இளைஞர்களுக்கு எதிர்கால தலைமை பயிற்சிகளை வழங்கவே ''நீல படையணி''

இளைஞர்களுக்கு எதிர்கால தலைமை பயிற்சிகளை வழங்கவே ''நீல படையணி''

வெலிகம தினகரன் நிருபர்
கொடூர யுத்தத்தை முடிவுக்குக் கொண்டு வந்த ஜனாதிபதி மஹிந்த ராஜபக்ஷவின் தலைமையிலான அரசாங்கம், தற்போது நாட்டை அபிவிருத்திப் பாதையில் இட்டுச் செல்வதைக் காண முடிகின்றது.

நாடும் அமைதியான சூழலில் அபிவிருத்திப் பாதையை நோக்கி நடைபயில ஆரம்பித்துள்ளதாக ஹம்பாந்தோட்டை மாவட்ட பாராளுமன்ற உறுப்பினர் நாமல் ராஜபக்ஷ தெரிவித்தார்.

வெலிகம நகர மண்டபத்தில் திங்கட்கிழமை இடம்பெற்ற நீலப்படையணி (நில் - பலகாய) அங்குரார்ப்பண வைபவத்தில் பிரதம அதிதியாகக் கலந்து கொண்டு உரையாற்றும் போதே இவ்வாறு தெரிவித்தார். வெலிகம நகர சபைத் தலைவர் ஹுஸைன் மொகமட் தலைமையில் இடம்பெற்ற இவ்வைபவத்தில் தொடர்ந்து உரையாற்றுகையில்,

ஒழுக்க விழுமியங்கள் நிறைந்த இளைஞர்களை எதிர்காலத்தில் உருவாக்குவதே இவ் நீலப்படையணியின் பிரதான இலக்காகும். எதிர்கால தலைமைத்துவங்களுக்கு தற்போதைய இளைஞர்களை அமர்த்துவதற்கான பயிற்சிகளை வழங்குவதும் இதன் மற்றுமொரு நோக்கமாகும்.

பாடசாலை மற்றும் பல்கலைக்கழக மாணவர்கள் வழிதவறிச் செல்லாமல், அறிவு மற்றும் பண்பு சார் உள்ள மாணவர்களாக உருவாக்கவே, பாடசாலைகளில் மஹிந்தோதய ஆய்வுகூடங்கள் கணனிக் கூடங்கள் அமைக்கப்பட்டு வருகின்றன. இதன் மூலம் மாணவர்கள் ஆர்ப்பாட்டங்கள், ஊர்வலங்கள் நடத்துவதை நிறுத்த முடியும். நாட்டில் சகல பகுதிகளிலும் இளைஞர் படையணிகள் உருவாக்கப்பட்டு வருகின்றன.

எமது முயற்சிகளுக்கு இளைஞர்கள் பூரண ஒத்துழைப்பு வழங்க வேண்டும். “இன்றைய இளைஞர்களே நாளைய தலைவர்கள்” எதிர்காலத்தில் தலைமைத்துவப் பொறுப்பை வகிக்கக்கூடியவர்கள் இன்றைய இளைஞர்களே. அதற்கான அடித்தளத்தை நாம் வளர்த்துக்கொள்ள வேண்டும் என்றார்.

தினகரன்