ரயில்வே பட்ஜெட்டில் தமிழகத்திற்கு 12 புதிய ரயில்கள்: மும்பை, ஹவுராவுக்கு துரந்தோ ரயில்கள்

by *சம்ஸ் Mon 21 Feb 2011 - 5:31

வரும் 25ம் தேதி தாக்கல் செய்யப்படும், ரயில்வே பட்ஜெட்டில், சென்னையிலிருந்து மும்பை மற்றும் ஹவுராவுக்கு துரந்தோ ரயில்களும், தமிழகத்தின் முக்கிய நகரங்கள் இடையே 12 புதிய ரயில்கள் இயக்குவதற்கான அறிவிப்புகளை வெளியிட பரிசீலிக்கப்படுவதாக டில்லி ரயில்வே வட்டாரத்தில் பேசப்படுகிறது.

வரும் 2011 - 2012ம்ஆண்டுக்கான ரயில்வே பட்ஜெட், இம்மாதம் 25ம் தேதி பார்லிமென்ட்டில் தாக்கல் செய்யப்படுகிறது. ரயில்வே அமைச்சர் மம்தா பானர்ஜி பட்ஜெட் தயாரிப்பு பணிகளில் ஈடுபட்டுள்ளார்.தமிழக ரயில்வே திட்டங்களுக்கு போதிய நிதி ஒதுக்கீடு செய்ய தமிழக அரசின் சார்பிலும், தமிழகத்தை சேர்ந்த மத்திய அமைச்சர்கள் சிலரின் சார்பிலும் வலியுறுத்தப்பட்டுள்ளன. தமிழக எம்.பி.,க்கள், தங்கள் தொகுதிகளில் ரயில்வே மேம்பாட்டு பணிகளுக்கு போதிய நிதி ஒதுக்கீடு செய்யவும் ரயில்வே அமைச்சகத்திற்கு கோரிக்கை விடுத்துள்ளனர்.

தமிழக ரயில்வே திட்டங்களில், விழுப்புரம் - திண்டுக்கல் இரண்டாவது பாதை மற்றும் திருவாரூர் - காரைக்குடி மீட்டர் கேஜ் பாதையை அகல ரயில் பாதையாக மாற்றவும், வரும் ரயில்வே பட்ஜெட்டில் போதுமான நிதி ஒதுக்கீடு செய்ய, தமிழக அரசு சார்பிலும், மத்திய அமைச்சர்கள், எம்.பி..க்கள்,பொது நலச் சங்கங்கள் மற்றும் திருச்சி, தஞ்சை, திருவாரூர், சிவகங்கை மாவட்ட வர்த்தக சங்கங்களின் சார்பிலும் ரயில்வே அமைச்சகத்திற்கு கோரிக்கை வைக்கப்பட்டுள்ளன.
தமிழகத்தில் மே மாதம் நடக்கவுள்ள சட்டசபை தேர்தலை கவனத்தில் கொண்டு, தமிழக ரயில்வே திட்டங்களுக்கு நிதி ஒதுக்கீடும் மற்றும் புதிய ரயில்கள் அறிவிக்கப்படுவதிலும் மத்திய அரசின் மூலம் கூடுதல் கவனம் செலுத்தப்படலாம் என்ற எதிர்பார்ப்பும் உள்ளது. ரயில்வே பட்ஜெட்டில் இந்தியாவில் முக்கிய நகரங்கள் இடையே 75 புதிய எக்ஸ்பிரஸ் ரயில்கள் இயக்கப்படவும், தமிழகத்தின் முக்கிய நகரங்கள் இடையே 12 புதிய ரயில்கள் அறிமுகம் செய்யப்படவும் வாய்ப்புள்ளதாவும் ரயில்வே வட்டாரத்தில் பேசப்படுகின்றன.

இவ்வகையில், சென்னை சென்ட்ரல் - மும்பை சி.எஸ்.டி., (மகராஷ்டிரா) இடையே துரந்தோ வாராந்திர ரயில், சென்னை சென்ட்ரல் - ஹவுரா (மேற்குவங்கம்) இடையே (வாரத்தில் மூன்று நாட்கள்) துரந்தோ ரயில் இயக்கப்படவும், கோவை - ஜல்பைக்குரி (மேற்கு வங்கம்), சேலம் - மிராஜ் (மகராஷ்டிரா) இடையே (வழி-ஹூப்ளி) இயக்கவும், திருநெல்வேலி - திகா (மேற்குவங்கம்), திருநெல்வேலி - புனே (மகராஷ்டிரா), தஞ்சை-அமிர்தசரஸ் (பஞ்சாப்), வேளாங்கண்ணி-கொல்லம் (கேரளா) இடையே வாராந்திர சிறப்பு ரயில் இயக்கப்படவும் திட்டமிடப்பட்டுள்ளது.சென்னை சென்ட்ரல்-ஆமதாபாத் (குஜராத்) இடையே வாரத்தில் மூன்று நாட்கள் "ஏசி' எக்ஸ்பிரஸ், மதுரை-ஹவுரா (மேற்குவங்கம்) இடையே வாரத்தில் மூன்று நாட்கள் எக்ஸ்பிரஸ் ரயில் இயக்கவும், திருநெல்வேலி - சேலம் இடையே பாசஞ்சர் ரயில் இயக்கப்படவும், நாகர்கோவில்- கோவை இடையே இயக்கப்படும் எக்ஸ்பிரஸ் ரயிலுக்கு தூத்துக்குடி - மணியாச்சிக்கு இணைப்பு இணைப்பு ரயில் இயக்கவும், திருப்பதி - கோவை இடையே வாரத்தில் மூன்று நாட்கள் இயக்கப்பட்டு வரும் எக்ஸ்பிரஸ் ரயில், வாரத்தில் ஐந்து நாட்கள் இயக்கவும், பரிசீலனை செய்யப்பட்டு வருவதாக ரயில்வே வட்டாரத்தில் கூறப்படுகிறது.