சொகுசு படகு... 40 கிலோ தங்கம்... பறிமுதல் - தமிழகத்தில் நடப்பது என்ன?

by **ராகவா** Tue 3 Sep 2013 - 15:23

"தமிழகத்திற்கு கடல் வழியாக பயங்கரவாதிகள் ஊடுருவலாம்' என, திடீர் எச்சரிக்கைகள் வந்ததன் பின்னணி குறித்து, தற்போது விசாரணை நடந்து வருகிறது. கோடியக்கரை பகுதியில், 15 தினங்களுக்கு முன், கண்டுபிடிக்கப்பட்ட ஆளில்லாத சொகுசுப் படகில், வந்தது யார் என்பதும், வேதாரண்யத்தில் தற்போது பிடிபட்டு வரும் தங்கத்திற்கும், இந்த படகிற்கும் தொடர்பிருக்கிறதா என்பதும், விசாரணையில் உள்ளதாக கூறப்படுகிறது.

வடமாநிலங்களில் தான் நக்சல்கள், மாவோயிஸ்ட்கள் ஆதிக்கம் அதிகளவில் உள்ளது. தென் மாநிலங்களில், தமிழகத்தை பொறுத்தவரை, ஊடுருவல் என்று கூறப்பட்டாலும், உடனடி நடவடிக்கை மூலம், அவை தடுக்கப்பட்டு வருகின்றன.இதனால், இதுவரை, மிகப்பெரிய அளவில் பிரச்னைகள் ஏதுமில்லாமல், "அமைதிப் பூங்கா' வாக உள்ளது.இந்நிலையில், சமீபத்தில் மூன்று முறை, மத்திய உளவுப்பிரிவு மற்றும் மத்திய உள்துறையில் இருந்து, "கடல் வழியாக தமிழகத்தில் பயங்கரவாதிகள் ஊடுருவலாம்' என்று அளிக்கப்பட்ட எச்சரிக்கைகள், "ஊடுருவல் இருக்குமோ' என்று அனைவரையும் ஆச்சரியப்படச் செய்தது.மூன்று முறை தொடர்ந்து வந்த, எச்சரிக்கை, சற்றே தமிழகத்தை அசைத்து தான் பார்த்தது.பயங்கரவாதிகளின் பேச்சுக்கள் மற்றும் சங்கேத பாஷைகளை ஒட்டுக் கேட்ட, உளவுப் பிரிவினர், அதில், "மதுரை, மன்னார்குடி' என்ற வார்த்தைகள் இடம் பெற்றிருப்பதாக கூறி, அப்பகுதிகளுக்கு, கூடுதல் கவனம் செலுத்துமாறு தெரிவித்தனர்.

தொடர்ந்து, சென்னை, தூத்துக்குடி, எண்ணூர் துறைமுகங்களுக்கும் எச்சரிக்கை விடுக்கப்பட்டது.இதைத் தொடர்ந்து, முதல்வர் உத்தரவுப்படி, தமிழகத்தில், 10 நாட்களுக்கும் மேலாக, கடலோர பகுதிகள் முழுவதுமாக, கடற்படை, கடலோர காவல்படை, கடலோர காவல் குழுமத்தினர், தொடர் கண்காணிப்பு மற்றும் பாதுகாப்பில் ஈடுபட்டனர். தமிழகம் முழுவதும், முக்கிய கோவில்கள், சுற்றுலாத் தலங்கள் மற்றும் மக்கள் அதிகம் கூடும் பகுதிகளில் பாதுகாப்பு அதிகரிக்கப்பட்டது.தொடர் எச்சரிக்கைகள் அடிப்படையில், அசம்பாவிதங்கள் ஏதும் நடக்காமல், தமிழகம் பாதுகாக்கப்பட்டது. இருந்தாலும், இந்த எச்சரிக்கைகளின் பின்னணி என்ன என்பது, தற்போது வரை புரியாத புதிராக உள்ளது.

பயங்கரவாத அமைப்புகளின் தகவல் பரிமாற்றத்தில், "மதுரை, மன்னார்குடி' இடம் பெற்றதன் காரணம் குறித்து விசாரணை நடத்த வேண்டிய கட்டாயம், தற்போது ஏற்பட்டுள்ளது.மேலும், சேலம் ஆடிட்டர் ரமேஷ் கொலை வழக்கு தொடர்பாக, தற்போது தேடப்பட்டு வரும், "போலீஸ்' பக்ருதீன் உள்ளிட்ட, நால்வருக்கும், இந்த மிரட்டல் விவகாரத்திற்கும் தொடர்பிருக்குமோ என்ற சந்தேகமும் தற்போது, எழுந்துள்ளது. இதற்கிடையில், உளவுத் துறையின் எச்சரிக்கை விவகாரத்திற்கு, மற்றொரு பின்னணியும் கூறப்படுகிறது.கடந்த, 15 தினங்களுக்கு முன், நாகை மாவட்டம், வேதாரண்யம், கோடியக்கரை பகுதியில், கடற்படையினர் ரோந்து செல்லும் போது, ஆளில்லா சொகுசுப் படகு ஒன்று நின்றதை கண்டுபிடித்துள்ளனர்.மீனவர்கள் பயன்படுத்த முடியாத அந்த படகு, அங்கு வந்தது குறித்து விசாரித்த நிலையில் தான், எச்சரிக்கை விடுக்கப்பட்டதாகக் கூறப்படுகிறது.

ஆனால், அந்த படகு, கடத்தலுக்கு பயன்படுத்தப்பட்டிருக்கலாம் என்பது, தற்போது போலீசாரின் சந்தேகமாக உள்ளது. வேதாரண்யம் பகுதியில், நேற்று முன்தினம், கோவிந்தராஜுலு என்பவரிடம் இருந்து, 12 கிலோ தங்கத்தை கைப்பற்றினர். இதே போல், இதுவரை, அப்பகுதியில் இருந்து, 40 கிலோவிற்கும் மேற்பட்ட தங்கம், கைப்பற்றப்பட்டுள்ளதாக கூறப்படுகிறது. சமீபத்தில் பிடிபட்ட தங்கம், இலங்கையில் இருந்து, அந்த சொகுசு படகில் கடத்தி வந்திருக்கலாம் எனவும், போலீஸ் மற்றும் வருவாய் புலனாய்வு பிரிவு வட்டாரத்தில் கூறப்படுகிறது. அவ்வளவு பெரிய படகில், 18 கிலோ தங்கம் மட்டுமே கொண்டு வரப்பட்டிருக்க வாய்ப்பில்லை என்பதால், தொடர்ந்து விசாரணை நடத்தி வருகின்றனர்.

- நமது நிருபர் -
நன்றி-தினமலர்