படிப்பு ஏற பாதபூஜை: பள்ளி பருவத்தில் வளர்க்கப்படும் மூடப்பழக்கம்!

ராமநாதபுரம்: மாணவ-மாணவிகள் நன்றாக படிப்பதற்காக பெற்றோர்களுக்குப் பாத பூஜை செய்யும் நிகழ்ச்சி பள்ளிக்கூடத்திலேயே நடத்தப்பட்டது பெருத்த சர்ச்சையை ஏற்படுத்தியுள்ளது.

ராமேசுவரத்தில் உள்ள விவேகானந்தா வித்யாலயா மெட்ரிகுலேசன் பள்ளியில் நேற்று மாணவ-மாணவிகள் பெற்றோர்களுக்குப் பாத பூஜைகள் செய்யும் நிகழ்ச்சி நடைபெற்றது. நிகழ்ச்சியில் பள்ளியில் படிக்கும் பத்தாவது, பன்னிரன்டாம் வகுப்பை சேர்ந்த மாணவ-மாணவிகள் 110 பேர் தங்களது பெற்றோர்களின் கால்களைப் பால், தேன்,

சந்தனம், தண்ணீரால் சுத்தம் செய்தனர்.

தொடர்ந்து அவர்களது காலுக்குச் சந்தனம், குங்குமம் வைத்து மலர் தூவி காலில் விழுந்து ஆசிர்வாதம் வாங்கினர்.. காலை 10 மணியிலிருந்து 12 மணி வரையிலும் 2 மணி நேரம் இப்பாத பூஜைகள் நடைபெற்றன. அது போல் பெற்றோரும் தங்களது பிள்ளைகள் படிப்பில் சிறந்து நல்லொழுக்கத்துடன் சிறந்து விளங்க வேண்டும் என்று சிறப்பு பிரார்த்தனை செய்து ஆசிர்வாதம் வழங்கினர்.

பாத பூஜையில் ராமகிருஷ்ண தபோவனத்தைச் சேர்ந்த சுவாமிகள் சத்யானந்தா, பரமானந்தா, சுத்தானந்தா, சாரதானந்தா, ருத்ரானந்தா, பள்ளிமுதல்வர் ஜெயமணி, வழக்கறிஞர் ராமமூர்த்தி உள்ளிட்ட ஏராளமான மூடப்பழக்க ஊக்குவிப்பாளர்கள் கலந்து கொண்டனர். அறிவைப் போதிக்கவேண்டிய பள்ளிக்கூடத்திலேயே காலை கழுவினால் நன்றாக படிக்கலாம் என்ற சிந்தனையை மாணவர் மனதில் ஏற்றும் விதத்தில் நடத்தப்பட்ட இந்நிகழ்ச்சிக்குப் பகுத்தறிவாளர்கள், சமூக ஆர்வலர்களும் கடும் எதிர்ப்பைத் தெரிவித்துள்ளனர்.


நன்றி:இந்நேரம்.காம்