'இனி எப்ப வேணாலும் சந்திக்கலாம்': மோடி சொல்லிட்டார் என்கிறார் விஜயகாந்த்

'என்னை சந்திக்க முடியாததற்கு, மோடி வருத்தம் தெரிவித்தார். இனி, எப்போது வேண்டுமானாலும் சந்திக்கலாம்; தொலைபேசியிலும் பேசலாம் என, உறுதியளித்து உள்ளார்' என, மாவட்ட செயலர்களிடம், விஜயகாந்த் கூறியதாக தகவல் வெளியாகி உள்ளது.கடந்த மாதம் 26ம் தேதி, பிரதமர் மோடி பதவியேற்பு விழாவுக்கு சென்ற, தே.மு.தி.க., தலைவர் விஜயகாந்த், மோடியை சந்தித்து பேச, தீவிர முயற்சி எடுத்தார். ஆனாலும், மோடியை சந்திக்க முடியவில்லை.அதனால், விரக்தியுடன் சென்னை திரும்பினார்.

அதிருப்தி


அதேநேரத்தில், முதல்வர் ஜெயலலிதா, சமீபத்தில் டில்லி சென்று மோடியையும், மத்திய அமைச்சர்களையும் சந்தித்து திரும்பினார்.'மோடியையும், பா.ஜ., தலைவர்களையும், விஜயகாந்தால் சந்திக்க முடியாததற்கு, அவரது அணுகுமுறையே காரணம்' என, தே.மு.தி.க., நிர்வாகிகள் கருதினர். இதனால், விஜயகாந்த் மீது அதிருப்தி அடைந்தனர். இந்நிலையில், மாவட்ட செயலர்களிடம், கருத்து கேட்கும் கூட்டத்தை, விஜயகாந்த் நேற்று ரகசியமாக நடத்தினார். ஒவ்வொரு நாளும், 15 மாவட்ட செயலர்கள் வீதம், நான்கு நாட்களில், 59 மாவட்ட செயலர்களிடம், அவர் கருத்து கேட்க திட்டமிட்டு உள்ளார். கடைசியாக, புதுச்சேரி மாநில நிர்வாகிகளிடம் கருத்து கேட்க உள்ளதாக, கூறப்படுகிறது.

15 மாவட்ட செயலர்கள்


நேற்றைய கருத்து கேட்பில், கன்னியாகுமரி, தூத்துக்குடி, திருநெல்வேலி, சிவகங்கை, மதுரை, தேனி, விருதுநகர், ராமநாதபுரம் உள்ளிட்ட, 15 மாவட்ட செயலர்கள் பங்கேற்றனர்.'மாவட்ட செயலர்கள் யாரும், தங்களது வாகனத்தை கட்சி அலுவலகத்திற்கு வெளியே நிறுத்தக் கூடாது' என, தே.மு.தி.க., தலைமை உத்தரவிட்டிருந்தது. பத்திரிகைகள், மீடியாக்களுக்கு தகவல் தெரியாமல் இருக்க, இந்த ஏற்பாடு செய்யப்பட்டிருந்தது.அதன்படி, கட்சி அலுவலக பின்பக்க வாயில் வழியாக, மாவட்ட செயலர்கள் உள்ளே வந்தனர். காலை 11:35 மணிக்கு, அங்கு வந்த விஜயகாந்த், ஒவ்வொரு மாவட்ட செயலர்களையும், தன் அறைக்கு அழைத்தார். 10 முதல் 15 நிமிடங்கள், தேர்தல் தோல்வி குறித்து கருத்து கேட்டார்.

இதுகுறித்து, தே.மு.தி.க., வட்டாரத்தில் கூறப்படுவதாவது:தோல்விக்கு மாவட்ட செயலர்கள் தான் காரணம் என, 4ம் தேதி நடந்த ஆலோசனைக் கூட்டத்தில், விஜயகாந்த் பேசினார். இதனால், இறுகிய முகத்துடனேயே, இந்த கூட்டத்தில் மாவட்ட செயலர்கள் பங்கேற்றனர்.

நிதி குறைவு


தேர்தல் பணிக்கு பொறுப்பாளராக நியமிக்கப்பட்ட, மாநில நிர்வாகிகள் அளித்த தகவலின் அடிப்படையில், மாவட்ட செயலர்களிடம், சில கேள்விகளை விஜயகாந்த் எழுப்பினார். தலைமையிடம் கூறியபடி, வேட்பாளர்கள் தேர்தல் செலவுகளை செய்யவில்லை என, மாவட்ட செயலர்கள் புகார் கூறினர். தலைமை அளித்த தேர்தல் நிதியும் குறைவாக இருந்தது என, சிலர் குற்றம் சாட்டினர்.இதையடுத்து, கட்சியினர் மத்தியில், விஜயகாந்த் பேசினார்.

அப்போது, அவர் கூறியதாவது:தோல்வியால் துவண்டுவிட வேண்டாம். சட்டசபை தேர்தலுக்கு முன், தே.மு.தி.க., எழுச்சி பெற்று விடும். மூன்று நாட்கள் முயற்சித்தும், என்னால் மோடியை சந்திக்க முடியாதது, உங்களுக்கு வருத்தத்தை அளிக்கலாம். அதைப் பற்றி, நீங்கள் கவலைப்பட வேண்டாம்.

புது திட்டம்


சமீபத்தில், மோடியுடன் தொலைபேசியில் பேசினேன். அப்போது அவர், நிர்வாக காரணங்களால், என்னை சந்திக்க முடியாததற்கு வருத்தம் தெரிவித்தார். 'இனி, எப்போது வேண்டுமானாலும் சந்திக்கலாம்; தொலைபேசியில் பேசலாம்' என்றும் கூறினார்.மத்திய அரசு உதவியுடன், கட்சியின் இழந்த செல்வாக்கை மீட்கும் வேலையை, நான் துவங்க இருக்கிறேன். அதற்கான திட்டத்தை, விரைவில் அறிவிக்கிறேன்.இவ்வாறு, விஜயகாந்த் பேசியதாக, தே.மு.தி.க., வட்டாரம் தெரிவித்தது.வெள்ளிக் கிழமை என்பதால், வழக்கமான பிரியாணிக்கு பதில், நேற்று, கூட்டத்தில் பங்கேற்றவர்களுக்கு, சைவ உணவு வழங்கப்பட்டு உள்ளது.

- நமது நிருபர் - -