"த கார்டியனு'க்கு எதிராக சட்ட நடவடிக்கை எடுக்கப்போவதாக விக்கிலீக்ஸ் அச்சுறுத்தல்

பிரிட்டனின் முன்னணிப் பத்திரிகைகளான "த கார்டியன்', "லண்டன் டெய்லி' என்பனவற்றுக்கு எதிராக சட்ட நடவடிக்கை எடுக்கப்போவதாக விக்கிலீக்ஸ் இணையத்தளம் அச்சுறுத்தல் விடுத்துள்ளது.

பிரிட்டனின் முக்கிய பத்திரிகைகளான "த கார்டியன்', "லண்டன் டெய்லி' என்பவற்றின் சிரேஷ்ட செய்தியாளர்களினால் எழுதப்பட்டு வெளியிடப்பட்ட நூலில் விக்கிலீக்ஸ் இணையத்தள ஸ்தாபகர் ஜூலியன் அசாஞ் மற்றும் அவரது முன்னாள் சகாக்களுக்கிடையில் சர்ச்சைகள் நிலவுவதாகக் குறிப்பிடப்பட்டமையானது தம்மை அவமதிப்பதாக உள்ளதாகக் கருதியே குறித்த பத்திரிகைகள் மீது விக்கிலீக்ஸ் சட்ட நடவடிக்கை எடுக்கப் போவதாக அச்சுறுத்தல் விடுத்துள்ளது.

இரகசியத் தகவல்களைத் திரட்டித் தந்த முன்னாள் படைவீரர் கொல்லப்படலாம்' என ஜூலியன் அசாஞ் கருதியதாக "த கார்டியனால்' வெளியிடப்பட்டுள்ள நூலில் குறிப்பிடப்பட்டுள்ளது.

அத்துடன் அசாஞ் கோபம் மிக்கவர் எனவும் சபலபுத்தியுடையவர் எனவும் அந்நூலில் குறிப்பிடப்பட்டிருக்கும் அதேவேளை, "த கார்டியனின் நூலில் அவதூறான விடயங்கள் உள்ளடக்கப்பட்டிருக்கிறது. அது தொடர்பில் சட்ட நடவடிக்கை எடுக்கப்படும் என விக்கிலீக்ஸ் டுவிட்டரில் அனுப்பப்பட்ட செய்தியில் குறிப்பிடப்பட்டுள்ளது.

"த கார்டியன்', "த நியூயோர்க் ரைம்ஸ்' என்பன விக்கிலீக்ஸினால் வெளியிடப்பட்ட இரகசிய ஆவணங்கள் தொடர்பான செய்திகளை ஒரே நேரத்தில் வெளியிட்ட போதிலும் ஆப்கானிஸ்தான் யுத்தத்தில் கூட்டுப் படைகளினால் பல நூற்றுக்கணக்கான பொதுமக்கள் கொல்லப்பட்டதான சம்பவத்தை "த கார்டியன்' பத்திரிகை தனது முதற்பக்கத்தில் பிரசுரித்ததைத் தொடர்ந்து "த நியூயோர்க் ரைம்ஸ்' பத்திரிகையானது அதிலிருந்து முரண்பட்டது. அத்துடன் கடந்த வாரம் இப்பத்திரிகையின் ஆசிரியர் பில் கில்லரால் எழுதப்பட்டு வெளியிடப்பட்ட நூலில் ஆப்கானிஸ்தானில் கொல்லப்பட்டவர்களின் தொகை மிகக் குறைவாகவே குறிப்பிடப்பட்டுள்ள போதிலும் இது தொடர்பாக "த கார்டியன்' தனது நிலைப்பாட்டிலிருந்து மாறவில்லை.

விக்கிலீக்ஸினால் விடுக்கப்பட்டுள்ள சட்ட அச்சுறுத்தல் தொடர்பாக அறிந்துள்ளதாகவும் ஆனால் அது தொடர்பான ஆவணங்களை இதுவரை பெறவில்லையெனவும் " த கார்டியன்' பத்திரிகையின் பேச்சாளர் தெரிவித்துள்ளார். அத்துடன் இவ்வாறான அச்சுறுத்தல் தொடர்பாக நாம் எதையும் இழக்கப்போவதில்லையெனவும் அவர் தெரிவித்துள்ளார்.

இந்தியன்எக்ஸ்பிரஸ்