கண்களை விற்றுத் தான் ஓவியமா? மரக்கன்றுகள் நட காடு அழிப்பு: வனத்துறையினர் விபரீத முயற்சி

பெ.நா.பாளையம்: பாலமலை வனச்சரகத்துக்குட்பட்ட பகுதியில், மரக்கன்றுகளை நட, 'பொக்லைன்' இயந்திரம் கொண்டு வனவளம் அழிக்கப்படுவதற்கு இயற்கை ஆர்வலர்கள் எதிர்ப்பு தெரிவித்துள்ளனர்.

மேற்கு தொடர்ச்சி மலையில் வனவளத்தை பெருக்க, வனத்துறை பல்வேறு திட்டங்களை செயல்படுத்தி வருகிறது. மலையில் வசிக்கும் மலைவாழ் மக்களை பயன்படுத்தி, மரக்கன்றுகளை நடும் திட்டத்தையும், மழைக்காலத்தில் விதைகளை துாவுதல் உள்ளிட்ட திட்டங்களும் செயல்படுத்தப்படுகின்றன. இதனால், மலைவாழ் மக்களுக்கு வேலைவாய்ப்பு ஏற்படுவதோடு, வனவளமும் பெருகிறது. இத்திட்டங்களின் ஒரு பகுதியாக, ஜப்பான் நாட்டின் நிதியுதவியோடு, மலைகளில் மரங்களை வளர்க்கும் திட்டம் பாலமலை வனப்பகுதியில் செயல்படுத்தப்படுகிறது. இத்திட்டத்தின்படி, 3 மீட்டர் நீளம், ஒரு மீட்டர் அகலம், ஒரு அடி ஆழத்தில் மலைப்பகுதியில் குழி வெட்டி அதில் வேப்பமரம், புளியமரம், வாகை உள்ளிட்ட மரக்கன்றுகள் நடப்படும். மழைக்காலத்தில் பெய்யும் நீர், அக்குழியில் தேங்கி, மரங்கன்று தொடர்ந்து வளர உதவும்.

இப்பணியில் மலைவாழ் மக்களை மட்டுமே பயன்படுத்தி, அவர்களது உடல் உழைப்பால் பணிகளை மேற்கொள்ள வேண்டும். இயந்திரங்களை பயன்படுத்தக் கூடாது. ஆனால், பாலமலை வனப்பகுதியில் இயந்திரங்களை கொண்டு குழிகள் தோண்டப்பட்டுள்ளது. வனத்துறையின் இச்செயலுக்கு இயற்கை ஆர்வலர்கள் கடும் எதிர்ப்பு தெரிவித்துள்ளனர்.

பாலமலை இயற்கை: வள பாதுகாப்பு சங்க செயலாளர் சின்னராஜ் கூறியதாவது: பாலமலை வனப்பகுதியில், கடந்த சில நாட்களாக முன் மரக்கன்றுகளை நட மலைவாழ் மக்களை பயன்படுத்தி, குழிகள் தோண்டப்பட்டன. ஆனால், அதற்கான கூலியை வனத்துறையினர் தரவில்லை. கூலி கேட்டு நெருக்கடி கொடுத்ததால் வனத்துறையினர் பொக்லைன் இயந்திரங்களை பயன்படுத்தி, குழிகளை தோண்டியுள்ளனர்.வனங்களில் பொக்லைன் இயந்திரங்களை பயன்படுத்தக் கூடாது என விதி இருந்தும், அதை மீறி, வனத்துறை செயல்பட்டுள்ளது. இதனால், வனங்களில் குறிப்பாக நீரோடைகளையும், சிற்றோடைகளையும் உருவாக்கும் இலை, தழைகளான மலையின் மடி அநியாயமாக அழிக்கப்பட்டுள்ளது. மேலும், மலைப்பகுதியில் உள்ள மரங்கள், சிறு செடி, கொடிகளும் அழிக்கப்பட்டு இருப்பது வேதனையாக உள்ளது. இச்செயலை வனத்துறை உடனடியாக நிறுத்த வேண்டும்.இவ்வாறு, சின்னராஜ் கூறினார்.

வனத்துறையினர் கூறுகையில், “குழி தோண்ட அரசு தரப்பில் நபர் ஒருவருக்கு நாள் ஒன்றுக்கு 130 ரூபாய் மட்டுமே கூலி நிர்ணயம் செய்யப்பட்டுள்ளது. இது போதுமானதாக இல்லை. அதனால், பொக்லைன் பயன்படுத்தி, குழி தோண்டப்படுகிறது. நிலுவை கூலித் தொகையை உடனடியாக வழங்க நடவடிக்கை எடுக்கப்படும்.” என்றனர்.

நன்றி:தினமலர்