கடும் வரட்சி நிலவிய பகுதிகளில் மழை

கடும் வரட்சி நிலவிய பகுதிகளில் மழை
யாழ். 46.1 மி.மீ, அ'புரம் - 35மி.மீ
மட்டு. 20.1 மி.மீ, மன்னார் 97 மி.மீ. இதே காலநிலை தொடரும்

கடும்வரட்சி நிலவிய நாட்டின் பல பகுதிகளில் சுமார் 6 மாதங்களின் பின்னர் மழை வீழ்ச்சி பதிவாகியுள்ளது. வடமத்திய மாகாணம், மன்னார், மட்டக்களப்பு, வவுனியா, அம்பாறை மற்றும் யாழ்ப்பாணம் ஆகிய மாவட்டங்களில் மழைபெய்துள்ளது.

இந்தப் பகுதிகளில் கடந்த இரண்டு நாட்களில் மழைபெய்துள்ளது. நீண்ட காலத்தின் பின் பெய்திருக்கும் மழை தொடர்பில் அப்பகுதி மக்கள் மகிழ்ச்சி தெரிவித்துள்ளனர். அநுராதபுரம் மாவட்டத்தில் 35.3 மில்லிமீற்றர் மழையும், மட்டக்களப்பில் 20.1 மில்லிமீற்றர் மழையும், யாழ்ப்பாணத்தில் 46.1 மில்லிமீற்றர் மழையும், மன்னாரில் 97 மில்லிமீற்றர் மழையும், இரத்தினபுரி மாவட்டத்தில் 16 மில்லிமீற்றர் மழையும், திருகோணமலையில் 9.6 மில்லிமீற்றர் மழையும், வவுனியா மாவட்டத்தில் 41.7 மில்லிமீற்றர் மழையும் பதிவாகியிருப்பதாக வளிமண்டலவியல் திணைக்களம் அறிவித்துள்ளது.

இலங்கையில் தென்மேற்கு பருவப்பெயர்ச்சி காலநிலை நிலவிவரும் சூழ்நிலையில் வளிமண்டத்தில் ஏற்பட்டிருக்கும் குழப்பநிலை காரணமாக எதிர்வரும் 24 மணித்தியாலங்களில் நாட்டின் பல்வேறு பகுதிகளில் மழைபெய்யக்கூடும் என வளிமண்டலவியல் திணைக்களம் எதிர்வுகூறியுள்ளது.

கிழக்கு, ஊவா, மேற்கு, சப்ரகமுவ மற்றும் மத்திய மாகாணங்களிலும், காலி, மாத்தறை மாவட்டங்களில் பிற்பகல் அல்லது இரவு வேளையில் கடும் மழை பெய்யும் என்றும், இந்த மழையுடன் கூடிய காலநிலை வடமேல் மாகாணத்துக்கும் பரவும் என்றும் வளிமண்டலவியல் திணைக்களத்தின் அதிகாரியொருவர் தெரிவித்தார்.

அதேநேரம், இரவு வேளைகளில் நாட்டின் ஏனைய பகுதிகளில் மழை பெய்வதற்கான சாத்தியக்கூறுகள் காணப்படுகின்றன. நாட்டின் பல பகுதிகளில் ஏற்பட்ட மின்னல் தாக்கம் காரணமாக 15 பேர் உயிரிழந்துள்ளனர். மின்னல் தாக்கம் தொடர்பில் மக்களை அவதானமாக இருக்குமாறு வளிமண்டலவியல் திணைக்களம் கோரிக்கை விடுத்துள்ளது.

காலி ஊடாக புத்தளம் முதல் பொத்துவில் வரையான கடற்பரப்பில் மணிக்கு 20 கிலோமீற்றர் முதல் 40 கிலோமீற்றர் வேகத்தில் காற்று வீசும் என்றும். ஏனைய கடற்பரப்பில் காற்றின் வேகமானது மணிக்கு 60 கிலோமீற்றர்வரை அதிகரிக்கும் வாய்ப்பு இருப்பதாகவும் வளிமண்டலவியல் திணைக்களம் அறிவித்துள்ளது. இதேவேளை, வரட்சி நிலவும் பிரதேசங்களில் ஓரளவு மழை பெய்கின்றபோதும் நிவாரணப் பணிகளைத் தொடர்ந்தும் முன்னெடுத்து வருவதாக அனர்த்த முகாமைத்துவ அமைச்சர் மஹிந்த அமரவீர தெரிவித்தார்.

குடிநீர் தட்டுப்பாடு நிலவும் மாவட்டங்களுக்கு அவசியமான நடவடிக்கைகளை மேற்கொள்ளுமாறு மாவட்ட அரசாங்க அதிபர்களுக்குப் போதுமானளவு நிதி ஒதுக்கப்பட்டுள்ள அதேவேளை, கடந்த வாரம் 11 தண்ணீர் பவுசர்கள் பகிர்ந்தளிக்கப்பட்டதாகவும் அமைச்சர் கூறினார்.

வரட்சி நிலவும் மாவட்டங்களுக்கென 100 தண்ணீர் பவுசர்களை பெற்றுக்கொடுக்கும் அரசாங்கத்தின் திட்டத்தின் கீழ் இரண்டாம் கட்டமாக மேலும் 20 தண்ணீர் பவுசர்கள் இவ்வாரம் வழங்கப்படவிருப்பதாவும் அமைச்சர் கூறினார்.

எதிர்பார்த்தளவு மழையின்மையால் ஆறு மாவட்டங்களைச் சேர்ந்த சுமார் 17 இலட்சம் பேர் நீர் தட்டுப்பாட்டுப் பிரச்சினைக்கு முகங்கொடுத்துள்ளமை குறிப்பிடத்தக்கது.

தினகரன்

நேற்று எங்கள் ஊரிலிலும் நல்ல மழையாம்...
நெடு நாளைக்கு பிறகு எல்லோரும் கொண்ட்டத்தில் இருந்தனர்..