ரெய்னாவுக்கு பதில் விராட் கோலி: டோனி

உலகக்
கிண்ணக் கிரிக்கெட்டின் முதல் ஆட்டத்தில் இந்திய அணியில் ரெய்னாவுக்கு
பதிலாக கோலி விளையாடுவார் என்று கெப்டன் டோனி தெரிவித்துள்ளார்.4 வது
இடத்தில் விளையாட ரெய்னாவை விட கோலியே பொருத்தமானவர் என்றும் அவர்
கூறியுள்ளார். சென்னையில் நியூசிலாந்து அணிக்கு எதிரான பயிற்சி ஆட்டத்தில்
வெற்றி பெற்ற பின் டோனி செய்தியாளர்களைச் சந்தித்தார்.
அப்போது அவர் மேலும் கூறியது: 4 இடத்தில் களம் இறங்குவது அணிக்கு மிக
முக்கியமானது. ஏனெனில் அந்த இடத்தில் உள்ள வீரர் ஆட்டத்தின் போக்குக்கு
ஏற்ப எந்த நேரத்திலும் களம் இறங்க வேண்டிய சூழ்நிலை ஏற்படும். அப்போதுள்ள
நிலைக்கு ஏற்ப விளையாட வேண்டும். 3 வது இடத்தில் கம்பீர் விளையாடுவார். 4
வது இடத்தில் கோலி விளையாடுவது அணிக்கு வலு சேர்க்கும். 5,6 வது இடத்தில்
விளையாடவே ரெய்னா பொருத்தமானவர்.
யுவராஜ் சிங்கும் முக்கியமான வீரர் எனவே அவரும் களம் இறங்கும் 11
வீரர்கள் பட்டியலில் இடம்பெறுவார். அவர் இடம் பெறுவது பந்து வீச்சிலும்
அணிக்கு பலம் சேர்க்கும் என்றார் டோனி. சமீபகாலத்தில் யுவராஜ் சிங்
சிறப்பான ஆட்டத்தை வெளிப்படுத்தாதது குறித்துப் பேசிய அவர், யுவராஜுக்கு
சரியான வாய்ப்புகள் கிடைக்கவில்லை.
அவர் ரன் குவிக்க ஆரம்பித்து விட்டால், எவராலும் கட்டுப்படுத்த முடியாது
என்றார் டோனி. சேவாக், சச்சின், கம்பீர், தோனி, யுவராஜ் ஆகியோர் களம்
இறங்குவது உறுதியாகி விட்டது. அவர்கள் தவிர ஆல் ரவுண்டரான யூசுப் பதானும்
களம் இறங்குவார். இவர்கள் தவிர 4 பந்து வீச்சாளர்கள் அணியில் இடம்
பிடிக்கும் பட்சத்தில், கோலி அல்லது ரெய்னா இருவரில் ஒருவருக்குதான்
வாய்ப்பு அளிக்க முடியும்.
இந்நிலையில் கோலி களம் இறங்குவார் என்று தோனி உறுதியாகக் கூறியுள்ள
நிலையில், ரெய்னாவுக்கு முதல் ஆட்டத்தில் களம் இறங்கும் வாய்ப்பு
குறைந்துள்ளது. அடுத்து நடைபெறும் ஆட்டங்களில் வேண்டுமானால் அவருக்கு
வாய்ப்பு கிடைக்கலாம்.
ரெய்னா தனது கடைசி 21 இன்னிங்ஸ்களில் ஒரே ஒரு அரை சதம் மட்டுமே
அடித்துள்ளார். ஆனால் நியூசிலாந்துக்கு எதிரான பயிற்சி ஆட்டத்தில்
அதிரடியாக விளையாடி 25 பந்துகளில் 50 ரன்கள் குவித்தது குறிப்பிடத்தக்கது