மூளைச்சாவு வாலிபரின் உடல் உறுப்புகள் தானம்: சேலம் வாலிபருக்கு கல்லீரல் பொருத்தப்பட்டது

சென்னை: மூளைச்சாவு வாலிபரின் உடல் உறுப்புகள் தானம் வாயிலாக, ஏழு பேருக்கு மறுவாழ்வு கிடைக்கிறது. உடல் உறுப்பு மாற்று சிகிச்சைக்காக, கல்லீரல்,
விமானத்தில் கோவைக்கு பறந்தது.

சென்னை கோட்டூர் கார்டனைச் சேர்ந்தவர் புஷ்பராஜ். இவரது மகன் கிறிஸ்டோ சுகந்த், 27; தனியார் நிறுவன ஊழியர். இவர், சுதந்திர தினத்தன்று, டூவீலரில், ஜெமினி மேம்பாலம் வழியாக வந்தபோது, விபத்தில் சிக்கினார்.

தீவிர சிகிச்சை:

பலத்த காயமடைந்த அவர், சென்னை ராஜிவ்காந்தி அரசு மருத்துவமனையில் சேர்க்கப்பட்டார். டாக்டர்கள் தீவிர சிகிச்சை அளித்தும், காப்பாற்ற முடியாமல், நேற்று அதிகாலை, மூளைச்சாவு நிலையை அடைந்தார். அவரது உடல் உறுப்புகளை தானம் செய்ய, உறவினர்கள் முன் வந்தனர்.இதையடுத்து, நேற்று மதியம், வாலிபருக்கு அறுவைச் சிகிச்சை நடந்தது. இதயம், கல்லீரல், சிறுநீரகங்கள், கண்கள் மற்றும் இதய வால்வும் அகற்றப்பட்டன. இதயம், கல்லீரல் மற்றும் இதய வால்வு தனியார் மருத்துவமனைகளுக்கு தரப்பட்டன.இரண்டு சிறுநீரகங்கள், சென்னை அரசு பொது மருத்துவமனைக்கும், கண்கள், எழும்பூர் அரசு கண் மருத்துவமனைக்கும் தரப்பட்டன. இதன் மூலம், ஏழு பேருக்கு மறுவாழ்வு கிடைக்கிறது. வாலிபரிடம் இருந்து அகற்றப்பட்ட, கல்லீரல் விமானம் மூலம், கோவையில் உள்ள மருத்துவமனைக்கு கொண்டு செல்லப்பட்டது. அங்கு சேலத்தைச் சேர்ந்த, ௩௧ வயது இளைஞருக்கு பொருத்தப்பட்டது.

பயன் தரட்டும்:

கிறிஸ்டோ சுகந்தின் அண்ணன் ஜான் கூறுகையில், ''என் தம்பியைத்தான் காப்பாற்ற முடியவில்லை. அவனது உடல் உறுப்புகளாவது, மற்றவர்களுக்கு பயன் தரட்டும். அவர்கள் மூலமாக, என் தம்பி வாழட்டும் என்றே, உடல் உறுப்புகளை தானம் செய்தோம்,'' என்றார்.

-தினமலர்

மரித்தும் வாழும் மகாத்மாக்கள் என இவர்களைத்தான் சொல்வார்கள் போலும்!

ஓருயிர் போக ஏழு உயிர் பயன் பெறுகின்றது!

மரித்துபோனவனை நினைத்து வருந்துவதா பயன் பெறுவோரை நினைத்து மகிழ்வதா?