மவுண்ட்பேட்டன் பயண செலவுக்கு 64 ஆயிரம் ரூபாய்:பழைய கோப்புகளை அகற்றும் பணியின்போது சுவாரசியம்

புதுடில்லி : மத்திய அரசு அலுவலகங்களில் உள்ள தேவையற்ற பழைய கோப்புகளை அகற்றும் பணியின்போது, பல சுவாரசியமான கோப்புகள் கண்டறியப்பட்டுள்ளன. இந்தியாவின் முதல் கவர்னர் ஜெனரலாக பணியாற்றிய மவுண்ட்பேட்டன் பிரபுவின் பயணச் செலவுக்கு, மத்திய அரசு, 64,000 ரூபாய் கொடுத்தது தொடர்பான கோப்புகளும் கிடைத்துள்ளன.

நரேந்திர மோடி பிரதமராக பதவியேற்றதும், மத்திய அமைச்சகங்களிலும், அலுவலகங்களிலும், பணிகளை விரைவு படுத்தும்படியும், அலுவலகங்களை சுகாதாரமாக வைக்கும்படியும் உத்தரவு பிறப்பித்துள்ளார். இதையடுத்து, மத்திய அரசு அலுவலகங்களை சுத்தப்படுத்தும் பணி துவங்கியுள்ளது. பல ஆண்டுகளாக குப்பைகளாக தேங்கி கிடக்கும் தேவையற்ற கோப்புகளை கண்டறிந்து, அவற்றை அப்புறப்படுத்தும் பணி நடக்கிறது. இதுவரை, 1.5 லட்சம் தேவையற்ற கோப்புகள் கண்டறியப்பட்டு, அகற்றப்பட்டுள்ளன.இந்த தேடலின்போது, பல சுவாரசியமான கோப்புகளும் கண்டறியப்பட்டுள்ளன. இந்தியாவின் முதல் கவர்னர் ஜெனரலாக பதவி வகித்த மவுண்ட்பேட்டன் பிரபு, பணிக்காலம் முடிந்து, லண்டனுக்கு புறப்பட்டபோது, அவரின் பயணச் செலவுக்காக, 64,000 ரூபாய் அளிக்கப்பட்டுள்ளது. இது தொடர்பான கோப்புகள், தற்போது கண்டறியப்பட்டுள்ளன. இப்போதைய மதிப்பில் கணக்கிட்டால், இந்த தொகை, சில கோடி ரூபாயை எட்டும்.

முன்னாள் பிரதமர் லால் பகதூர் சாஸ்திரி, தன் சம்பளத்தை வாங்க மறுத்து, அந்த தொகையை இயற்கை பேரிடர் பாதிக்கப்பட்ட பகுதிகளுக்கு ஒதுக்குவதற்காக ஏற்பாடு செய்திருந்த கூட்டம் தொடர்பான கோப்புகளும் கண்டறியப்பட்டுள்ளன.மகாத்மா காந்தி இறந்தபின், அதை அதிகாரப்பூர்வமாக அறிவிப்பதற்கு முன் நடந்த மத்திய அமைச்சரவை கூட்டம் தொடர்பான கோப்பும், இந்த தேடலின்போது கண்டுபிடிக்கப்பட்டது. இந்த முக்கியத்துவம் வாய்ந்த கோப்புகள் அனைத்தும், டிஜிட்டல் மயமாக்கப்படவுள்ளன.மத்திய உள்துறை அமைச்சகத்தில் உள்ள கோப்புகள், மூன்று பிரிவாக பிரிக்கப்படவுள்ளன. முதல் பிரிவில், ஒரு ஆண்டுக்கு முந்தைய கோப்புகளும், இரண்டாவது பிரிவில், ஐந்து ஆண்டு முதல் 10 ஆண்டுகள் பழமையான கோப்புகளும், மூன்றாவது பிரிவில், அரசின் கொள்கை முடிவுகள் தொடர்பான கோப்புகளும் இடம் பெறும். மற்ற கோப்புகள் அனைத்தும், தேசிய ஆவண காப்பகத்துக்கு அனுப்பி வைக்கப்படவுள்ளதாக, உள்துறை அமைச்சக வட்டாரங்கள் தெரிவித்தன.

-தினமலர்

மோடி பிரதமராக பதவி ஏற்ற செலவு
எவ்வளவு இருக்கும்..?!
-

சுவாரஷ்யமான செய்திகள்!