வீட்டில் நுழைந்த இரண்டு திருடர்களை அடித்து துவைத்த 85 வயது மூதாட்டி

by **ராகவா** Wed 23 Jul 2014 - 20:41

ட்லம்: பா.ஜ.,வைச் சேர்ந்த, முதல்வர் சிவராஜ் சிங் சவுகான் தலைமையிலான, ம.பி.,யில், ரட்லம் என்ற நகரில், பிரேம லதா, 85, என்ற முன்னாள் ஆசிரியை, தன் வீட்டில் தனியே வசித்து வந்தார்.

ஜன்னலை உடைத்து...:

கடந்த ஞாயிறு இரவில், அவர் வீட்டின், இரும்பு ஜன்னல் கதவை அறுத்து, இரு திருடர்கள் உள்ளே நுழைந்தனர். கம்பியை அறுக்கும் சத்தம் கேட்டு, தூக்கத்திலிருந்து விழித்த அந்த மூதாட்டி, படுக்கையிலிருந்து எழுந்து வருவதற்குள், திருடர்கள் வீட்டின் உள்ளே நுழைந்து விட்டனர். அவர்களில் ஒருவன் ஓடி வந்து, அந்த பெண்ணின் கையை பிடித்து, கீழே தள்ள முயன்றான். அவனை இழுத்து கீழே தள்ளிய அந்த வீரப் பெண், அருகிலிருந்த கம்பை எடுத்து, இருவரையும் சரமாரியாக அடிக்கத் துவங்கினார். அதே நேரம், 'திருடன், திருடன்' என, உரக்க சத்தமிட்டு, பக்கத்து வீட்டில் உள்ளவர்களை எழுப்பினார். மூதாட்டியிடம் அடி வாங்கிக் கொண்டிருந்தவர்களை, பக்கத்து வீட்டினர் பிடித்து, போலீசில் ஒப்படைத்தனர்.

பரிசு, பாராட்டு:

இரண்டு திருடர்களை பிடித்து கொடுத்த மூதாட்டி, பிரேமலதாவை பாராட்டி, போலீஸ் ஸ்டேஷனில் நேற்று பாராட்டு விழா நடந்தது. அதிகாரிகள் அவருக்கு, 5,000 ரூபாய் ரொக்கம் மற்றும் மொபைல் போன் ஒன்றையும் பரிசாக வழங்கினர். அதற்காக அங்கு வந்த அந்த மூதாட்டி, தன்னை தாக்கி திருட முயன்ற திருடர்கள் இருவரையும், தோப்புக்கரணம் போட வைத்து, தண்டனையும் வழங்கினார். இவர், முன்னாள் ஆசிரியை. இவரின் நான்கு ஆண் வாரிசுகள் மும்பையில் இருக்கின்றனர்.

நன்றி:தினமலர்