டர் கிருஷ்ண மூர்த்தி ஆகியோர் போலீசாருடன் தீவிர கண்காணிப்பில் ஈடுபட்டனர்.
அப்போது ராமநாதபுரம் பாரதிநகர் பகுதியில், குறிப்பிட்ட அந்த கார் வந்தது. அதனை போலீசார் சோதனையிட்டபோது அதில் 60 கிலோ கஞ்சா மூடைகளாக கட்டப்பட்டு இருந்தது தெரியவந்தது. இதையடுத்து காருடன் கஞ்சா மூடைகளை போலீசார் பறிமுதல் செய்தனர்.
அத்துடன் காரில் இருந்த மதுரை, அண்ணாநகரை சேர்ந்த தங்கமணி என்பவரது மனைவி ஜெயராணி (வயது 45), அவரது மகன் பாண்டியராஜ் (29), திருப்பரங்குன்றத்தை சேர்ந்த டிரைவர் சிவபாண்டி (25) ஆகியோரை போலீசார் கைது செய்தனர்.
விசாரணையில் மதுரை, அனுப்பானடியை சேர்ந்த பெருமாயி என்பவரிடம் இருந்து கஞ்சா மூடைகளை வாங்கி பாம்பனில் உள்ள அலெக்ஸ் என்பவரிடம் ஒப்படைத்து இலங்கைக்கு அனுப்புவதற்காக கொண்டு சென்றதாக அவர்கள் கூறினர்.
இதனையடுத்து அலெக்ஸ் மற்றும் பெருமாயியை பிடிக்க பாம்பன் மற்றும் மதுரை போலீசாருக்கு தகவல் தெரிவிக்கப்பட்டது. ஆனால் அவர்கள் இருவரும் தலைமறைவாகிவிட்டனர். அவர்களை போலீசார் தேடி வருகின்றனர்.