தமிழ்நாட்டில் ஏ.டி.எம். கார்டு வடிவில் புதிய ரேஷன் கார்டு: ஜனவரியில் வழங்க முடிவு

-
சென்னை, ஆக. 14–
தமிழ்நாட்டில் 1 கோடியே 98 லட்சத்து 29 ஆயிரத்து 505 ரேஷன் கார்டுகள் உள்ளன. இதன் வடிவமைப்பு தற்போது அச்சிடப்பட்ட தாள் வடிவில் உள்ளது. அதுவும் டிசம்பர் மாதத்துடன் முடிவடையும் வகையில் உள்ளது.
-
இதன் பிறகு புதிய ரேஷன் கார்டு வழங்க வேண்டும். இதற்கு கால தாமதம் ஆனால் இணைப்பு தாள்கள் ஒட்டப்படும்.
தற்போதுள்ள நடைமுறையில் ஒருவர் தனது சொந்த ஊரில் ஒரு ரேஷன் கார்டும், வேலைபார்க்கும் இடத்தில் ஒரு ரேஷன் கார்டும் வைத்திருக்கும் நிலையும் உள்ளது. போலி கார்டுகளால் அரசுக்கு பொருள் இழப்பு ஏற்படுகிறது.
-
போலி ரேஷன் கார்டுகளை ஒழிக்கவும், ஒன்றுக்கு மேற்பட்ட இடங்களில் ஒருவருக்கு ரேஷன் கார்டு இருப்பதை தடுக்கும் வகையிலும், இனிமேல் ‘ஸ்மார்ட் கார்டு’ வடிவில் மின்னணு ரேஷன் கார்டு வழங்க அரசு முடிவு செய்துள்ளது.
-
அதாவது தற்போது நடைமுறையில் உள்ள குடும்ப அட்டைகளுக்கு பதில் உடற்கூறு பதிவு முறையில் மின்னணு குடும்ப அட்டைகளாக வழங்க நடவடிக்கை எடுக்கப்பட்டு வருகிறது.
-
தேசிய மக்கள் தொகை பதிவு அமைப்பின் கீழ் 10 விரல் கைரேகைகள் மற்றும் கண்கருவிழியை பதிவு செய்து ஆதார் அட்டை வழங்கப்பட்டுள்ளது.
-
இந்த தகவல் தொகுப்பை பயன்படுத்தி தமிழ்நாட்டில் மின்னணு குடும்ப அட்டைகள், ‘ஸ்மார்ட் கார்டு வடிவில்’ தயாரித்து வழங்க ஏற்பாடுகள் தீவிரமாக நடந்து வருகிறது. ஏ.டி.எம்.கார்டு வடிவில் இருக்கும் இந்த மின்னணு ரேஷன் கார்டு புதுச்சேரி மாநிலத்தில் ஏற்கனவே நடைமுறையில் உள்ளது. அங்கு ரேஷன் கார்டுக்கு சொந்தக்காரர் சென்று தான் கடையில் பொருள் வாங்க முடியும்.
-
கிரிடிட் கார்டுக்கு கடையில் ஒரு மிஷின் இருப்பது போல் இந்த மின்னணு ரேஷன் கார்டுக்கும் ரேஷன் கடையில் மிஷின் இருக்கும். அதில் மின்னணு ரேஷன் கார்டை பதிவு செய்ததும் நமது கைரேகையை பதிவு செய்ய வேண்டும்.
அப்போது தான் கார்டு ஓபன் ஆகும். பொருட்களும் வாங்க முடியும். வேறு நபரிடம் கார்டை கொடுத்து அனுப்பி பொருட்கள் வாங்க முடியாது.
-
எவ்வித தில்லு முல்லும் செய்ய முடியாத அளவுக்கு மின்னணு கார்டு உள்ளதால் இதை வருகிற ஜனவரி முதல் அமல்படுத்த அரசு தீவிர ஏற்பாடுகளை செய்து வருகிறது.
-
--மாலைமலர்