மறைந்து வரும் கோலி சோடா

மறைந்து வரும் கோலி சோடா


போச்சம்பள்ளி, :  வளர்ந்து வரும் நாகரீக மோகத்தால் சோடா கலர் பானத்திற்கான மவுசு மிகவும் டல்லடிப்பதால், அதன் தயாரிப்பும் வெகுவாக குறைந்து விட்டது.
கடந்த பத்து வருடங்களுக்கு முன்வரை பட்டி தொட்டி முதல் பட்டணம் வரை கலர் என்றாலே அது கோலி சோடா தான். மண் பானை, சிமெண்ட் தொட்டிகளில் தண்ணீர் ஊற்றி அதனுள் சோடா பாட்டிலை போட்டு குளிர்ச்சியாக வைத்திருப்பார்கள். அந்த கோலி சோடாவை உடைத்து குடிப்பதற்கே தனி பயிற்சி வேண்டும். தாகத்துக்கு மட்டுமல்ல. சோர்வடைந்து, மயக்கமானவர்களுக்கும் இது உடனடியாக குளுகோஸ் மாதிரி கொடுக்கப்படும். மேலும், கோலி சோடாவில் ஒரு ஸ்பூன் உப்பையும் எலுமிச்சை சாறையும் கலந்து குடித்தால் எப்பேர்பட்ட வாய்வு பிடிப்பு, வயிற்று வலியும் ஓடிப்போகும் என்று கோலி சோடாவின் அருமை, பெருமைகளை நம் பாட்டன், பாட்டி முதல் தாய், தந்தையர் வரை சொல்லக் கேட்டிருக்கிறோம். நம்மில் பலர் அதை அனுபவத்தில் உணர்ந்திருக்கிறோம் என்பது தான் உண்மை.
இப்படி பழம்பெருமை வாய்ந்த சோடாவை 1872ல் லண்டனை சேர்ந்த குளிர்பான நிறுவனம் ஒன்று தான் அறிமுகப்படுத்தியது. வெகு விரைவில் நம் நாட்டிலும் கோலி சோடா தயாரிப்பு குடிசை தொழிலாக அறிமுகமாகி பரவலான வரவேற்பை பெற்றது. கார்பன்டை ஆக்சைடை தண்ணீரில் கரைத்து அதை பாட்டிலில் அடைத்து விற்கும் எளிய வழி முறைகளை கொண்ட சோடா தயாரிப்பு மின்சார பயன்பாடு இல்லாத தொழிலாகும். கோலிசோடா, பன்னீர் சோடா, ஆரஞ்சு சோடா, கோலா சோடா, ஜிஞ்சர் சோடா, கலர் என்று பல விதங்களில், ஒரு சோடா கலர் முப்பது பைசாவுக்கு விற்கப்பட்டது.  இந்த தொழில் பல ஆயிரம் குடும்பங்களை வாழ வைத்தது.
இப்படி கொடி கட்டி பறந்த சோடா விற்பனை இன்று ஒரு நாளைக்கு பத்து பாட்டில் விற்றாலே அதிசயம் தான் என்ற நிலையில் உள்ளது. தற்போது வெளிநாட்டு குளிர்பானங்கள் வாங்கி குடிப்பதை பெருமையாகவும், நாகரிகமாகவும் கருதும் மக்கள், உள்ளூரில் தயாரிக்கப்படும் பக்க விளைவுகளற்ற சோடா பானங்களை குடிப்பதை கவுரவ குறைச்சலாக எண்ணி தவிர்த்து வருகின்றனர்.
சோடா பான வகையை இரு மாதங்களுக்கு மேல் இருப்பு வைத்தாலும் அவை கெட்டுப் போகாது. ஆனால் இன்று உள்ளூரில் தயாரிக்கப்படும் சோடா குடிப்பதை தவிர்த்து உடலுக்கு ஒவ்வாத ரசாயனம் கலந்த வெளிநாட்டு குளிர் பானங்களை மக்கள் குடித்து வருகின்றனர்.
கோடை காலத்தில் மட்டுமின்றி குடும்ப விழாக்களிலும், பொதுக் கூட்டங்களிலும் கூட குளிர் பானங்கள் விநியோகிப்பது வழக்கமாகி விட்டது. அதை வாங்கி குடிப்பதை கிராமப்புற மக்களும் பெருமையாகவே கருதுகின்றனர். கிராமப் புறங்களிலும் சோடா பருகுவோரின் எண்ணிக்கை முற்றிலும் குறைந்து விட்டதால் சோடா விற்பனையும் சரிந்து போனது. இதனால் தமிழகத்தில் பாரம்பரிய சோடா தயாரிப்பும் வெகுவாக குறைந்து போனது.
போச்சம்பள்ளி, மத்தூர் பகுதிகளில் 100க்கும் மேற்பட்ட சோடா தயாரிப்பு கம்பெனிகள் நடத்தி வந்தனர். இதன் மூலம் பலர் வேலை வாய்ப்பு பெற்று வந்தனர். தற்போது சோடா கலருக்கு மவுசு குறைந்து விட்டதால் பலர் மாற்றுத் தொழில் செய்து பிழைப்பு நடத்தி வருகின்றனர்.
லாபம் கிடைக்கிறதோ, இல்லையோ நம் முன்னோர் கற்றுத் தந்த கைத்தொழிலை விடக்கூடாது என்று நடத்தி வருவதாக கூறுகின்றனர் அதன் உரிமையாளர்கள்.
இது குறித்து போச்சம்பள்ளி சோடா கடை உரிமையாளர் சண்முகம் (52) கூறியதாவது: நான் சிறு வயதில் இருந்தே சோடா கடை நடத்தி வருகிறேன். முன்பெல்லாம் நல்ல வருவாய் கிடைத்தது. தற்போது வெளிநாட்டு குளிர்பான மோகத்தால் மக்கள் சோடா கலரை மறந்து விட்டனர். இதனால் எங்கள் தொழில் பெரிதும் பாதிக்கப்பட்டு உள்ளது. சோடா தயாரிப்புக்கு மின்சாரம் தேவை இல்லை என்பதால் தான் இன்றும் என்னால் சோடா கலர் தொழில் செய்ய முடிகிறது. இவ்வாறு சண்முகம் கூறினார்.
இந்நிலை இப்படியே நீடித்தால் இன்னும் ஒரு சில வருடங்களில் கோலி சோடா பாட்டிலை அருங்காட்சியகத்தில் தான் பார்க்க முடியும் என்ற நிலை வெகு தொலைவில் இல்லை என்பது நிதர்சனமான உண்மை.

http://kulasaisulthan.wordpress.com/2013/09/25/%E0%AE%AE%E0%AE%B1%E0%AF%88%E0%AE%A8%E0%AF%8D%E0%AE%A4%E0%AF%81-%E0%AE%B5%E0%AE%B0%E0%AF%81%E0%AE%AE%E0%AF%8D-%E0%AE%95%E0%AF%8B%E0%AE%B2%E0%AE%BF-%E0%AE%9A%E0%AF%8B%E0%AE%9F%E0%AE%BE/#more-5304