ஈராக் நிலவரம் மேலும் மேலும் சிக்கல்

பாக்தாத்:
ஈராக்கில் கடத்தப்பட்ட இந்தியர்கள் கதி
என்னவானது என தெரியாத நிலையில்,
அல் - குவைதா ஆதரவு, ஐ.எஸ்.ஐ.எஸ்.,
பயங்கரவாதிகள் கை ஓங்கியுள்ளது.
-
அவர்கள் வசம் பல நகரங்கள் வீழ்ந்து
வருவதால், நிலைமை மேலும் மேலும்
சிக்கலாகி வருகிறது.
-
முதலில் சிரியா:மேற்கு ஆசிய நாடுகளில்
ஒன்றான சிரியாவில், கடந்த மூன்று
ஆண்டுகளாக நிலவும், அரசுக்கு எதிரான
பயங்கர உள்நாட்டு சண்டையை முன்னின்று
நடத்தி வரும், அல் - குவைதா ஆதரவு,
ஐ.எஸ்.ஐ.எஸ்., பயங்கரவாதிகள், சிரியாவின்
அண்டை நாடான ஈராக்கிலும் நுழைந்துள்ளனர்.
-
சிரியா மற்றும் ஈராக் நாடுகளை இணைத்து,
ஒருங்கிணைந்த முஸ்லிம் நாடாக ஏற்படுத்த
வேண்டும் என்பது அந்த பயங்கரவாதிகளின்
திட்டம். ஈராக்கில் ஏற்கனவே, ஆளும் ஷியா
முஸ்லிம் அரசு, சன்னி முஸ்லிம்களுக்கு
கொடுமை இழைத்ததால், சன்னி முஸ்லிம்கள்
ஆதரவு அல் - குவைதா பயங்கரவாதிகள்,
சன்னி முஸ்லிம்களுடன் இணைந்து,
அரசுக்கு எதிராக பயங்கர சண்டையில் ஈடுபட்டு
வருகின்றனர்.
-
இதை ஒடுக்க, பிரதமர் நூரி அல் - மாலிகி
தலைமையிலான அரசு பல்வேறு முயற்சிகள்
எடுத்த போதிலும், பல முக்கிய நகரங்கள்,
பயங்கரவாதிகள் வசம் வீழ்ந்த வண்ணமாக
உள்ளன. மொசூல், திக்ரித் போன்ற முக்கிய
நகரங்களை கைப்பற்றியுள்ள பயங்கரவாதிகள்,
தலைநகர் பாக்தாத் நோக்கி முன்னேறி
வருகின்றனர்.

அவர்கள் வசம் பல குட்டி நகரங்களும், ஊர்களும்
வீழ்ந்து வருவதால், பயங்கரவாதிகள் கை
ஓங்கியுள்ளது. அந்த நகரங்களில் இருந்த
பாதுகாப்பு படையினர், பயங்கரவாதிகளுக்கு
பயந்து ஓடி விடுவதால், பல நகரங்கள்,
பயங்கரவாதிகள் வசம் வந்துள்ளதால், குழப்பம்
அதிகரித்துள்ளது.

பயங்கரவாதிகளுக்கு பயந்து தப்பி ஓடிய,
23 பேரை, அவர்கள் கொடூரமாக சுட்டுக் கொன்ற
சோகமும் நேற்று நடந்துள்ளது.
இதற்கிடையே, பயங்கரவாதிகளால் கடத்தப்பட்ட,
40 இந்தியர்களில், ஒருவர் தப்பி வந்தது போக,
மீதமுள்ள, 39 இந்தியர்கள் நிலைமை குறித்து
எந்த தகவலும் இல்லை. அதுபோல், திக்ரித்
நகர மருத்துவமனையில் இருந்த இந்திய நர்சுகள்
நிலையும் தெளிவாக தெரியவில்லை.

அமெரிக்கா மவுனம்:பயங்கரவாதிகள் மற்றும்
அவர்களின் நிலைகள் மீது, அமெரிக்க ராணுவம்
தாக்குதல் நடத்துவது தான் ஒரே தீர்வு
என்ற நிலையில், அமெரிக்கா மவுனம்
சாதிப்பதாலும், ஈராக் ராணுவம் பலம்
இழந்துள்ளதாலும், ஈராக் மற்றும் அதன் அண்டை
நாடுகளிலும் குழப்பங்கள் அதிகரித்துள்ளன.

இந்நிலையில், அமெரிக்க வெளியுறவுத் துறை
அமைச்சர், ஜான் கெர்ரி, நேற்று மத்திய தரைக்கடல்
நாடுகள் சுற்றுப் பயணத்தின் ஒரு கட்டமாக,
ஈராக் சென்று, அந்நாட்டின் தலைநகர் பாக்தாத்தில்
நிலைமையை ஆய்வு செய்தார்.
-
--------------------------------
--தினமலர்