தேர்தலில் அன்புமணி செலவழித்தது ரூ.1,000:செலவு கணக்கில் வெளிப்படும் அதிர்ச்சி தகவல்கள்

சென்னை:தர்மபுரி தொகுதியில் இருந்து தேர்வு செய்யப்பட்ட, பா.ம.க., - எம்.பி., அன்புமணி ராமதாஸ், தேர்தலுக்கு சொந்த பணம், 1,000 ரூபாய் மட்டும் செலவழித்ததாக, தேர்தல் செலவு கணக்கில் தெரிவித்துள்ளார்.

சொந்த பணம்:அதே தொகுதி தி.மு.க., வேட்பாளரான, முன்னாள் எம்.பி., தாமரை செல்வன், சொந்த பணம் எதையும் செலவழிக்கவில்லை என, தெரிவித்துள்ளார்.
தமிழகத்தில் உள்ள, 39 லோக்சபா தொகுதிகளில், 845 வேட்பாளர்கள் போட்டியிட்டனர். இவர்களில், 750 பேர் தேர்தல் செலவு கணக்கை சமர்பித்துள்ளனர். அவை தேர்தல் கமிஷன் இணையதளத்தில் வெளியிடப்பட்டுள்ளன.

தர்மபுரி பா.ம.க., வேட்பாளரும், தற்போதைய எம்.பி.,யுமான அன்புமணி, 10.59 லட்சம் ரூபாய் செலவு கணக்கு காண்பித்துள்ளார். சொந்த பணம், 1,000 ரூபாய் செலவழித்ததாகவும், கட்சியில் இருந்து, 17 லட்சம் ரூபாய் பெற்றதாகவும் தெரிவித்துள்ளார். எஸ்.எம்.எஸ்., அனுப்ப, 15 ஆயிரம் ரூபாய் செலவழித்துள்ளதாக சொல்லியிருக்கிறார்.அதே தொகுதியில், தி.மு.க., சார்பில் போட்டியிட்ட, முன்னாள் எம்.பி., தாமரை செல்வன், 15.28 லட்சம் ரூபாய், செலவு செய்ததாக தெரிவித்துள்ளார். சொந்த நிதி எதையும் செலவழிக்கவில்லை. கட்சியில் இருந்து, 50 லட்சம் ரூபாய் பெற்றுள்ளார்.

11.82 லட்சம் ரூபாய்:அ.தி.மு.க., வேட்பாளர் மோகன், 11.82 லட்சம் ரூபாய், செலவு கணக்கு காண்பித்துள்ளார். சொந்த நிதி 2,995 ரூபாய், நன்கொடை, 1.30 லட்சம் ரூபாய், கடன் 10.50 லட்சம் ரூபாய் பெற்றதாக தெரிவித்துள்ளார்.காங்கிரஸ் வேட்பாளர் ராம சுகந்தன், 8.93 லட்சம் ரூபாய், செலவு காண்பித்துள்ளார். சொந்த பணம் 1.76 லட்சம், நன்கொடை மூலம், 8.36 லட்சம் ரூபாய் பெற்றதாக தெரிவித்துள்ளார்.ஆரணி தொகுதி அ.தி.மு.க., வேட்பாளர் ஏழுமலை, 20.74 லட்சம் ரூபாய், செலவு கணக்கு சமர்பித்துள்ளார். அந்தத் தொகை முழுவதும், சொந்த பணம். நன்கொடை எதுவும் பெறவில்லை என குறிப்பிட்டுள்ளார். அந்த தொகுதி பா.ம.க., வேட்பாளர் ஏ.கே.மூர்த்தி, 23.58 லட்சம் ரூபாய், செலவு கணக்கு காண்பித்துள்ளார். சொந்த நிதி 3.66 லட்சம், நன்கொடை 29 லட்சம் என தெரிவித்துள்ளார்.

நன்கொடை:தி.மு.க., வேட்பாளர் சிவானந்தம், 29.81 லட்சம் ரூபாய், செலவு கணக்கு சமர்பித்துள்ளார். சொந்த நிதி, 55 ஆயிரம், கட்சி நிதி 50 லட்சம், நன்கொடை 30 ஆயிரம் ரூபாய் என, தெரிவித்துள்ளார்.வேலுார் பா.ஜ., வேட்பாளர் ஏ.சி.சண்முகம், 38.87 லட்சம் ரூபாய், கணக்கு காண்பித்துள்ளார். சொந்த பணம், 35 ஆயிரம், கட்சி பணம் 35 லட்சம், நன்கொடை 12 லட்சம் என தெரிவித்துள்ளார்.நீலகிரி தொகுதி தி.மு.க., வேட்பாளர் ஆ.ராஜா, 53.61 லட்சம் ரூபாய், செலவு கணக்கு சமர்பித்துள்ளார். சொந்த நிதி, 1.05 லட்சம், கட்சி நிதி, 50 லட்சம், நன்கொடை 2.56 லட்சம் பெற்றதாக தெரிவித்துள்ளார்.அதே தொகுதியில் போட்டியிட்ட அ.தி.மு.க., வேட்பாளர் கோபாலகிருஷ்ணன், 47.82 லட்சம் ரூபாய், கணக்கு காண்பித்துள்ளார். சொந்த நிதி, 49 ஆயிரம் ரூபாய், நன்கொடை, 47.42 லட்சம் பெற்றதாக தெரிவித்துள்ளார்.

தஞ்சாவூர் தி.மு.க., வேட்பாளர் டி.ஆர். பாலு, 33.29 லட்சம் ரூபாய், கணக்கு காண்பித்துள்ளார். சொந்த நிதி, 46 ஆயிரம் ரூபாய், கட்சி நிதி, 50 லட்சம் பெற்றதாக தெரிவித்துள்ளார்.
சொந்த நிதி:அந்த தொகுதி, அ.தி.மு.க., வேட்பாளர் பரசுராமன், 20.71 லட்சம் ரூபாய், கணக்கு சமர்பித்துள்ளார். சொந்த நிதி, 15.51 லட்சம், நன்கொடை 5.20 லட்சம் பெற்றதாக தெரிவித்துள்ளார்.

சிவகங்கை தொகுதியில், காங்கிரஸ் வேட்பாளர் கார்த்தி சிதம்பரம், 34.58 லட்சம், அ.தி.மு.க., வேட்பாளர் செந்தில் நாதன், 30.91 லட்சம், இந்திய கம்யூனிஸ்ட் வேட்பாளர் கிருஷ்ணன், 20.02 லட்சம், தி.மு.க., வேட்பாளர் துரைராஜ், 46.18 லட்சம் ரூபாய், செலவு கணக்கு காண்பித்துள்ளனர்.தேர்தலில் போட்டியிட்ட வேட்பாளர்கள், சொந்த பணம் குறைந்த அளவு செலவழித்தாக தெரிவித்திருப்பது, பொதுமக்களிடம் ஆச்சரியத்தை ஏற்படுத்தி உள்ளது.
வேட்பாளர்கள் சமர்பித்த கணக்கு சரியா என, தேர்தல் செலவினப் பார்வையாளர்கள், சரி பார்த்து வருகின்றனர்.

-தினமலர்

ஒவ்வொரு கட்சியின் சொத்து மதிப்பு
எவ்வளவு...?
-
ஜெயிக்கும் கட்சிக்கு நிறுவனங்கள்
தாராள நன்கொடை வழங்குவது வாடிக்கை...
-