மொபைல் போன்- ஜீன்ஸ் கிடையாது; பெண்களுக்கு பஞ்சாயத்து கட்டுப்பாடு

by **ராகவா** Sun 10 Aug 2014 - 16:56

லக்னோ: நாட்டில் அதிகரித்து வரும் பெண்கள் தொடர்பான குற்றச் செயல்களை கட்டுப்படுத்தவும், பெண்களை இது போன்ற பாதிப்பில் இருந்து காப்பாற்றவும், உ .பி.,மாநிலத்தில் உள்ள ஒரு கிராம பஞ்சாயத்து கூட்டத்தில் தீர்மானம் போடப்பட்டுள்ளது. இது ஒரு பக்கம் வரவேற்பையும், மறுப்பக்கம் எதிர்ப்பையும் கிளப்பியிருக்கிறது.

உ.பி.,மாநிலத்தில் சமீபத்தில் கற்பழிப்பு, கொலை, இன மோதல் என பல்வேறு கிரிமினல் செயல்கள் பெருகி வருகிறது. இதற்கு அகிலேஷ் அரசே பொறுப்பு என எதிர்கட்சியினர் குற்றம்சாட்டி வருகின்றனர். முறையான நடவடிக்கை எடுக்க வேண்டும் என போராட்டமும் நடந்து வருகிறது.

இந்நிலையில் குஜர் இனத்து மக்கள் வசிக்கும் ஜட்வார் கிராம பஞ்சாயத்தார் கூடி ஒரு தீர்மானத்தை நிறைவேற்றியிருக்கிறார்கள். பெண்களுக்கு எதிரான வன்செயல்கள் தவிர்க்கப்பட வேண்டும். பெண்கள் ஆபாச ஆடை உடுத்துவது தவிர்க்கப்பட வேண்டும். குறிப்பாக இனி இந்த கிராமத்தில் யாரும் ஜீன்ஸ் பேண்ட் அணிய கூடாது, வெளி ஆட்களும் அந்த ஆடைகளை அணிந்து உலவ கூடாது. மேலும் பெண்கள் யாருக்கும் மொபைல் போன் வழங்க கூடாது. இவர்கள் மொபைல்போன் பயன்பாடு தடை செய்யப்படுகிறது. இதனை கிராம மக்கள் அனைவரும் பின்பற்ற வேண்டும் என கட்டப்பஞ்சாயத்தில் முடிவு செய்யப்பட்டுள்ளது. மேலும் திருமண விஷேங்களில் ஆட்டம் , பாட்டம், இசை நிகழ்ச்சிகளும், குத்தாட்டமும் போடக்கூடாது என்றும் பஞ்சாயத்தில் வலியுறுத்தப்பட்டுள்ளது. இதனை அனைவரும் பின்பற்றுவோம் என்றும் இப்பகுதி மக்கள் பஞ்சாயத்தில் உறுதி கொடுத்துள்ளனர்.

இது தொடர்பாக இந்த கிராமத்தை சேர்ந்த ஒரு முதியவர் கூறுகையில், ஆண்கள் கவர்ச்சிக்காக ஜீன்ஸ் போடுகின்றனர். இதனையே பெண்கள் போட்டால் என்னாகும். பெண்கள் எதிரான குற்றம் தான் அதிகரிக்கும் என்றார். இங்குள்ள ஒரு பெண் கூறுகையில், ஆம் நாங்கள் இதற்கு கட்டுப்படுகிறோம். யாரும் மொபைல் போன் பயன்படுத்த மாட்டோம். ஜீன்ஸ் அணிய மாட்டோம். என்று கூறினார்.

காங்., கட்சியை சேர்ந்த ரஷீத் ஆல்வி. இது பெண்களுக்கு எதிரானது. பெண்களுக்கும் சம உரிமை என்பதில் இது போன்று வேறு படுத்த கூடாது. பெண்கள் சுதந்திரம் பாதிக்க கூடாது என்று எதிர்ப்பு தெரிவித்துள்ளார்.

பல வீடுகள் தீக்கிரையாகின: ஜட்வார் கிாரமம் பிரபல முஷாப்பர் நகர் மாவட்டத்தில் அமைந்துள்ளது. இங்கு சமீபத்திய வன்முறை சம்பவங்கள் பெண்கள் தொடர்பான பிரச்னையால் எழுந்தது . இதில் பலர் கொல்லப்பட்டனர். பல வீடுகள் தீக்கிரையாகின.

கடந்த மாதத்தில் கர்நாடக மாநிலத்தில் பள்ளி மாணவிகள் மொபைல் போன் பயன்பாட்டுக்கு தடை விதிக்க வேண்டும் என எம்.எல்.ஏ.,க்கள் குழு பரிந்துரை செய்தது. இதற்கும் எதிர்ப்பும், ஆதரவும் கிளம்பியது என்பது நினைவிருக்கலாம்.

நன்றி:தினமலர்